هامسەرۊکایەتیی دەسەو ڕاوەبەریی کەجەکەی، داوا کەرۊ کە گرڎ لاێوە دەس بە جمای کەرا، ڕاکاری گونجیا گێرارە وەر، پەی مەزڵوم داغی و عەبدولڕەحمان ئەری، کە دژوو هەرمانە نائیسانانەکاو دلۍ زینڎانوو هەولێری، نزیکەو دووۍ مانگان مانشا جە وارڎەی گێرتەن.
دەسەو ڕاوەبەریی کەجەکەی، جە ڕاو ئەرەیاونیاێوە نویسیایۊ، ئاماژە پانەیە کەرۊ کە پیلانێوە هەنە پەی کوشتەی مەزڵوم داغی وعەبدولڕەحمان ئەریوە دلۍ زینڎانینە، ئانەیچ ئاشکرا کەرۊ، سیخوڕێوە بە نامۍ یاسین عەلی خدری وەڵتەر ڕاوەبەروو ئا زینڎانی بییەن، کە دووە بەندکریێکێش چەنەنۍ.
هیچ پەیوەندیێوەشا بە کوشتەی ئەندامەکەو میتیوە نییا
جە ئەرەیاونیاکەو کەجەکەینە ئامان:
" پەی ڕای گرڎینی ئاشکران، مەزڵوم داغ وعەبدولڕەحمان ئەر، زیادتەر جە ٥٠ ڕوان زینڎانوو هەولێرینە مانشا جە وارڎەی گێرتەن، چندین ئەرەمەرزیۍ ئەرەیاونایشا چا بارۊ وەڵا کەرڎەنۊ. پەنەوازا گەل و ڕای گرڎینی دیموکراتیک هاگاداروو دۊخوو ئی دووە بەندکریایا با و ژیوایشا پارێزنا. وەڵی گرڎ چێوێنە، زانیاریی غەڵەت بارەو ئی دووە بەندکریایاوە دریۊ بە ڕای گرڎینی. پەنەوازا ئی زانیارییۍ ڕاسۍ کریاوە. مشۊم بەدروسی ڕای گرڎی جە دۊخوو مەزڵوم داغی و عەبدولڕەحمان ئەری هاگادارۍ با. مەزڵوم داغ و عەبدولڕەحمان ئەر هیچ پەیوەندیێوە ڕاستەوخۊشا نییا بە کوشتەی ئەندامەکەو میتیوە و بەشداریی ئی چالاکییە نەبیێنۍ. تەنیا هامکارۍ ئا هامڕایا بیێنۍ، کە چالاکییەکەشا کەرڎەن.
ئا ئەندامە کوشیاو میتی، ئەمرەو کوشتەی هامڕا هەڵمەتیش بەرەکەرڎێبۍ
ئا ئەندامە کوشیاو میتییە، قەراروو کوشتەی شۊڕشگێڵنۍ ئازا، هامڕا هەڵمەتییش دابۍ، کە خەڵکوو پانیشتوو کوردسانین. پەوکای ئی کەسە کریا ئامانج و گولەواران کریا. مەیاومێنە چی پەدەکە بێتاقەتا جە کوشتەی کەسێوە، کە بەشدار بییەن جە کوشتەی هامڕا هەڵمەتی، کە قارەمانێوە ئازاو گەلوو پانیشتوو کوردسانین و گرڎوو ژیوایش کەرڎەن قوربانەو دۊزوو کوردسانی و لاو گرڎکەسیوە وەشەسیا بییەن، یاواینە چینەی مەحاڵا. پەدەکە بێتاقەتییشە بە ئەشکەنجەدی مەزڵوم داغی و عەبدولڕەحمان ئەری زینڎانوو هەولێرینە مجۊ. هەردووە بەندکریێکۍ دژوو ئی ئەشکەنجەیە مانشا جە وارڎەی گێرتەن. ئی بێتاقەتییەو پەدەکەی و هەڵوێسەکەشا یاگۍ یاواینەی و قبووڵکەرڎەی نییا. پەنەوازا ڕای گرڎین و ئەرەمەرزیا مەدەنی و دیموکراتیکەکۍ، هاگادارۍ ئی ئەشکەنجەو دلۍ زینڎانوو هەولێری با و پەشتیوانیی بەندکریا مانگێرتەکا کەرا.
هەرچییشا سەر بۍ، پەدەکە وەرپەرسا
سەرەڕاو دۊخوو ئی دووە بەندکریایا، دەوڵەتی ئەرەگیروو تورکی پیلانێوەش نیێنەرە پەی کوشتەی مەزڵوم داغی و عەبدولڕەحمان ئەری دلۍ زینڎانینە. دەزگاو میتی بڕۍ سیخوڕێش زینڎانەکەنە ڕێکۍ وستێنۍ، پەی کوشتەی ئی دووە بەندکریایا و هەوڵۍ کوشتەیشا دێنۍ. بڕۍ سیخوڕۍ میتی لاو هێزەکاماوە گیریێنۍ، کە پەی کەرڎەی کۊکوشییەکەی ئامادۍ کریێبێنۍ. کە یۊشا نامێش یاسین عەلی خدرا. ئێد وەڵتەر ڕاوەبەروو زینڎانەکەی بییەن. میت ئی کەسەشە ئسپاران پەی ڕێکوستەی چند بەندکریاێوە پەی کوشتەیشا و زەڕش دێنۍ. قەرار بییەن دماو کوشتەیچشا زەڕی زیادتەرش بدا. پەوکای دۊخوو دووە بەندکریایەکا دژوارا و پیلانەکۍ دژشا پەڕ تەرسێنۍ، مەزڵوم داغ و عەبدولڕەحمان ئەر ئینۍ چێروو دەساو پەدەکەینە، هەرپاسە پەدەکە وەرپەرسا جە ژیوای و سڵامەتیی هەردوویشا. هەرچیشا سەربۍ، پەدەکە وەرپەرسا.
داوا جە گرڎوو ئەرەمەرزیا دیموکراتیکەکا و گرڎوو کەسە هەستیارا کەرمۍ، وەڵی ئانەینە دێر بۊ، دژوو ئەشکەنجەو ئی دووە بەندکریایاوە کۊشیا و هەوڵەکاشا وزا هەرمانە پەی پارێزنای ژیوای و بەساعیبزانای دووە مانگێرتەکا. پەنەوازا بەپەلە دیدارۍ چەنی هەردوویشا کریۊ و چەمداریی دۊخیشا کریۊ و گۊسشا وەنە گیریۊ. "
س.ز
