کۆمیتەو پەیوەنڎییەکا کەجەکەی ئەرەیاۋناش: کوشتەی محمەمەڎ میرزای، بەشێوەن جە تەسفیە حیساباتو دلېینەو دلۍ دەزگاو پارېزنای، پۍ ئانەی گرڎو ئا تاوانا کە جە دژوو گەلوو کورڎی و نیشتمانپەروەرا کەراشا ئاشکرۍ نەبا.
جە ئەرەیاۋنېوەنە کۆمیتەو پەیوەنڎییەکا کەجەکەی جەبارەو گیان جەدەسدای محەمەڎ میرزای، ۋەرپەرسو ۋەڵینو دەزگاو پارېزنای پەدەکەی جە زاخۆ ئەرەیاۋنانش: پەدەکە دەزگا ڕەسمیەکا هەرێمو کورڎسانی، بە تایبەت ئەنجوومەنو ئاسایشو هەرێمو کورڎسانی، پۍ شارتەیۊ و رەوایەتیدای بە کردەوە تیرۆریستییەکا میتو تورکیای بە کار مارۊ. ئامانجێوە دەزگاو پارېزنای و میتی جە تۆمەتبارکەرڎەی جمیەرەکەیما بە کوشتەی محەمەڎ میرزای ئانەن کە پۊوە گلیای نوێنەرایەتی میتی دهۆکەنە جە کۆکوژکەرڎەی خانەواڎەو مامۆسا "مەلا ئەحمەڎ جەلالەدین"ی پەردەپۆش کەرا. چونکی تۆمەتباری ئەساسی ئی کۆکوژییە دڎانش پانەیرە نیان کە جە ناوەنڎو میتیۊ جە دهۆک ئەمرەو کوشتەیش هۊرگېرتەن.
جە بەشێوە تەرو ئەرەیاۋناکەینە ئامان: حەرپېسە چنی جە بەیاننامەو هێزەکا پارېزنای گەلینە ئامان، تەڤگەرەکەما و گەریلای ئازاڎیی کورڎسانی حیچ پەیوەنڎیېوەش بە کوشتەی محەمەڎ میرزایۊ نییا و گرڎو ئا بوختانا کە ئاراسەما کریا بۍ بنەمېنۍ. بەڵکم قەناعەتما پاسەن کە کوشتەی محمەمەڎ میرزای، بەشێوەن جە حۊڵو تەسفیە حیساباتو دلېینەو دلۍ دەزگاو پارېزنای، پۍ ئانەی گرڎو ئا تاوانا کە جە دژوو گەلوو کورڎی و جە دژوو ئازاڎیوازا و نیشتمانپەروەرا کەراش ئاشکرۍ نەبا. جە شەنگالۊ گېرەش حەتا مەتینا و زاخۆ دەزگاو پارېزناو پارتی هامکاریی تەمامو دەزگاو تیرۆری میتی کەرۊ و چی چوارچێوەیچەنە فرە ئینسانۍ شۆڕشگێڵۍ و نیشتمانپەروەرۍ ئی وڵاتەیە بیۍ بە قوربانی.
دەقو یاۋنەریەکەو کۆمیتەو پەیوەنڎییەکا کەجەکەی:
پۍ رای گرڎی
چنڎین جارېن پەدەکە بەنامۍ ئەنجوومەنو ئاسایشو هەرێمو کوردڎسانیۊ قسۍ چەواشەکارانۍ و پەڕ جە درۊ و دەلەسەی ۋەڵا کەرۊوە و حەر جارێوە حۊڵ مڎۊ بوختانۍ بۍ بنەمۍ ئاراسەو جمیەرو ئازاڎیوازی کورڎسانی کەرۊ. چی ڕۋا دماینە، سەرو گیانجەدەسدای محەمەڎ میرزای، ۋەرپەرسو ۋەڵینو دەزگاو پارېزنای پەدەکەی جە زاخۆ، کە تەڤگەرەکەیما پانەی تاوانبار کەرۊ کە دەسش چی تیرۊرەینە بیەن. بێگومان ئی حۊڵە چەواشەکاریۍ پارتی ۋەڵۍ گرڎ چېۋېنە سووکایەتی کەرڎەین بە عەقڵ و ویژدانو گەلوو کورڎسانی و بە‌کارئارڎەی ئەرەمەرزیا ڕەسمیەکا پانیشتوو کورڎسانین پۍ مەسڵەحەتو سیاسەتی ئەرەگیری و تیرۆری دەوڵەتو فاشیستی تورکیای.
جە وەختېنە کە گرڎو گەلوو کورڎسانی جە سەڎ ساڵەو پەیمانو لۆزانینە ئینا دلۍ گفتۆگۆینە پۍ تەجروبە هۊرگېرتەی جە تاریخی، ۋەرەنگاربیەیۊ ئەرەگیرا و پیلانگێڵا و حېقم کەرڎەی یۊبیەی نەتەوەیی و چی چوارچێوەنە نوێنەرا گەلی کۆنفرانسێوە تاریخیشا جە لۆزانەنە بەست، پەدەکە نەک حەر بەشڎارو ئی گفتۆگۆیا مەبۊ، بەڵکم پۍ بنەوستەو پیلانەکا لۆزانی، جە خواکورک و مەتینانە بیەن بە سەرقەرەوڵ و سوپاو ئەرەگیری تورکی و جە هەمانوەختەنە حۊڵ مڎۊ بە کردەوە و بە قسۍ گولۍ رای گرڎی گەلوو کورڎسانی چەواشە کەرۊ و پەرتەوازەیی ۋەش کەرۊ. بێگومان تەنیا هێزۍ کە ئیسفاڎە چی کردەوا پەدەکەی کەرۊ دەوڵەتو ئەرەگیر و فاشیستی تورکیاین. چونکی پەدەکە دەزگا ڕەسمیەکا هەرێمو کورڎسانی، بە تایبەت ئەنجوومەنو ئاسایشو هەرێمو کورڎسانی، پۍ شارتەیۊ و رەوایەتیدای بە کردەوە تیرۆریستییەکا میتی بە کار مارۊ. ئامانجێوە دەزگاو پارېزنا و میتی جە تۆمەتبارکەرڎەی جمیەرەکەیما بە کوشتەی محەمەڎ میرزای ئانەن کە پۊوە گلیای نوێنەرایەتی میتی جە دهۆک جە کۆکوژکەرڎەی خانەواڎەو مامۆسا "مەلا ئەحمەد جەلالەدین"ی پەردەپۆش کەرا. چۆنکی تۆمەتباری ئەساسی ئی کۆکوژییە دڎانش پانەیرە نیان کە جە ناوەنڎو میتی جە دهۆکۊ ئەمرەو کوشتەیش هۊرگېرتېنە.
هەرپېسە چنی جە قسەکا هێزەکا پارېزنای گەلینە ئامان، تەڤگەرەکەما و گەریلای ئازاڎیی کورڎسانی حیچ پەیوەنڎیېوەشا بە کوشتەی محەمەڎ میرزایۊ نییا و گرڎو ئا تۆمەتۍ کە ئاراسە کریا بۍ بنەمېنۍ. بەڵکم قەناعەتما پاسەن کە کوشتەی محمەمەڎ میرزای، بەشێوەن جە حۊلو تەسفیە حیساباتو دلېینەو دلۍ دەزگاو پارېزنای، پۍ ئانەی گرڎو ئا تاوانا کە جە دژوو گەلوو کورڎی و جە دژوو ئازاڎیوازا و نیشتمانپەروەرا کەراش ئاشکرۍ نەبا. جە شەنگالۊ گېرە حەتا مەتینا و زاخۆ دەزگاو پارېزناو پارتی هامکاریی تەمامو دەزگاو تیرۆری میتی کەرۊ و چی چوارچێوەیچەنە فرە ئینسانۍ شۆڕشگێڵۍ و نیشتمانپەروەرۍ ئی وڵاتەیە بیېنۍ بە قوربانی.
چېگەنە خوڵقە جە رای گرڎی گەلوو کورڎسانی، ئەرەمەرزیا ڕسمیەکا و هێزە سیاسییەکا هەرێمو پانیشتوو کورڎسانی و عێراقی و حەرپاسە رۆشنۋیرا و ئازاڎیوازا کەرمۍ کە جە ۋەران ۋەر پی بوختانا پەدەکەی هوشیارۍ با و ڕا نەڎا کە دەوڵەتو ئەرەگیری تورکیای جە ڕاو پەدەکەیۊ دەزگا ڕەسمیەکۍ هەرێمی پۍ جەنگی دەروونی دژ بە گەلوو کورڎی بەکار بارۊ.
کۆمیتەو پەیوەنڎییەکا کۆما جڤاکێن کورڎسان (KCK)ی
هـ . ش
