هامسەرۆکایەتیی کۆنسەو ڕاوەبەری کەجەکەی، ڕابەرێوە ئازا و گرنگو تاریخو کوردەسانی، قازی محەمەد، وە گەشمەرڎا کۆمکوژی کزڵدەرەیش یاڎۍ ئاردێوە، واتش: "یاڎو ئاڎیشا جە ئەوەکۊشایمانە زیڼە ڕاگېرمۍ".
کەجەکە جە ئەرەیاۋناکەینە ئاماژە پانەی مکەرۆ، قازی محەمەد و هەمڕایاش ئەوەکۊشای ئاڎیشا، سەرو هێڵۊو "وڵاتپارێزنی و قارەمانیەتی و جوامێری" جە لایەنو گەلو کوردیوە ویر وزیاوە، واتش، کۆمارو مەهابادی نوێنەرایەتی قۆناغێوە تاریخیش کەرد دژو ئەرەگیری قڕکەری.
جە ئەرەیاۋناکەینە ئاماژە پانەی کریان، ٣٠ ی ئاداری، جە هەمانکاتەنە ساڵیاڎو کۆمکوژی کزڵدەرەین، جەختکریانۆ کە ماهیر چایان و هەمڕاکێش وەڵێکۊتەیۍ تاریخیشا بەخشا بە جمېەرو سۆسیالیستی جە تورکیانە. جە پەیامەکەنە ئەرەیاۋېیان کە ڕابەر ئاپۆ هەمیشە دارایش جە ئەوەکۊشای ماهیری و دەنیزی و ئیبراهیمەکا کەردەن.
ئەرەیاۋناکەو کەجەکەی ئینەن:
"جە ساڵوەگەڕو جە قەنارەدایشانە، بەڕێز و حورمەتۆ یاڎو ڕابەرێوە گۊرەی و گرنگو تاریخو کوردەسانی، قازی محەمەدی و هەمڕایاش بەرز ڕا گېرمۍ. قازی محەمەد و هەمڕاکێش، بە وڵاتپارێزنی و قارەمانی و جوامێری و فیداکاریی، نامۍ ۋێشا جە تاریخەنە نویستۆ. گەلوو کوردەسانی جە ئیسە و ئایندەیچەنە، بەڕێز و پنەزانایۆ یاڎو ئی کەسایەتییە فیداکارا و ئەوەکۊشایشا مکەرۆوە. جە سەیەو فیداکاریی گۊرەو ئاڎیشانە، هیوا و ئیرادەو ئازادیی گەلوو کوردەسانی زیڼە مەنۆ و گۊرەتەر بیەن، وە یاوا پی ئاستیە. حەرچڼە کۆمارو مەهابادی بە مەڵامەتوو نزیکایەتیی بەرژەوەندیوازانە و نامرۆڤانە و هرووژمو هێزە ئەرەگیر و هەژموونوازەکا جە ماوێوە کوڵەنە وڕا، بەڵام جە ئەوەکۊشای گەلو کوردەسانینە دژو ئەرەگیری قڕکەری نیشانۍ قۆناغێوە تاریخیا. قازی محەمەد و هەمڕاکێش بە هەڵوێسەکەیشا ۋەرا ۋەر بە هرووژمەکا، بە سەر نە کۊمنایرە و سازش نەکەردەیشا، بیۍ بە داراو پێگېوە گۊرەی جە نوێنەرایکەردەی و درێژەدای بە نەریتو ئەوەکۊشای کوردەسانی. مېڎانو چوارچرای جە زەینو گەلو کوردەسانینە بی بە یاگێوە فرە قووڵ. یاڎو قازی محەمەدی و هەمڕایاش جە ئەوەکۊشای ۋێمانە زیڼە ڕاگێرمۍ و مەرامەکاشا بەدی مارمۍ. سەرو ئی بناغەیە قەولما پەی گەشمەرڎا واوەی مکەرمېوە.
هامکاتەنە، ئارۆ ساڵوەگەڕو گەشمەرڏە بییەو ماهیر چایان و هەمڕایاشا جە کزڵدەرەنە. بەبۆنۆ ساڵوەگەڕو گەشمەرڏا کۆمکوژی کزڵدەرەی، بەڕێزۆ یادو ماهیر چایانی و هەمڕێیاش مکەرمێوە. یۆ جە سەرمەشقە تەریخییەکا جمیەرەو سۆسیالیستو تورکیای، ماهیر چایان و هەمڕێیاشا، بێگومان بە ئەوەکۆشایشا ئەنجامی گۆرەشا خوڵقنا. جە ڕوانگەو تاریخیۆ ئەوەکۆشای سۆسیالیسشا جە تورکیانە بەرەو وەڵێ بەرد، دژو ئەرەگیری بە خوڵقناو هۆشیاری و هەڵوێسو ئەوەکۆشای هامبەشو گەلا، دەورێ گۆرەشا گێڵنا. پۆکەی ڕابەر ئاپۆ سەرو بناغەو ئەوەکۆشای ماهیر و دەنیز و ئیبراهیمەکا، بێگومان جە سەردەمو ئارۆینە، ئا ئاستەی کە گێڵای شۆنەو ژیوای ئازادی و یەکسانی گەلا و ستراتیژو ئەوەکۆشای هامبەشی پنە یاوان، سەر ئەنجامو ئی ئەوەکۆشاییە تاریخییە. جا بڕوێنمێ، دڵسۆزی پەی یادو ماهیر چایانی و هەمڕێیاش، بە وەڵوستەی ستراتیژو ئی ئەوەکۆشایە و گێڵای ژیوای ئازاد و هامبەشو گەلا بۆنە. بانگەوازو ئاشتی و گلێرگەی دیموکراتیکو ڕابەر ئاپۆی، هەمان بانگەوازو کۆمارو دیموکراتیکی و وڵاتی ئازادا کە ماهیر و دەنیز و ئیبراهیمەکێ پەیش ئەوەکۆشێنێ".
