پەرلەمانتارێوە دەم پارتی، جە پەرلەمانوو تورکیاینە بە وەرپەرسا دەوڵەتوو تورکیش وات: شمە کەسانێوە تیرۆر کەردۍ، کە مەتاوا چۍ بژیۋا و مەتاوا بە مەڵامەتوو فشارەکاوە چۍ درێژە بە سیاسەتی بڎا و تەنیا سەروو بەکارئاردەی مافە دیموکراسییەکاشا زینڎانی کریا.
گولستان کلیچ-ە، پەرلەمانتارەو دەم پارتی، جە میانوو پێشکەشکەردەو وتارێوەنە دلۍ پەرلەمانوو تورکیاینە وێنەو دکتۆر عەبدولقادر سەبری تۆپراقیش بەرزکەردۆ، کە ڕۊو پەنج شەممەی جە تەرەفوو دەوڵەتوو تورکیایۆ سلێمانینە گەشمەرڎە کریا .
ئا پەرلەمانتارۍ دەم پارتى، جە قسەکاشەنە ڕووەشکەردە وەرپەرسا دەوڵەتوو تورکی و واتش، شمە کەسانێوە تیرۆر کەردۍ، کە مەتاوا چۍ بژیۋا و مەتاوا بە مەڵامەتوو فشارەکاوە چۍ درێژە بە سیاسەتی بڎا و تەنیا سەروو بەکارئاردەی مافە دیموکراسییەکاشا زینڎانی کریا.
باسش چانەیچ کەرد، ئانەی سلێمانىنە ڕووەشدا یووەم زنجیرەو کوشتەى ئا کەسا نییا، کە تورکیاشا جیائاستەن.
وێرەگاو پەنج شەممەی، جە ۋەرا ۋەروو واردنگێوەنە شاروو سلێمانینە، هاموڵاتیێوە بەنامۍ عەبدولقادر سەبری تۆپراقی گەشمەرڎە کریا، کە بە مەڵامەتوو فشارەکا دەوڵەتوو تورکیوە پێسە پەناهەندەی جە پانیشتوو کوردسانینە ژیۋۍ.
بنەیانەکەشا ئاماژە پانەی کەرا کە کوڕەکەشا جە تەرەفوو دەوڵەتوو تورکیوە گەشمەرڎە کریان.
وەڵتەرێچ چن چالاکۍ و سیاسەڎمەدارۍ تەرۍ سەرنیشتوو کوردسانینە کە بەمەڵامەتوو فشارەکا دەوڵەتوو تورکیوە ڕووەشا جە پانیشتوو کوردسانی کەردەبۍ، جە شارەکا سلێمانی، هەولێری و دهۆکینە تیرۆرکریێبێنۍ.
