كۆمیته‌و زینڎانیا په‌كه‌كه‌ی و پاژكی گەشمەرڎۍ ١٤و ته‌مووزیشا یاڎکەرڎۍ
كۆمیته‌و زینڎانیا په‌كه‌كەی و پاژكی جە ئەرەیاۋنېۋەنە، مدرامانو ڕۊچۍ مەرڎەی گۊرۍ ١٤و ته‌مووزی م. خه‌یری دورموش، كه‌مال پیر، عاكیف یڵماز و عه‌لی چیچه‌ك-شا یاڎکەرڎېۋە.
جە ئەرەیاۋناکەنە ئامان، بۊنەو ئا یاڎیۊ، سه‌ره‌تا جە كه‌سایه‌تی گەشمەرڎا ١٤و ته‌مووزی م. خه‌یری دورموش، كه‌مال پیر، عاكیف یڵماز و عه‌لی چیچه‌كی، گرڎو گەشمەرڎا زینڎانه‌كا به ۋەشەویسی، ڕێز و پنەزانایۊ یاڎ کەرمېۋە، جارۍ تەر وەعد واوەی کەرمېۋە کە خۊتانکەرڎەی جە یاڎه‌وه‌رییه‌كاشا کەرمۍ و ئامانجه‌كاشا بیاۋنمۍ بە سه‌ركۊتەی.
ئەرەیاۋناکە پی جۊرە ۋەردەوام بۍ:
"مدرامانو ڕۊچۍ مەردةی گۊرەی ١٤و ته‌مووزی كه ٤١ ساڵېش ۋیەرنا، چا وەختۊن کاریگەریش سەرو پرۊسەو کۊشیایما نیانەرە، بی بە سەرچەمەی ئەساسی گۊره‌كەرڎەی مدرامانیما جە دژوو فاشیستی، پېسە خەتەو سەرکۊتەی و گیانو مدرامانی ئارۊیچ دلۍ گه‌ریلاکانە خەتەو گیانبازی ئینا ئاستېۋە باڵانە جە زینڎانه‌كانە جە مدرامانی شكۆمه‌نڎانه‌و هامڕایاما دژ بە ئه‌شكه‌نجه و فشاری دژواری، جە هه‌ڵۋێسی پا گیرانەو گه‌له‌كه‌یما ۋەران ۋەر بە گرڎو هجومەکا هه‌نگامە پۍ دمای مەنیۊ و پېسە ڕۊو یۋەمی ۋه‌رده‌واما.
"جە ڕۆحو ١٤و ته‌مووزینە بۍ هیوایی یاگېش مەبۊۋە"
ۋەڵۍ گرڎ چېۋېنە، وه‌فاڎاری به ئامانجو قەراردای پۍ سه‌ركۊتەی، بە ڕېکوستەی کەرڎەی ئینەی، هەنگامەو یۋەمو سه‌ركۊتەین. خەتەو سەرکۊتەی كه جە كه‌سایه‌تی مدرامانو ١٤و ته‌مووزینە به‌رجەسه بی، پەشتیش به وه‌فاڎاری به باوه‌ری و لایه‌نی ڕۆحی، فكری گۊرە، هۆشمه‌نڎی ڕاس، هه‌ڵۋێسی پاگیرانە و ڕاسی جه‌نگاوه‌ری به‌ڕێكوستە كریای به‌ست و سه‌ركۊت. نه به ده‌ره‌فه‌تی ماڎیی و هه‌لومه‌رجی گونجیا. به پێچه‌وانۊ نه‌بیەی ده‌رفه‌تی و هه‌لومه‌رجه‌كېش پۍ ۋېش کەرڎۍ بە بنەماو مدرامانی و سه‌ركۊتەی. ئانەیچ ڕێبازو ڕابەرایەتین و حه‌ر جە سه‌رتاوه بی بە كاراكته‌رېۋە ئەساسی جمیەرەکەیما. ئا ڕێبازه‌ی كه ڕابەرایەتی به ۋاتەی "سەوزبیەی گوڵێۋە سەرو تەۋەنۍ" پێناسه‌ش کەرڎ، جە مدرامانو ١٤و ته‌مووزینە بی بە حېقم تەرین بەربڕیەی كرداری.
جە رۆحو مدرامانو ١٤و ته‌مووزینە حیچ یاگېۋە پۍ بۍ هیوایی نییا. پۍ ئامانج و هیواكاش ۋېش فیڎا کەرۊ، ڕۋە کەرۊ سەرکۊتەی. به ڕۆحو مدرامانو ١٤و ته‌مووزیۋە حیچ مه‌جالێۋە پۍ بێده‌رفه‌تی نییا. به‌پێچوانۊ دلۍ ئا حۊلانە سه‌ره‌ڕاو نه‌بیەی ده‌رفه‌تی، ئێراڎه‌و كه‌سانۍ به‌ڕێكوستەکریای متاۋۊ بە گرڎ جۊرۍ ده‌رفه‌ت و هێز خوڵقنۊنە. ڕۆحو مدرامانو ١٤و ته‌مووزی جۋابو ئا پرسیارېنە كه چنی ژیۋایۍ شكۆمه‌نڎانه بژیۋمۍ. گیانو مدرامانو ١٤و ته‌مووزی، تاۋنایۊ خانه به خانه‌و ئا هۆگرانه كه متاۋا بۊنەشۊ مرا، لوتكه‌و ژیاین به هه‌ستو قه‌رزاری گه‌له‌كەیما و ڕۆحو مدرامانو ١٤و ته‌مووزی به‌رزتەرین ئاستی وه‌فاڎارییا پۍ ڕابەر ئاپۆی، گەشمەرڎەکېما و خه‌ڵكە قاره‌مانەکەما، بەقوەتتەرین نیشانۍ پا گیری و ماناڎاری ئینەنە. حەرپۊکەی ١٤و ته‌مووزی جە لایەنو گه‌له‌كەی ما‌وه پېسە "ڕۊو شكۆمه‌نڎی نه‌ته‌وه‌یی" ئەرەیاۋیا و ماناڎار كریا.
"مدرامان، سەرو خەتەو سەرکۊتەی ١٤و ته‌مووزی ملۊڕاۋە
ئارۊ ده‌وڵه‌تو فاشیستی توركی به پەشتیوانی دماکۊتەیی جەهانی و مەنتیقەکەی و خیانەت و نۆكه‌را، به ۋەڵېکۊتەی تەکنیکو جەنگی سه‌ڎه‌و ٢١ی، گەرەکشا هجومە جینۆسایدییه‌كاش جە دژوو کۊشیای گه‌لوو ئێمه بیاۋنۊ بە سه‌ركۊتەی. جە ۋەران ۋەرو ئینەینە سەرو ئەساسو مدرامانو ڕابەریما جە ئیمرالی، جە گرڎو مېڎانەکانە کۊشیایۍ داستانی و قاره‌مانانه سەرو خەتەو سەرکۊتەی ١٤و ته‌مووزی ملۊڕاۋە و سیاسه‌تو دلېنەبەرڎەې كه جە لایەنو دوژمنیۋە ملۊراۋە، بۍ كاریگه‌ر و بۍ ئه‌نجام کەرۊ. گیانو مدرامانی و خەتەو سەرکۊتەی ١٤و ته‌مووزی كه فاشیزمو ١٢و ئه‌یلولیش دلېنەبەرڎ، ئارۊ تەنیا ڕۆح و ڕانە، كه سەرو ئەساسو ئازاڎیی جه‌سته‌یی ڕابەرەکەیما، گه‌له‌كه‌یما ئازاڎ کەرۊ، توركیا و ۋەرکەوتوو میامینی دیموكراتیك کەرۊ. حەر پۊکاتی ماچمۍ به گیانو مدرامانو ١٤و ته‌مووزی ده‌سما پنەکەرڎەن، پا گیانه‌یچ سەرکۊتەی ئێمه و گه‌له‌كەیما و گه‌لا تەریچ به‌دی مۍ".
هـ . ش
