هێزەکاو پارێزنای کۊمەڵایەتی (هەپەجە- ژەنی) جە سەرنیشت و وەرکەوتوو سوریاینە ڕۊو جومعەی کۊنفڕانسوو دووەموو وێشا بە بەشداریی نوێنەراو یەپەژەی، دەسەو ژەنە وێڕاوەبەرا و هەزار و ٦٠٠ نوێنەرا هەپەجە- ژەنۍ بەست. کۊنفڕانسەکە بە دروشموو "بە گیانی فیدایی هەدیە، یوسرا و ژەنا جەنگوو گەلی شۊڕشگێلنی کەرمۍ. گۊشەگیری ماڕمۍ و سەرکەوتەی مسۊگەر کەرمۍ” جە هۊڵوو سەرڎەموو شاروو حەسەکەینە لوا ڕاوە.  

وتاروو کەرڎەیۊ کۊنفڕانسەکەی لاو ئەنداماو فەرماندەیی یەپەژی ڕۊژهەڵات عەفرینێوە پێشکەش کریا. رۊژهەڵات عەفرینە جە ئەوەڵۊ گەشمەرڎاو شۊڕشوو ١٩ تەمووزیش یاڎۍ کەرڎێوە و ئەرەیاوناش، کە جە ئەوەڵۊ چەخماخەو شۊڕشی دریا وەنە، هەپەجە- ژەنی هێزی سەرەکیی وێپارێزنای بۍ، کە مۊرەو وێش وەنەو ئا شۊڕشی دا.

رۊژهەڵاتە واتش، "ئێمە کناچۍ ئا ئەدایانمۍ، کە پەی پارێزگاری جە هەرێمەکەی و خاکەکەیشا گەشمەرڎۍ بیۍ، ڕاویارۍ و شۊنکەوتۍ ڕێبازیش بیمۍ تا یاوای بە ئامانج و وەرمەکاشا".

دماتەر ورسەنگنایەکاو ڕابەروو گەلوو کوردی عەبدوڵا ئۊجالانی بارەو ژەنۍ و وێپاریزنایۊ ونیاوە. هامسەرۊکوو جمیەروو گلێرگەی دیموکراتیک (تەڤ-دەم) ڕوکەن ئەحمەد-یچ قسێش کەرڎۍ و سەرجەموو گەشمەرڎاو شۊڕشیش یاڎۍ کەرڎێوە و واتش "ئا هامڕۍ کە ڕسمەکێشا ئینۍ پەشتەو سەرەیماوە، پەی ئی خاکەیە و دەسکەوتەکاش گەشمەرڎۍ بیۍ. هامڕێما خاسخاس مزانا کە جە ساڵەو ٢٠١٨ دەوڵەتوو تورکی ئەرەگیری هجوومش کەرد سەرووعەفرینی. هامڕا فاتمە و ئەڎ‌‌اوهۊگری کە ئەندامۍ هەپەجەی بێنۍ، پەی وەرگێرتەی پا هجووما گەشمەرڎۍ بیۍ”.

روکەن ئەحمەد باسوو ئانەیچش کەرد، کە پەی ماڕای هجوومەکاو سەروو هەرێمەکەی مشۊم گرد کەس وێش بە ساعیبوو شۊڕشی و هەقیقەتوو گەشمەرڎا و دەستکەوتەکا بزانۊ.  

ئەندامەو دەسەو ڕاوەبەریی کۊنگرەو ستاری سەرنیشت و وەرکەوتوو سوریاینە والیدە بۊتییە بە بۊنەو بەستەی کۊنفڕانسەکەیۊ مەبارەکباییش کەرد و واتش، "بە قۊناغێوە دژوار و هەستیاررە ویەرمی. دوژمن بە گردوو قوەیشۊ هەوڵۍ مدۊ ماڕۊما، گۊشەگیری سەروو ڕابەر ئۊجالانیوە دژوار کەرۊ و بەرڎەواما جە هجوومەکاشنە پەی سەروو ئێمە. پەوکای مشۊم پێسە شۊڕشگێڵنۍ وێما ڕێکۍ وزمۍ تا گۊشەگیریی سەروو ڕابەرایەتیما ماڕمۍ و هەرێمەکەیما بپارێزنمۍ”.

دماو وتارەکا ڕاپۊرتە بارەو دۊخوو ڕێکوستەی و ڕاپۊرتەو هەرمانوکاروو دووە ساڵی ویەرڎەو هەپەجە- ژەنۍ سەرنیشت و وەرکەوتوو سووریاینە ونیێوە و بەڵگەفیلمێوە سەروو خەباتوو هەپەجەی نمایش کریا. دماتەر پەیڕەوو دلێنەو هەپەجە-ژەنۍ ونیاوە و گفتوگۊش بارەوە کریا.

کۊنفڕانسەکە بە بەرکەرڎەی بڕۍ قەرارە پەیوەسا بە گرنگیی پارێزنای جەوهەریوە پەی ژەنا دماییش ئاما.  

س.ز