دیوانو هامسەرۆکایەتی کۆنگرەو گەلی بۊنەو کۆچی هەقەتینو ڕامېیاریمەدار حاجی ئەحمەدییوە پەیامێوە سەرەوەشیش وەڵاکەرڎۆ. جە پەیامەکەنە، سەرەوەشی جە بنەیانەو حاجی ئەحمەدی و پەژاکی و کەنەکەی و گەلوو کوردەسانی مکەرۆ.

جە پەیامەکەنە ماچۆ: "پېسە کۆنگرەو گەلی و گرڎو دۆسە دڵسۆزەکاش، بە کۆچی هەقەتینو هەڤاڵ حاجی ئەحمەدی فرە خەمبارۍ بیەیمۍ. کۆچیی هەقەتینو هەڤاڵ حاجی ئەحمەدی جە دەسدایۍ گۊرەبۍ پەی گەلوو کوردەسانی".

جە پەیامەکەنە سەرنج وزیا سەرو ئەوەکۊشای حاجی ئەحمەدی پەی ئازادی کوردی و کوردەسانی، تەئکیدکریانۆ کە حاجی ئەحمەدی جە تەمەنو جوانیشۆ تا دما ساتەکاو ژیۋایش، گرڎو تەمەنیش وست خزمەتو ئازادیی گەلوو کوردەسانیوە، ماچۆ: "پېسە جوانێوە ئەندامو یۊبیەی خۊنکارا کوردی جە ئۊروپانە، کۊششی وڵاتپارێزنیش کەردەن. چنی دکتۆر عەبدولڕەحمان قاسملووی جە ڕاوەبەردەی حیزبو دیموکراتو کوردستانو ئێرانینە یاگێش گێرتە".

هەرپاسە سەرنج وزۆ سەرو دەور و بەشداری حاجی ئەحمەدی جە ئەرەمەرزنای پەرلەمانو کوردەسانی جە جبەرو وڵاتی، ئەرەمەرزنای کۆنگرەو نەتەوەیی کوردەسانی (کەنەکە)ی، ئەرەمەرزنای پارتو ژیۋای ئازادی کوردەسانی (پەژاک)ی، ماچۆ: "هەڤاڵ حاجی ئەحمەدی جە یووەمین کۆنگرەو پەژاکی، پېسە سەرۆکی گرڎی هۊرچنیا. پەی چارەسەری پرسو گەلوو کوردی، پەی ئازادی گەلوو ۋەرکۊتوو کوردەسانی، بە جۆش و دڵسۆزیۆ ئەوەکۊشان.

گرڎو ژیۋایش پەی ئازادی گەلوو کوردەسانی کۊشش کەرڎ. ئینسانێوە سادە و دڵسۆزو گەلەکەیش بۍ. ئامانج و داوێوە شەخسیەش نەبۍ. پۊکەی جە زېڵۍ گەلوو چوار پارچەو کوردەسانینە یاگێش گېرتە و وەشەسیابۍ.

پېسە ئەوەکۊشای ئازادی و گرڎو هەڤاڵا کاک حاجی ئەحمەدی، قەول مڎەیمۍ جە ئەوەکۊشای ۋێمانە ۋێش و مەرام و وەرمەکاش زیڼە ڕا گێرمۍ. سەرو ئی بنەمایۍ، دیسان سەرەوەشی جە بنەیانەکەیش و پەژاکی و گرڎو دۆس و هەڤاڵاش و گەلوو کوردەسانی مکەرمۍ، هامبەشۍ خەمباریشانمۍ".