ئیستەنبوڵەنە سەدان هەزار کەسێ بەشدارێ بێنێ جە مەراسیمو نەورۆزینە جە مێڏانو یەنیکاپینە بە سەرمەشقایەتی هەدەکەی. مەرسیمەکە بە جۆشۆ بەردەواما.

گوڵتان کشاناکە: شمە تاریخ منویسدێوە

چالاکوانێ تەڤگەرو ژەنە ئازادا (تەژەئا)ی گوڵتان کشاناکە واتش: "شمە ئارۆ تاریخی منوستێوە، کورد گرڏ لێوە ئەرەپڕان و داواو ئازادیی وێش مکەرۆ".

گوڵتان کشاناکە جەختش کەردۆ مشۆم ڕابەر ئاپۆ ئازاد بۆنە تاوەکو پرۆسەکە سەرکۆتە بۆنە، واتش: "ئێژا ئۆجالان بانگەوازش کەرد پەی ئاشتی و گلێرگەی دیموکراتیکی. جوانێ ڕاو سیاسەتو دیموکراتیکی مکەراوە. ئێمە ئاشتیێ شکۆدارما گەرەکا. گەرەکمانە بیمێ هاموڵاتیێ یەکسان. فشار سەرو زوان و کلتوور و شناسنامەیما دمایش پنە بێ".

هەرپسە واتش: " ئێژا ئۆجالان پەی هامپەیمانێتی کوردی_تورکی بانگەوازێوە گرنگش کەرد. ئیسە کاتو ئانەین ئەنقەرە هەنگامە بنیۆنە. مشۆم ئەنقەرە دەنگو گەلا و دەنگو وەرنیشتی پارێزنۆنە. ڕا پەی ئێژا ئۆجالانی بکەراوە، تا ئایندێوە ئازاد و یەکسان بنیاد بنیۆنە".

پەرلەمانتارو دەم پارتی کەزبان کۆنوکچو قسێش کەردێ و ناڕەزایەتیش بەربڕی وەراوەرو زینان کەردەو ئیمام ئۆغلوی.

کەنعان ئۆغلو  ناڕەزاییش وەرا وەرو قسەکا یاڤاشی بەربڕی

هام واتەواچو هەدەکەی عەلی کەنعان ئۆغول ناڕەزایەتیش وەراوەرو قسەکا سەرۆکو شارەوانی ئەنقەرەی مەنسوڕ یاڤاشی بەربڕی واتش: "هیزی جە ساراچانەی ئاژاوەگێڵی بەرکەوت. خاسا کاتێ ڕۆڵێ کوردی شێلیێنێ، چی دەنگت نەبێ؟ جیاکاری، هەرمانەو ئایشانە. ئێمە دژو ئی کودەتانمێ. جە ساراچانە بەشدارێ بێنمێ. ڕا بە تۆچ نمەرەیمێ. ئی نەورۆزە، نەورۆزو خاوەندارییا جە ئاشتی و گلێرگری دیموکراتیکی".