ئەنجومەنوو کۆنگرەو ستاری بە بۆنەو ساڵیادوو ٢٨ەمینوو چالاکیی گیانبازیی گەشمەردە زیلان (زەینەب کناجی) ئەرەیاوناێوەش وەڵا کەردۆ، دلێشنەنە ئامان، "وەعدوو ئێمە ئانەنە کە بە فەلسەفەو ژیواێوە، کە گەشمەردە زیلانێ پەی ئێمەی دیاری کەردەن شۆڕشەکەیما بکەرمێ بە یانەو گردوو ژەنا و جمیەرە دیموکراسیواز و یەکسانیوازەکا".

ئەرەیاونایەکەینە ئامان:

" ٢٨ەمین ساڵیادوو گەشمەردەبییەی سەرمەشقەو ڕەفاقەتی، وەشەسیای و ژیوای ئازادی، ئێمە سەرجەموو ژەنە گیانبازا و کۆشیایا ئەرەپڕای، سەرەوردای و شۆڕشوو کوردستانی بە ڕێزۆ یاد مارمێوە، جە کەسایەتی و یادوو گەشمەردە زیلانێنە دا باڵاما حاسوو یادیشنە بە شانازییوە مکۆمنمێرە. پێسەو ئەنجومەنوو کۆنگرەو ستاری گرد وەختێوی مدرامانما سەروو بیردۆز و خەتەو گەشمەردە زیلانێوە هەنگامەما نیێنە و پەی سانایوە هەقەو هامڕایاما ڕۆ دماو ڕۆی سەرکەوتەی و دەسکەوتێ گەورێما بەدەس ئاردێنێ. سەروو ئا بنەمێ وەعدوو ئێمە ئانەنە، کە بە فەلسەفەو ژیواێوە کە گەشمەردە زیلانێ پەیما دیاریی کەردەن شۆڕشەکەیما بکەرمێ بە یانەو سەرجەموو جمیەرە دیموکراتیک و یەکسانیوازەکا.

مانگەو حوزەیرانی تارێخوو کۆشیایمانە مانگێوەنە، کە یاگێوی مەبارەکەش هەنە، وەروو ئانەیە مانگەو گەشمەردە گیانبازامانە. پەوکای پەی خاوەنداریی جە یادیشا و ئاواتەکاو گەشمەردا هەرمانە و وەرپەرسیی ئێمە ئانێنە، کە وەراوەروو ئا سیستمانە، کە  گرد وەختێو دوژمنایەتیی ژەنە زانایا و ئازادا مکەرا، کۆشیای بیاونمێ بەرزتەرین یاگێ.  

گەشمەردە زیلانە وەڵێ ٢٨ ساڵانە بە ئامانجوو پارێزنای و وەڵێوستەی ڕێبازوو کۆشیای دژوو تەماموو  ئەقڵیەتەکا کە گەرەکشابێ بە پلانەی چەپەڵە بییەی ڕابەرایەتیی گەلوو کوردی جە ڕووەو جەستەییوە پاکتاو بکەرا چالاکیی گیانبازییش کەرد، بییە بە هێما و جەنگاوەریی جمیەری و ژیوای ماناداری.

پەی ئێمەی ژەنا پێسەو سەرمەشقاو بیردۆزوو ڕزگاریی ژەنا، کە گەشمەردە زیلانێ بە چالاکیی وێش بناغە و بنەماکێش دیاریێ کەردێ، هەرمانەی سەرەکییەمانە، کە مشۆم پێرسپێکتیڤەکاو ژیوای شکۆمەندانەی و ئازادی جە گرد وەختێ زیاتەر بیاونمێ یاگێ. وەروو ئانەیە دلێ ژیواێوەنە، کە بە هۆشمەندیی پیاسالاری مکریۆ ژیوای پەی ژەنا تەسک و گولانەن، ئەرکا سەرما کە  گرد وەختێ و بە پاگێرتەیرەی و مەعنەویەتێوی فرە گەورەوە سەروو خەتەو زیلانەکاوە وێگێری بکەرمێ و گرد ڕوێ بە چالاکیی گیانبازی، ڕۆحووکۆشیای گەشتەر بکەرمێ. پەوکای بە درێژایی تارێخوو ژەنا گرد وەخت میراتوو مدرامانی پەی خاوەنداریی ئەندێشە، خەتەو داواکاریی ژەنە جەنگکەرا و وێگیرانە پەیجوریی ئازادی و بەدەسئاردەی مافەکاشا بە ڕۆشنایی ئادیشا درێژەش پەنە دریان.

وەختێو ڕابەرایەتی وزەڕەکەما لاو دوژمەنیوە ڕووبەڕوو هجووموو قڕکەردەی و دلێنەبەردەی بییەنۆ، چالاکیی هامڕا زیلانێ جوابوو ئانەیە بێ، کە ئێمە گرد وەختێ بیمێ و کەس نمەتاوۆ ئیرادەو گەلی و بییەیما بەرۆ دلێنە. پەوکای ئارۆ تاریخوو جمیەروو ئازادیینە، هەرپاسە تاریخوو ژەنێ ئازادێنە، گەشمەردە زیلانە مانیفیستۆو بەیاگەیاونای پیمانەکاو وەڵاتپارێزنیی ڕاسی و خاوەنداریینە جە ژیوای شکۆمەندانەی و ئازادی، خەتەو زیلانەکا پێسەو ژەنێ ئینا سەروو ڕێبازوو حەقیقەتوو خەتەو وێبییەیوە.

پەوکای تا وێما بیاونمێ بنچینەو جەوهەروو شۆڕشگێڵنیی ماناداری پەنەوازا، کە گرد وەختیو بە ئەندێشە و ئەرەمەنەی گەشمەردە زیلانێوە بژیومێ و بیاومێشەنە. چی وەختەنە کە ئێمە دلێ شۆڕشوو وەرنیشتینە مژیومێ  چند دەسکەوتێما با ئاندەیچ ئیرادە و مەیلوو ژەنە سەرمەشقا لاو دەسەڵاتیوە بە ئامانجوو ئانەیە ژەنی نەبانە سەرمەشقێ فاڕیای و ورچەرخیای مکریانە ئامانج. تا ئێمە بیمێ بە شایەنێ بیردۆزوو ئازادیی ژەنێ، بە شێواز و رێبازوو زیلانەکا مشۆم وێگیری بکەرمێ، رێکوستەیما وەرفراوان بکەرمێ و ئامێزە پەی سەرجەموو ژەنا بکەرمێوە، تا کۆنفیدڕالیزمی دیموکراتیکیوو ژەنا مەرزنمێرە و ڕاو یادوو گەشمەردە زیلانەێوە پەیاموو وێما بیاونمێ گرد یاگێ و گرد کەسێو.

تا ئێمە هجووم و کردەوە داگیرکەرییەکا کە جە کەسایەتیی حکومەتوو ئاکەپەینە سەروو کوردستانیوە پیادە مکریانێ و گۆشەگیریی دژوار سەروو ڕابەرایەتیما پووچەڵ بکەرمێوە و دماییش پەنە بارمێ، ئێمە داوا جە گردوو ژەنا مکەرمێ کە بانە بە تەلەبێ فەلسەفەو زیلانێ، ئێمە بە پاو پێرسپێکتیڤوو ئادێ، کە جە ئێمەش گەرەکا کۆشیای و هێزوو وێما یۆ بوزمێ. ئێمە دەوروو ژەنا کە چندین ساڵێن ئەقڵیەتوو تاتەسالاریی ماڕان،  جارێوی تەر بە ڕۆحوو "ژەنی، ژیوای، ئازادی"یوە گرد یاگێوەنە تازە بکەرمێوە و ئازادیما جە گرد ڕوێوە یەکەوە مسۆگەر بکەرمێ. گەشمەردە زیلانە واتەنش، ' ئازادییی پەنەوازییش بە جەنگکەردەی هەن'، تا بتاومێ خاس جەنگ بکەرمێ، پەنەوازا خاس وێما ڕێک بوزمێ. وەختێ هێزوو وێما ڕێک وست ئا وەختە  متاومێ باس جە ئیرادەی قەوەتوو وێما بکەرمێ، بجووڵیەیمێوە  و بکۆشیەیمێ".