کۆنسەو ڕاوەبەری کۆنگرەو نەتەوەی کوردەسانی (کەنەکە) بۆنەو جەژنەو ڕەمەزانیوە ئەرەیاۋنێوەش وەڵا کەرڎۆ. ئەرەیاۋناکەو کەنەکەی پی جۆرەنە:

"سەبای جەژنەنە، جەژنەو ڕەمەزانیەنە. جەژنەو ڕەمەزانی جە زینانیا، جەنگەوانا ئازادیی، گەلوو کوردەسانی و گرڎو جەهانیی ئیسلامی مبارەکە مکەرمۍ. هیواڎارێنمۍ جەژنەو ڕەمەزانی بۆ بە مایۍ ئاشتی و ئارامی جە وڵاتەکەمانە و جە سەرانسەرو جەهانینە.

ئیساتۍ ئینایمۍ سەرەتاو وەهارینە، ئێمە ئینایمۍ حەفتەو نەورۆزینە، بە جۆش و خرۆشێوە گۊرۆ جەژنەو نەورۆزیما جە سەرانسەرو کوردەسانی و جبەرو وڵاتینە مبارەکە کەردە. نەورۆزو  ئېساڵی به‌ تایبه‌تی جە ۋەرکۊت و سەرنیشتەنە پېسە سه‌رهۊردایۍ مبارەک كریا. بە کەیف و سەفاو نەورۆزیوە پێشوازی جە جەژنەو ڕەمەزانی مکەرمۍ.

جە سەرنیشتوو کوردەسانینە ماوێوەن گفتوگۆ جە مابەینو دۊڵەتو تورکیای و تەڤگەرو ئازادینە هەن، بەڵام تا ئیساتۍ جگە جە قسا حیچ هەنگامێوە نەنریێنە. هەرپاسە جە ۋەرنیشتوو کوردەسانینە پرۆتۆکۆلێوە جە ما بەینو ئیدارەو ۋېڕاوەبەری دیموكراتیکی و ئیدارەو دیمەشقینە ئیمزا کریا. هومێڎەوارۍ هەنمۍ ئا گفتوگۆ کە جە سەرنیشت و ۋەرنیشتەنە دەسش پنە کەرڎەن بیاوۆ بە ئەنجامێوە ئەرێنی و پرسەکۍ هەردووە بەشو کوردەسانی بە شێوێوە ئاشتیانە چارەسەرۍ بکریا.

بەڵام هەڵای، ئاژێوە ئاڵۆز جە وڵاتو ئێمەنە هەن. جە سەرانسەرو کوردەسانینە ئەرەگیری و هەڕەشۍ و تۆقنای جە گەلەکەیما جە لایەنو دوژمناوە بەردەواما. جە ۋەرکۊتوو کوردەسانینە فشارو دۊڵەتی پەی سەرو گەلی بەردەواما و گرفتە کۆمەڵایەتییەکۍ ڕۆ دماو ڕۆی قووڵتەرۍ باوە. گرفتە ئابووری و کۆمەڵایەتییەکۍ جە پانیشتەنە بەردەوامێنۍ، گرفتۍ ناوچە ئەرەگیرکریاکا هەڵای چارەسەر نەکریێنۍ، هەرپاسە هرووژمەکۍ دۆڵەتو تورکیای زیاڎشا کەردەن‌. پەنەوازا گرڎو هێزە کوردەسانیەکا جە دژو ئا هەڕەشا و هرووژما مرداوە.

بۆنەو جەژنێوە جارێوەتەر تر جە گرڎو کورد و کوردەسانیا مکەرمۍ جە دژو هرووژم و ئەرەگیری مرداوە و دەنگو ناڕەزایی ۋێشا جە دژو ئەرەگیرا بەرز بکەراوە و یەکڕیزیشا هێقمتەر بکەرا.

تەنانەت چی هەلومەرجەیچەنە هیواڎارێنمۍ و باوەڕیما چامنەنە کە گەلەکەما پی زووانە سه‌رو خاكو ئازادو ۋێشۆ جه‌ژنە مەراسیمەکاش بە ئارامی و ئاشتی و ئازادی گێڵنۊنە. پی بۆنۆ جارێوەتەر مبارەکبایی جەژنەو ڕەمەزانی جە گرڎو زینانیا، جەنگەوانا ئازادیی، گەلوو کوردەسانی و گرڎو جەهانیی ئیسلامی مبارەکە مکەرمۍ.."