وێرەگاو ئارۆی یەکشەممە سەنتەروو ڕۆشنویریی کەرکووکی، چالاکییێوەنە بە دروشموو (هونەرمەندێ شێوەکارێ.. سۆز و سەداو شکور خەیاتی ڕەنگمج کەرا)، بەمەبەسوو بەرزئرمانای ئا خزمەتەیە کە هونەرمەند "شکور خەیات" کەردەنش بە هونەری ڕەسەنوو کوردەواری بەینشنە هونەروو مەقامواچی، نیشانگێوە ڕسموو فۆتۆگرافی و شێوەکاری ساز کریا، کە دلێشنە یاڎوو ئا کەڵە هونەرمەندەیە ئرمانیا.

چالاکییە هونەرییەکە لاو سەندیکاو هونەرمەنداو کوردستان- لەقوو کەرکووکیوە، بە بەشداریی مامۆسایا و وانیاراو پەیمانگاو هونەرەجوانەکاو کەرکووکی ڕێک وزیا، کە دلێشنە دەیان هونەرمەندێ شێوەکارێ کوردستانی بە هەرمانەکاشا بەشدارییشا نیشانگاکەنە کەرد.  

یاگێ واتەین، جە یاڎکەردەیۆ ڕۆشنویرا و هونەردۆساو تەماموو شارەکاو پانیشتوو کوردستانی و هەرپاسە کەسایەتییەکا و لایەنە سیاسییەکاو شاروو کەرکووکی ئامادێ بێنێ.

سوزان فەیسەڵە کناچە شێوەکارێوە بەرشیێ پەیمانگاو هونەرە جوانەکاو کەرکووکینە، سوزانە بە تابلۆیێوە شێوەکاری بە ڕسمێوە هونەرمەند شکور خەیاتی بەشدارە بێ، سوزانە ئاژانسوو هەواڵوو فورات (ANF)ی واتش: "یاگێ وەشحاڵی و شانازیینە پەیم، کە تاوام بەشداریی نیشانگایێوە چینەینە کەروو، دلێشنە یاڎوو کەڵەهونەرمەندێوە پێسە   مامۆسای مەقامواچ شکور خەیاتی کریۆوە، پێسە گردما مزانمێ هونەرمەند شکور خەیات خزمەتێوە گەورەش بە شاروو کەرکووکی و مەنتێقەو گەرمیانی کەردەن و  ڕاو هونەرەکەیشۆ وەبییەن یاگێ شانازیی کە ئارۆ پێسەو شێوەکارێوە تاوانم دەورم بۆ جە یاڎکەردەیۆ ئا هونەرمەندە گەورەو کوردینە".

سیروان عومەر، سەرۆکوو لەقوو کەرکووکوو سەندیکاو هونەرمەنداو کوردستانی، سەبارەت بە نیشانگاکەی، پەی ئاژانسوو هەواڵوو فورات (ANF)ی واتش: "ئێمە پێسەو لەقوو کەرکووکوو سەندیکاو هونەرمەنداو کوردستانی، بە دروشموو (هونەرمەندێ شێوەکارێ.. سۆز و سەداو شکور خەیاتی ڕەنگمج کەرا) ئی نیشانگەما کەردەنۆ، پێسەو سەندیکاو هونەرمەندا ئانە هەرمانەو سەروو شانەیمانە بەتایبەتی ئا هونەرمەندێ کە مەردێنێ، ئی نیشانگا  ٦٥ تابلۆیێ کە نیمەشا فۆتۆگرافیێ بێنێ و نیمەی تەر شێوەکاریێ بێنێ، ڕسمەکێچ لاو هونەرمەندا و مامۆسایاو پەیمانگاو هونەرە جوانەکاوە کێشیێبێنێ".

سیروان عومەر واتیچش: "ئایندەنە پڕۆژێوەما هەن، کە نیشانگاێو هامشێوە پەی ئاهونەرمەندا کەرمێوە، کە ژیواینە مەنێنی، بەردەوام هەوڵێما دێنێ، بە کۆی گردین خزمەتوو گردوو هونەرمەنداو بوارە جیاوازەکاو هونەری کەرمێ، بەپاو تەوانایچ تاوانما خزمەتوو هونەری کەرمێ شارەکەنە و چندین خولێ هونەریێما کەردێنێوە و تاوانما گەنجا وزمێ سەروو ڕاو مامۆستایاو هونەری".

لاو وێشۆ عومەرە درێژ مامۆساو مەقامواچی و هامڕاو هونەرمەندی کۆچکەردەی سەبارەت بە نیشانگاکەی، پەی ئاژانسوو هەواڵوو فورات (ANF)ی واتش: "ئی یاڎکەردەیۆ جە ڕاو چالاکیی هونەرییوە وەفاێوەنە کە پەی هونەرمەندی کۆچکەردە کە ویروو خەڵکیش بارمێ، کە ئی کەڵەهونەرمەندە گردوو ژیوایش وست خزمەتوو مەقامواچی و هونەری کوردییوە، ئی چالاکییەیچە هەرمانێوە مەبارەکەنە و دەسوەشییم هەن، هومێدم هەن پەی سەرجەموو ئا هونەرمەندا، کە ویەردەنە کۆچی دماینشا کەردەن  ئی چالاکییێ کریا، ئارۆنە بەرزئرمانای یاڎوو ئی کەڵەهونەرمەندا فرە گرنگا چونکوم دروسێ مەباوە و تاواشا خزمەتوو کولتووری کوردی کەرا، یاڎکەردەیۆشا کەمتەرین وەفانە پەی ئا هونەرمەندا، هومێدم هەن کولتووروو یاڎکەردەیۆ هونەرمەندا بەردەوام بۆ".

یاگێو ئاماژەینە، شوکر محەمەد قادر ئشناسیا بە (شوکر خەیات) مامۆساو مەقامی کوردی و یۆ جە هونەرمەندە ڕەسەنەکاو کوردستانی، ساڵەو ١٩٤٠ پەیدا بییەن، ساڵەو ١٩٥٣ لوان دلێ دنیاو هونەری کوردییوە و دەسش بە واتەی بەستەی و مەقاماتی کەردەن، شوکر خەیات جە ١٩٥٥ یوەم بەرهەمی هونەرییش سەروو دەساو مامۆسا عەلی مەردانیوە تۆمار کەرد و پێسە یۆ جە هونەرزاناو بواروو مەقامی ئشناسیا و دمایی ناسنامێ سەداو ئەنفالیش پۆوە لکا و تا دماهەناسەکاش خزمەتوو ئاوازی و گۆرانیێ ڕەسەنێ کوردیێش کەرد.  

 شوکر خەیات پاڵوو هونەرەکەیشنە ساڵەو ١٩٥٧یوە خەیاتی کەرێ، چونکوم هونەر نەژیونێش، چندین شارێ و شارەکڵێ کوردستانی گێڵان و چند ساڵێوەیچ شارەکاو وەرکەوتوو کوردستانینە بەردەن سەر، دماو مەنەیۆش ١١ ڕوا خەسەخانەنە بۆنەو نەوەشییوە جە ڕێککەوتوو ١٨/٨/٢٠٢٣ کۆچی دماینش کەرد.