ئەمیر کەریمی هامسەرۆکوو پژاکی واتش: "بە ورچنیەی سەرۆککۆماری تازەی ئەگەروو ئانەیە هەن، بڕێ کریایوە بێ ئاراوە،. ئێمەیچ بێگومان خێرامایش وەنە مکەرمێ "واتش ئا کریایوە نەک سەیەو دەسەڵاتی و سەرۆککۆمارەکەیشنە، بەڵکم دەرەنجاموو کۆشیای گەلاو ئێرانیا.
ئەمیر کەریمی، هامسەرۆکوو پارتوو ژیوای ئازادوو کوردستانی (پژاک) پێوەندیینە چەنی پەرسەو ورچنیەیەکاو سەرۆککۆماروو ئێرانی، ئاستوو بەشداریکەردەی، ئاڵۆزیی بەینوو حکومەت و گەلی، هەڵوێستوو گەلاو ئێرانی، "شۆڕشوو ژەنی، ژیوای، ئازادی" و ئەگەرەکاو دماتەری پەی ئاژانسوو هەواڵوو فوراتی ورسەنگنێ.
چەمپەنەکەوتەی ئەمیر کەریمیی هامسەرۆکوو پارتوو ژیوای ئازادوو کوردستانی (پژاک) ئینەنە:
١٤ەمین ورچنیەیی سەرۆککۆماروو کۆماری ئیسلامیی ئێرانی کریا و ڕێژەو بەشداریکەردە لای واریی ٥٠٪ بێ و ئەرەبڕیای و کەلێنەو بەینوو حکومەتی و گەلی حەر بەردەوام بێ، یانێ ئی دۆخەیە چەنی ورمسەنگندێ؟
ئەمیر کەریمی: ورچنیەیی سەرۆککۆماروو ئێرانی جە دۆخێوی تایبەتەنە کریا. سەرۆکی وەڵین بەشێوێوی گوماناوی مەرد، مەردەی گوماناویی سەرۆکی وەڵینی نیشانێ قەیرانێوە فرە قووڵ و جددییا دلێ خودوو سیستموو دەسەڵاتین. ئی ورچنیەیه دماو ئاشکرابییەی ئا قەیرانا کریا، یۆشا ئانەنە که ئی ورچنیەیه دماو شۆڕشوو ژەنی، ژیوای، ئازادی کریا و مزانمێ شۆڕشوو ژەنی، ژیوای، ئازادی کاریگەری فرە قووڵ و جیددی سەروو عەقڵیەتوو تاکی و گلێرگەو ئێرانی نیانرە. فاڕیای کاریگەرییش گلێرگەوئێرانینە ئارد ئاراوە. چی ورچنیەیەنە فرە گلێرگەی دەنگشا نەدا. بەشدارینەکەردەی گەلی بۆنەو ئانەیوە بێ، کە بێئومێدبییەی جە سیستەمی، یا چەمەڕوانییەکێشا نامێ دی، یانێ کاردایۆێوی بێئیسفادە و پاسیڤ نەبێ، بەپێچەوانەوە کاردایۆێوی فرە قەوەت و هەڵوێستێوی سیاسی چەنی ئامانجی تایبەتی بێ، چی کاردایۆیەنە گەل و شۆڕشوو ژەنی، ژیوای، ئازادی و ئارمانجەکێش و هەرپاسە ئا یاگەدارە کە ئی شۆڕشەیە وەڵێنیار کەردەن قبووڵش کرد و ڕەوایەتیی سیستموو حوکمڕانیی ئیساتێش ڕەت کەردۆ. ئینەیچە کاردایۆیێو سیاسیی چالاکا و گەل بە شێوەو ڕیفراندۆمی مامەڵەشا چەنی کەرد، فرەو گلێرگەو ئێرانی شەرعیەتوو سیستمیشا وست چێروو پەرسێوە، هەرپاسە وەڵێنیاری دارشا نیارە، ئادێ یاگەدارشا ئینا دەسۆ و پەی ئانەیچە شۆڕششا کەرد، ئانێ کە بەشدارییشا ورچنیەینە کەردەن، لایەنگێرێ ڕژیمی نییەنێ. نین. بەشێو چا کەسا تەرسەو ئانەیەنە تندڕەوە پەڕگیرەکێ دەس ملوو دۆخەکەیرە نەگێرا و قەیرانەکا زیاتەر نەکەرا بەشدارییشا کەرد. دەسەڵاتداێ گەرەکشانە زیاتەر گلێرگەی بوزانە قەیران و هەژارییوە پەوکای بەینوو خراپ و خراپتەرینە خراپسا هورچنی، چێگەوەن کە گەل هەڵوێستی سیاسییشا بێ، ئەنجامەنە نمەتاومێ ورچنیەیەکانە ڕەوایەتی بە سیستەمی بدەیمێ. ڕاسیینە سیستم و لایەنگێراو کەمینەینێ. ورچنیەیی سەرۆککۆماروو ئێرانی فرە بەڕۆشنی بە سیستموو کۆماری ئیسلامیش نیشانەدا، کە گەل نەک هەر هەڵوێستشا هەن، بەڵکوم بەدیلیچشا هەن. ئێمە ئجۆما کە ناوەندوو دەسەڵاتوو کۆماری ئیسلامی ئی پەیامەش ورگێرتەن، بەڵام چەنی مامەڵەش چەنی مکەرا، ئینە جە ڕاوەبەردەی دماتەروو سیستمینە بەرمگنۆنە. بایکۆتوو ورچنیەیەکاما کەرد و داواما وەنەو گەلی کەردە بەشداریی نەکەرا. سەروو چە بنەمێوە؟ سەروو ئا بنەمێوە، کە ئێمە بەشداری نەکەردەی بە بەشێو جە درێژەدای شۆڕشوو ژەنی، ژیوای، ئازادی مزانمێ و چاگە گەل چوارچوە و بەردەوامیی هەمان شۆڕشینە هەڵوێستێوی چالاکانەش نیشانە دا و ئینەیچە سیاسەتوو ئێمەن پەی بە پەرسەو ورچنیەی و درێژەدای بە شۆڕشوو ژەنی، ژیوای، ئازادی، یانێ شۆڕشوو ژەنی، ژیوای، ئازادی، سەرکەوت.
ئایا دماو ورچنیەی، دەسەڵات متاوۆ قەیرانەکا بویەرنۆ و چارەسەرش بۆ؟ ئایا سیستموو کۆماری ئیسلامی تواناو ئا فاڕیایاشەهەنە بارودۆخوو ئیساتێنە؟
کەریمی: ئەنجاموو ورچنیەی بۆ بایسوو بەرشییەی قەیرانەکانە و کریایوەی سیستموو کۆماری ئیسلامی یا نا، جوابوو ئێمە نەخێرا، هەرمانێ چانێ مەحاڵەنە، وەروو چێشی. وەروو ئانەیە کۆماری ئیسلامیی ئێرانی بەرەو ڕوو گەورەتەرین کێشێوە کە خوڵقنانش بییەنۆ، کە نەبییەی دیموکراسییا. سیستموو کۆماری ئیسلامی جە پێکئاماێوی ڕەق و دلێنێوی تندی ئایدیۆلۆژیینە، کە جە ئایدۆلۆژیای دینی دوازدە ئیمامی و ناسیۆنالیزمی وەش بییەن. ئی سیستەمە هەر ڕوێ پەرە مسانۆ سنووروو پاکتاوکاری فراوانتر مکەرۆ. هەروەها بازنەی بەشداریکەردەن لەم سیستەمەدا ڕۆژ بە ڕۆژ بەربەستتر دەبێتەوە. ئیتر گەل لەم سیستەمەدا جێگەیان نییە. ئەم سیستەمە شەرعیەتوو وێش جە پیرۆزیی دینی و عاسمانینە ورمگێرۆ. سیستموو وەڵایەتی فەقیهـی سیستمێوی سەروو یاساییا. ئایا ئەرەمەرزیاو سەرۆکایەتی متاوۆ پێسەو "ئەرەمەرزییوی ورچنیای" دژوو ئی تیۆکراسییە بمدرمێوە؟ ئایا متاوۆ فاڕیاێوە دەستوورەنە وەش بکەرۆ. چیوێ چانە مەحاڵا. سەرۆککۆمارێوە، کە ورچنیان، وێش تەمام لکی دان بە دەسەڵاتوو ویلایەتی فەقیهیوە. ویەردەنە سەلەمیان کە جەنگوو بەینوو ئەرەمەرزیا یاساییەکانە و دەسەڵاتوو ویلایەتی فەقیهـینە، هەمیشە بریاوە ئەرەمەرزیایەکاو سەر بە وەلایەتی فەقیهـنێ. ئینە شناسنامەو کۆماری ئیسلامیین. ئیساتێ ئایا کۆماری ئیسلامی ئامادەن ئی شوناس و دلێنەیە بفاڕۆ یا نا؟ ئایا ڕا بە فاڕیای چی پێکئامایەنە مکەرۆ یا نا؟ تا ڕادێوی هیچ ئاسۆێوە پەی ئا فاڕیایا هەست پەنە نمەکریۆ، یانێ کەس ئاسۆیێوی چانە نمەوینیۆ. شۆڕشوو ژەنی، ژیوای، ئازادیی، کە ورچنیەینە سەرکەوت، بەدیلوو دیموکراسی وێش پێسەو گلێرگێوی دێموکراتیکی پێشکەش مکەرۆ، گرد ڕوێ دژوو سیستمێوی چانە پەرەسانایەنە هەن، پەوکای کۆماری ئیسلامی هیچ ورچنیەێوی تەرشا نییەن جگە چانەیە یا مشۆم فاڕیای بکەرۆ یا لاو گەلاوە هورمگێریۆ. ڕاسینە کاندیدەکاو ورچنیەی جە خەموو فاڕیای دیموکراسیینە نەبێنی، بەڵکوم خەمی سەرەکییشا درێژەداین بە سیستمی. پەی نموونەی کاندیدوو پەڕگیرەکا یانێ جەلیلی پلانەی دیاریکریێش ئانێ بێ، کە درێژەپنەدەروو ئا پلانانە بۆ، کە تا ئیساتێ بە شێوێوی فرە ڕادیکاڵ کریان. یانێ گەرەکش بێ چێروو نامێ حکومەتی سێبەرینە درێژە بە بەرنامەکا بدۆ. پزیشکیان پلانێوە نەبێ زیاتەر پێسەو ڕەخنەگێری بەرکەوت. ڕەخنە وەنەو چێشی؟ جە هەرمانەکاو دەسەڵاتدارە پلە دوواو سیستەمینە. هیچ پلانێوی دیاریکریا و یاگەدارشا نەوست ڕووە. جگە چانەیچە ڕەخنەکێش جە سیاسەتوو سیستمی و پێکئاماو سیستمی و غەڵەتە ستراتیژییەکێش نەبێنێ، بەڵکوم بە ئامانجوو بریکارە پلە ناوەندییەکاو سیستمی بێ.
سەبارەت بە پەرسەو ژەنا و ئازادییەکاشا دۆخەکە چەنینا و لاو ڕێژیموو ئێرانیوە چە جۆرە ڕسمێوە نیشان مریۆ؟
کەریمی: جە قسێ پزیشکیانی، ددانیایپۆرەی فرە جیددی سەبارەت بە سەرکەوتەی شۆڕشوو ژەنی، ژیوای، ئازادی، وەرەچەم کەوت، هەرپاسە هجوومکەردەی سەروو ژەنا و جیاکاری دژوو نەتەوەکا وینیێ، دداننیایپۆرەکەی خاسەن، بەڵام هیچ پلانێوی سەبارەت پانەیە کە ڕاو ویەرنای ئا پەرس و کێشا چێشەن، پێشکەش نەکەرد. پەی نموونەی هیچ پلانێوەش سەبارەت بە ژەنا نەبێ، جیاوازییەکێ درێژەشا بی، وتارەکێ هەمان وتاروو سیستمی بێنێ، زیاتەر شیمانە مکریۆ، کە سەرکوتکەردەەی پەرسەو ژەنا بەردەوام بۆ و سیاسەتەکاو کۆماری ئیسلامییچ پا ئاراستە درێژەشا بۆ. تەنیا مامەڵەکەردەی چەنی هێزە ئەمنییەکا، کە وەرپەرسێنێ جە سەرکوتکەردەی ژەنا، ڕەنگای هێورتەر بۆوە، ئەگەرنا هیچ فاڕیاێوی بنەڕەتی جە پەرسەو ژەنانە ڕووە نمەدۆ.
پزیشکان و سیستموو ئێرانی چە ڕێبازێوەشا وەراوەر بە نەتەوەکاشا و ماف و ئازادییەکاشا نیشانە دان و ڕێبازەکێشا چەنی کردەوەکاو ئیساتێ چەنینێ مبانە؟
کەریمی: پزیشکیان سەبارەت بە نەتەوەکا باسوو مافوو نەتەوەکاش کەرد و بە پاو ئەدەبیاتو وێش، نەتەوەکێ مافشا هەن، بەڵام پێناسێوەشا پەی ئا مافا پێشکەش نەکەرد. چکۆنە و چەنی متاویۆ ئی مافێ بوزیانە ڕووە و بچەسپنیانە، هیچ باسێو چینیشا نەکریا. ئایا دەستوور پەرسەو مافوو نەتەوەکا ئێرانەنە دیاری مکەرۆ؟ ئایا ئاستوو بەشداریی نەتەوەکا سیاسەتەکاو ئێرانینە قبووڵ مکەرا؟ ئایا وێڕاوەبەریی قبوڵ مکەرا؟ ئایا مافوو کولتووری، کۆمەڵایەتی و سیاسیی نەتەوەکا قبووڵ مکەرا؟ ئینێ ئا بابەتێنێ کە باسشا سەر نەکریان و پا زانیارییا، کە ئینێ لاماوە سەروو سیاسەتی و ستراتیژوو سیستمی سەبارەت بە پەرسەو نەتەوەکا، هیچ ئۆمێدێوە بەدی نمەکریۆ. جە سیستموو حوکمڕانیی ئێرانینە، سەبارەت بە پەرسەو نەتەوەکا، ڕوانگێوی ئەمنی هەن کە ڕا بە هەرجۆرە سەرکوتکاریێوە مدۆ. بەردەوام هەوڵێوی چەواشەکاریی، سەرکوت و ئینکار ملۆ ڕاوە. حەر پا سەبەبە خۆدوو پزیشکیانی لاو ناوەندەکاو بڕیاروو سیستمیوە پاڵپەشتییش ونە مکرییۆ. کۆماری ئیسلامی بواروو نەتەوەکانە کێشەش هەن، بەتایبەت پێوەندیینە چەنی تورکە ئازەرییەکا. ئێمە هاگادارێنمێ، تورکیا و ئیسرائیل سەروو ناسیۆنالیزمی ئازەری هەرمانە مکەرا و کۆماری ئیسلامییچ هاگادارێ ئا تەرسێنێ. حەر وەروو ئی سەبەبەیە فرە ئەگەرێ هەنێ، کە پزیشکیانی پێسەو چارەسەرێوە بەینوو ناسیۆنالیزمی تورکی- ئازەری و ئازەری – ئێرانی بە سەردەسوو عەقڵیەتی شیعەگەرایی ئیسفادەش چەنە بکەرا. بە جۆرێوە هەوڵێ مدانێ ڕاگێری جە کێشەو ناسیۆنالیزمی ئازەری بکەرا. هەرپاسە پزیشکیان شارەزاو زوانی کوردیین و گەرەکشانە بە بییەی ئادی سەروو گلێرگەو کوردستانیوە کاریگەریی وەش بکەران. ڕەنگای ئی ڕێبازە فرە کارامە نەبۆ، چونکە ئا بەراوەردێ کە تورکیا و ئیسرائیلنە سەروو ناسیۆنالیزمی تورکی ئازەری کەردێنێشا، فرە ستراتژیین جە بەراوردەکاو کۆماری ئیسلامی، ئادێ گەرەکسانە ئازەربایجانی پێسەو پاژەنیەی ئاشیلی گردوو ئێرانی بەکاربارا. بێگومان گردوو ئی بەرناما بەروو ئیرادەو گەلوو ئازەربایجانی و بەدەر جە داواکارییە شەرعیەکاشانە پێسەو نەتەوێوی ئازادی. مەسەلێ دووەمە ئانێنە کە گەلوو کوردی و کۆشیایەکەیشا داواکاری و هەڵوێستی تایبەتا و نمەکریۆ پەرسەو زوانی و جلوبەرگ و... کورڵ بکریۆوە. کوردستان یاگێ پەیدابییەی شۆڕشوو ژەنی، ژیوای، ئازادیین و گەلوو کوردستانیچ جە پارادایموو کۆشیای فرەڕەهەندوو گلێرگەی دیموکراتیکی، ئیکۆلۆژی و ویەردێ بێنێ جە پیاسالارییوە دەسنیشانێ کریێنێ.
ئێران بواروو سیاسەتوو بەرینە، ڕووبەڕوو چە قەیرانێوە بیەنۆ و ئایا تواناو چارەسەرکەردەی قەیرانەکا، کەمکەردەیوەی گرژییەکا و دوورکەوتەیوەی جە جەنگی هەن؟ نیشانەکاو ئیساتێ چێشما پنە ماچانێ؟
کەریمی: بواروو سیاسەتوو بەرینە، کۆماری ئیسلامی ئینا وەردەموو قەیرانێوە فرە جیددیێنە، ئەگەروو ئانەیە هەن ئا جەنگە بە وەکالەت کە بەروو سنوورەکاو ئێرانیوە مکریۆ، بفاڕیۆوە پەی هجوومی ڕاستەوخۆ وەراوەروو ئێرانی. حەرچەندە ئەمریکا جە زیادبییەی گرژییەکان متەرسۆ، بەڵام ئیسرائیل و تورکیا و ڕوسیا ئیسفادەی سەرەکیی جەنگێوی چانەینێ، هەژمۆنمەنتێقەکەنە، هیلالی شیعە و وزەی ئەتۆمی، ئینێ پەرسەی ستراتیژییە و ژیوایینێ پەی سیستموو ئێرانی، کە ڕاستەوخۆ لاو ناوەندی ئایدیۆلۆژییوە، خودوو خامنەییوە و ئەمنیەتوو سیستمیوە قەرارش سەر مدریۆ. ئی سیاسەتێ گرژیی قووڵشا چەنی جیهانوو بەری وەش کەردەن،حەر ئینێ بیێنێ سەبەبوو سەپنای سزێ و ئابڵۆقە ئابوورییەکا سەروو حکومەتوو ئێرانیرە. ئێران بەروو ئا ڕاڕەوو وزە و بازرگانییەینە، کە بەرنامەو ئەمریکای و وڵاتە عەرەبیەکانە نریانرە، هەرپاسە پەیمانی ئیبراهیمی بەینوو ئیسرائیلی و وەڵاتاو کەنداوی هامپەیمانیێوا دژ بە ئێرانی. سنوورەکاو سەرنیشتوو تورکیای و ئازەربایجانینە و ئیسرائیلینە وەرم بە جیاکەردەیوەی ئازەربایجانوو پانیشتی ئێراننە موینا. حەرچندە وەڵاتاو وەرنیشتی گرنگییێوی فرە بە دۆخوو مافوو ئینسانی ئێرانەنە نمەدا، بەڵام سەرکوتەکاو ڕژێمی ڕوێوە فرە گولش جە ڕای گردینی و ئەرەمەرزیا دێموکراتیکەکاو جیهانینە وەش کەردەن. بە گردی وەڵات بییەن بە کۆگایێوە تەقایوە. حکومەت گەرەکشا بە ورچنیەیی پزیشکیانی دۆخەکەی نەرم بکەرۆوە. ڕەنگای ئادێ بەمەبەست بەرنامەی تایبەتییشا پەی ئی بۆ ئەم ورچنیەیە نیابۆرە. بەڵام مەودا و پێویسییەکاو خاسسازیی تا چند مبۆنە؟ تا چند سەرۆککۆمار متاوۆ دەور بگێڵنۆ؟ سەرۆککۆمار بەڕۆشنی چی بوارەنە ئەرەمجێ سیاسەتی نییەنێ و پاسەیچ سیاسەتە سەرەکییەکاو سیستەمی سەرو بنەماو ئاشتی و سازانی نییەن گردوو ئینیشا بە بۆنەو ئانەیەنە ئەکتەری سەرەکیی سەرۆککۆماری نییەن.
قەیرانی ئابووری و خراپی بژێویی خەڵکی چە ئایندێوی پەی گلێرگەو ئێرانی مخوڵقنۆ و دەرئەنجاموو ئا قەیرانەیە چێش مبۆ؟
کەریمی: سەبارەت بە پەرس و قەیرانە ئابوورییەکاو کۆماری ئیسلامی، واتش: "ئەنجامەکاو ورچنیەی نمەتاوانێ با بایسوو ڕزگاربییەی چا قەیرانا. قەیرانی ئابووری ئێرانی تەنیا دەرئەنجاموو بییەی وەرپەرسوو خراپی و ڕاوەبەرە ناکارامەیە نییەن، بەڵکوم قەیرانی ئابووری وێش بەشێوا جە قەیرانی گەورەی سیاسی و کۆمەڵایەتی. گەمارۆکێ چی قەیرانانە دەوریوی فرە چارەنووسساز مگێڵنا و ئینەیچە دەرئەنجاموو سیاسەتە غەڵەتەکاو کۆماری ئیسلامی بەتایبەت جە سیاسەتوو بەریوە سەرچەمە مگێرۆ. دووەم، نەبییەی ڕاوبەرێوی کارا و دروس جە مەسەلێ ئابووریینە وەروو ئانەیە ئا کەسێ جە گرووپوو مافیاو دلێ کۆماروو ئیسلامیینە سەروو بنەماو پابەندبییەی کوتلەیی دەسنیشانێ مکریانە. پەی نموونەی هێزێوی سەروازیی پێسەو سوپاو پاسدارا دەوری سەرەکیی ئابوورینە هەن و زاڵا ملوو جمگە ئابووریەکارە، ئینەیچ یۆن جە هۆکارە سەرەکییەکاو قەیرانی ئابووریی ئێرانەنە. تا ئا کێشێ یەکلاییێ نەکریانێوە، یانێ نمەتاوانێ ڕاچارێوە پەی پەرسەو گەمارۆکا بوێزاوە و ئەنجامەنە سیاسەتوو بەری ڕێک بوزانە، هەرپاسە ئابووری جە دەسوو سوپاو پاسدارانە ممەنۆوە.
ئایا حکومەتی تازەو ئێرانی پەی پەرسەکاو ژیوگەی پلانیش هەنە؟ مناقشەکاو کاندیدەکا چی بارەوە چەنین بێ؟
کەریمی: کێشەو ژیوگەیچ چا کێشانە کە کاندیدەکێ باسشا نەکەرد و سەرشرە ویەردێ، چونکوم سیستموو کۆماری ئیسلامی پەی وێش هەرمانەو دوژمنایەتیینە چەنی ئیکۆسیستموو گەلاو ئێرانی، وێش سەرچەمەو قەیرانە ژیوگەییەکان. ئەگەر وێرانکەردەی ژیوگەی پی ڕێژە بەردەوام بۆ، دماتەرنە ئێران مبۆ بە جوگرافیاو مەرگی. پەوکای یاگێوە پەی ژیوای گلێرگەکا نمازۆوە. ئینە کێشێوەن کە حیچ بەرنامێوەشا پەی نییەن. بەشێوی فرەو ژیوگەو ئێرانی بییەن قوربانیی پەرسێ ئەمنیێ، پەی نموونەی کوردستانەنە و زاگرۆسنە ئایر وەنەو دارستانەکا وەرمدریۆ، تافەکێ وشکێ مکریانە، زیاتەر بەنداوەکێ پەی هۆکاری ئەمنی و مەرامی سیاسی وەشێ مکریا، ئەگەرچی ئینە نمەبۆ هەڵوێستوو سەرۆککۆماروو ئی ئەم سیستەمەیە چەمەڕوان بکریۆ.
جە ئەنجامەنە هومێدوو فاڕیای چی سیستمەینە مەحاڵا و خاسسازی نمەکریۆ. تازەکەردەیوە جە سیستمێوەنە، کە هیچ دەرفەتێوش پەی دیموکراسیکەردەی نمەڕەخسنۆ، مەحاڵا. وەروو ئینەیە فاڕیای بنەڕەتی بەروو سیستمی و گلێرگەینە سەرە ورمدانە. ئینەیچ گەل بە ڕۆشنی شۆڕشوو ژەنی، ژیوای، ئازادیینە جە ورچنیەیەکاو ئی دمایەینە پێسەو بەشێو جە کاردایۆکاشا نیشانە دریا. ئەگەر سیستەم نەفاڕیۆ، ئیتر گەل دەس بە دروسکەردەی بەدیلەکاشا مکەرا و هامتەریب چەنی شۆڕشوو ژەنی، ژیوای، ئازادی و پارادایموو گلێرگەی دیموکراتیکینە، ڕۆ بە ڕۆ دەرفەتەکێ پەی دیکتاتۆرەکا ئاستەنگێ مکریا، ئینە پەیامێوە بێ، کە گەل چی ورچنیەیەنە بە ڕۆشنی نیشانیشا دا. یانێ حەر ئی شۆڕشە ئەنجامەکا دیاری مکەرۆ نەک وتاروو ڕیفۆرموازان یا فاڕیایوازا دلێ ئی سیستمەیە. یانێ ئێمە پێسەو هێزوو شۆڕشوو ژەنی، ژیوای، ئازادیی، درێژە بە کۆشیای دیمۆکراتیکیما مدەیمێ و ئامانجەکاما بە ئاراستەو بەدیئاردەی گلێرگێوی دێموکراتیکی مبەرمێ، چەنی ورچنیەیی سەرۆککۆمارێوی تازەی، ئەگەروو ئانەیە هەن کە بڕێو دەرفەتێ و ئیمکانێ بکریاوە. بێگومان ئێمەیچ خێرامایش وەنە مکەرمێ، ئەڵبەت ئانەیچ سەیەو سیستەمی و سەرۆکەکەیشۆ نییەن، بەڵکوم دەرئەنجاموو کۆشیایەکاو گەلاو ئێرانی و بەتایبەتی شۆڕشوو ژەنی، ژیوای، ئازادی-یین.
