هرووژمەکۍ دۆڵەتو تورکی و چەتەکاش سەرو سەرنیشت و ۋەرکۊتوو سوریای، بە ڕاپیمایۍ جە ناوچەو پرسوسی ڕحای هامسنورو کۆبانێ شەرمەزارۍ کریۍ. چالاکییەکە بە سەرمەشقایەتی پارتو هەرێمە دیموکراتیکەکا (دەبەپە)ی، دەم پارتی و تەڤگەرو ژەنا ئازادی (تەژەئا)ی ئەنجام دریا. گەل بە یاوەریی نوێنەر و ئەنداما پارت و لایەنە سیاسییەکا جە گەڕەکەو عەلیگۆرێ کوۍ بیێوە و بە بەرزکەردەیۆ درووشمۊو "بژیۋۆ مڎرامانوو ۋەرنیشتی" و "ۋەرنیشت هێڵەی سورەنە پەیما" بە ڕاو پرسوس-کۆبانێ ڕاپیماکەیشا ئەنجامدا.

جە چالاکیەکەنە هامسەرۆکۊو گرڎیی دەم پارتی تولای حاتەم ئۆغللاریە قسێش کەردۍ و پەیامو بەردەوامیدایش سەرو ئەرەکۊشای دیموکراتیکانەی دا و واتش: "تا جە هەرێمەکەنە سیستەمێوە ئاشتی و ئارامی واڵەو-برایەتی گەلا بنیاڎ منریۆ جە ئۋکۆشایما بەردەوامۍ بیمۍ." تولایە ئاماژەش پانەی دا کە هرووژمە وەحشیانەکۍ هەتەشەی درێژکریاوە و هرووژمەکا ٢٠١١و داعشین جە دژو وەرنیشتی.

'سوریا پەنەوازیش بە ئاشتییا'

جە قسەکاشەنە تولایە ئاماژەش بە گرنگی و پەنەوازی ئاشتی کەرد پەی ئاژەو سوریای و واتش: "مشۆم جە سوریانە ئاشتی بنیاڎ بنریۆ. گروپە چەتەکۍ ئاژەو ئاشتی سەرەو چێر مکەراوە. گرڎوو گەمەکا سوریای پەیوەندیشا بە تورکیایۆ هەن. هەرپۊکەی تورکیا گەرەکش نەبۍ پرسەکاو کوردی جە ڕاو ئاشتی و دیموکراسییوە چارەسەر بکریۆ."

تولای حاتەم ئۆغللاریە جەختش چانەی کەردەنۆ ئی پێشئامایۍ و پشێویۍ نیا ئیسفاڎەو گەلا مەنتیقەکەینە.

هەر جە چالاکییەکەنە هامسەرۆکو هەدەکەی مەراڵ دانش بەشتاش بە هەمان شێوە هرووژمە ئەرەگیریەکێش شەرمەزار کەردۍ و ئاماژەش پانەی دا کورد و دۆسەکێش گرڎ کاتێ جە مڎرامانەنە بیێنۍ و پېسە چنی وەڵتەر کەردەنشا جە ئیسەیچەنە بە مڎرامان مەرامو ئی هرووژما پوچ مکەراوە.