ئەرتوغروڵ کورکچو سەرۆکو فەخری هەدەپەی جە ڕاو ئاژانسوو هەواڵوو فوراتی (ANF)ی هۊرسەنگنایش پەی بانگەوازو "ئاشتی و گلېرگەی دیموکراتیک"ی ڕابەر ئاپۆی کەرڎ.

کورکچو ئاماژەش پانەیە دا کە پەکەکە یووەمجارش نیا جە تاریخەنە ئامادەیی ۋێش نیشانە بڎۆ پەی چەکنیایرە و دماییئاردەی بە ئەوەکۊشای چەکڎاری. "ئەڵبەتە وەڵتەریچ جە ما بەینو ساڵەکا ٢٠٠٠  ی و ٢٠٠٢ ێنە شێوەو ڕێکوستەیش فاڕیایش سەرەرە ئاما بۍ، بە شێوێوە یەکلایەنە ئەرەیاۋناش کە دمایش بە ئەوەکۊشای چەکڎاری ئاوردەن. بەڵام بە پێشنیارەکەو ئۆجالانی پەکەکە قەولش دا بەبێ مەرج دمایی بە ئەوەکۊشای چەکڎاری بارۊنە و جمېیەرە ٤٠ ساڵیەکەیش هۊرشێونۊوە. ئی ئاژە کۊششێوە تاریخی و یەکلاکەرەوەن پەی ئانەی مۊرەو ۋێش چا ٤٠ ساڵەیە بڎۆ. کێ و چنی هۊرسەنگنای پەی ئی قەراریە مکەرۆ گرنگ نییا، ئی قەرارە هەنگامېوە فرە یەکلاکەرەوێنە پەی دمایی ئارڎەی بە بیەو پەکەکەی جە گرڎ لێوە.

ئی پرۆسە دەرفەتێوە گۊرەن پەی چارەسەرکەردەی کێشە و جەنگەکا ئی ١٠٠ساڵەو ۋېیەردەی کە سەرو پرسو کوردی ڕووەشا دان. هەرپاسە دەرفەتێوە گۊرەن. کاتێ چی ڕوانگۆ تەماشە مکریۆ، ئانە ڕۊشن بۆوە کە بەرەو پرۆسێوە فرە گرنگی ڕووەو گرڎ لێوەرە کریانۆ".

'پەنەوازا مەرج و دەرفەتەکۍ پەی ڕاوەبەردەی پرۆسەکەی وەشۍ بکریا'

کورکچو جە میانو قسەکاشەنە ئاماژەش پانەیچ کەرڎ، پەی ئانەی پرۆسەکە بە شێوێوە ئەرێنی بلۊڕاوە، پەنەوازا ڕابەر ئاپۆ بتاوۆ بە ئازادی هەرمانەکاش ڕاوەبەرۍ بکەرۆ و دەرفەت و ئیمکانو پەیوەندیکەردەی و ئەرەیاۋنایش بۆنە و واتش: "عەبدوڵا ئۆجالان ۋەرپرسیاری ئی پرۆسەیشە جە ئەستۆ گێرتەن. پەی ئانەی پرۆسەکە بە شێوێوە ئەرێنی و کاریگەر بلۊڕاوە، مشۊم سەبارەت بە کەسایەتی عەبدوڵا ئۆجالانی بڕۍ سەرڕاسکەردیۆ بکریۆ، ئی ۋەرپرسیاریە ئینا ئەستۆو عەبدوڵا ئۆجالانینە، پۊکەی مشۊم هەلومەرج و دەرفەتەکۍ هەرمانکەردەی پەی ئێژا ئۊجالانی وەشۍ بکریا، تا ئاژەو ئیساتۍ پی جۊرە مەنۆوە ئا وەڵێکۊتەیەی کە پەنەوازا ئەنجام بڎریۆ بە مەڵامەتوو ئاژەو گۆشەگیرییوە سنووردار بۊنە و نمەکریۆ. ئەرکەکۍ عەبدوڵا ئۆجالانی پەی چەکنیایرەو پەکەکەی هەڵای تەمامۍ نەبیێنۍ، ئینە تەنیا دەسش پنەکەردەن پەی ئانەی بتاوۆ پروسەکەی عالتەر ڕاوەبەر بکەرۆ مشۊم دەرفەتو هەرمانکەردەی وەش بکریۆ.

تەنانەت ئەر عەبدوڵا ئۆجالان جە زینانو ئیمرالیچەنە ئازاڎ نەکریۆ، مشۊم ئاسانکاری ئانەیش پەی بکریۆ جە یاگۍ جیاوازەنە جە جبەرو زینانی یاگێوەش پەی مەیسەر بکریۆ کە بتاوۆ دەرفەت و پەیوەندیش پەی بڕەخسیۆ تا بتاوۆ گلېرۊبیەی و ئەرەنیستەی ڕاوەبەر بکەرۆ، ئینە تەنیا بە دەرفەتی بەڎەنی نمەبۆ. هەرپاسە مشۊم سەرو بنەماو یاسایی مافو دەرفەتش پەی ئاماڎە بکریۆ. جە ئاژێوە چامنەنە پەنەوازش بە زانیاری تازەی هەن، ۋەرو ئانەی محاڵا عەبدوڵا ئۆجالان بتاوۆ بە تەنیا بە ئەزموونو ۋێش پرۆسەکەی ڕاوەبەر بکەرۆ هەرپاسە مشۊم درفەتەکۍ پەیوەندیکەردەی و ئەرەیاۋنای پەیش کراوۍ با پەی ئانەی زانیاری فاڕۊوە. چی چوارچێوەنە سەر ۋنەدای عەبدوڵا ئۆجالانی فرە گرنگا.

'سەبارەت بە پەکەکەی پەنەوازش بە هەموارکەردەیۆ یاسایی هەن'

ئانۍ جە ئاکامو هرووژمەکا پەکەکەینە باڵبەسۍ کریێنۍ، هەڵای پروسەو دادگایی کەردەیشا بەردەواما، ئازاڎۍ بکریا و دادگاییکەردەی سەبارەت بە پەکەکەی جە چوارچێوەو پڕۆسەو چارەسەرینە هەموارکەردەیۆ یاساییش پەی بکریۆ و گرڎو دۆسیە پەیوەندیدارەکا بە پەکەکەی لابریا. ئینە هەنگامێوە گرنگە و پەنەوازەنە کە مشۊم پەی دڵنیابیەی جە ڕاسگۆیی و دادپەروەری پەی ڕاوەبەردەی پرۆسەکەی بنریۆ. ئەر 'ڕێکوستەیۍ' نەمەنۆ، ئانە ئانۍ کە تۆمەتبارێنۍ بە 'بەهانۍ ئەندامبیەی جە ڕێکوستەی'نە مشۊم ئازاڎۍ بکریا. بە دەیان هەزار کەسۍ کە بە مەڵامەتوو ئەندامبیەی جە ڕێکوستەینە دادگایی کریێنۍ، مشۊم چا تاوانا دوورۍ وزیاوە و بێتاوانێنۍ و ئازاڎۍ بکریا. ئەر بانگەوازەکەو ئۆجالانی ئەنجامێوە کردەیی شۊنەو ۋێشەرە بارۆ، ئانە بەدڵنیاییوە پرۆسێوە تازە، فاڕیای پەی زینانییەکا و بنەیانەکاشا مۍ وەڵۍ و جە سەرکۊتەی پرۆسەکەینە فرە کاریگەر بۆنە.

ئی پرۆسە پېسە وەڵۍ و دماو بانگەوازییەکەو ئۆجالانی مشۊم بە فاڕیایۍ حەقەتینە ۋەرچەم بگیریۆ. هەرپاسە پەی ئانەی پرۆسەکە شکس نارۆ، مشۊم دەمودەس ئەنجامی ۋەرچەم بوینیۆ. تەنیا پی جۊرە مکریۆ پەیوەندییەکۍ چنی گەلوو کوردی بە هێزتەرۍ بکریا و متمانە و بڕوا بە پرۆسەکەی وەش بکریۆ.

ئایا ئی پرۆسە هیچ قازانجۍ بەدەس مارۆ یان نا، بە تەمامی لکەدریان بە پەیوەندییەکا چنی گەلی و فاڕیایە ئەرێنییەکا ژیۋای گەلیوە. قبوڵکریا نییا حکومەت پرۆسەو یەکلایی کەردەیۆ بکەرۆ ئامرازێ پەی موزایەدەی بە زەرەرو گەلی. کۊششێوە سیاسی جددی پەنەوازا پەی بەدەس ئاوردەی ئەنجامی ۋەرچەم جە پرۆسەکەنە. وەڵۍ گرڎ چێوێنە مشۊم دەرفەتی سیاسی پەی ئۆجالانی ساز بکریۆ و ئازاڎکەردەی ئا کەسا کە بە تۆمەتو ئەندامیەتی پەکەکەی دادگایۍ مکریا مسۆگەر بکریۆ. هەرپاسە پەنەوازا دۆسیەکۍ مردانە و دۆسیەی تازە چا بارۆ نەکریاوە.

بەڵام نمەبۆ ئانەما جە یاڎ بشۆ کە تەمامو ئی پرۆسەیە جە لایەنو ئەردۆغانیوە ملۊڕاوە. باخچەلی ڕاستەوخۆ دەسەڵاتو قەراردایش نییا. دەسەڵاتو فەرمان دای بە داواکاری گرڎی، پارێزگارەکا، یان وەزارەتو دادی گرڎ ئینۍ دەسو ئەردۆغانی و ئاکەپەینە. بەڵام تا ئیساتۍ ئەردۆغان حیچ ئیرادێوەش چی بارۆ نیشانە نەڎان."

'زۋانو میدیاکایچش پەنەوازا فاڕیایشا سەرەرە بۍ'

ئەرتوغروڵ کورکجو ئاماژەش پانەی دا کە زۋانو ئەرەیاۋنای جە تورکیانە کە پېوەسا بە هێڵۊو پەخشو ئەرەمەرزیاکا ئەرەیاۋنای دۊڵەتی و حکومەتی، جە پرسو ڕاس نیشاندای وردو پرۆسەکەینە کەمکاری مکەرۆ و ئاماژەش پانەی دا کە مشۊم ئی ئاژە فاڕیایش سەرەرە بۍ پەی ئانەی پرۆسەکە بە شێوێوە ئەرێنی و سەرکەوتە بەرەو وەڵۍ بلۆ.