تیمو کوردەسانو عێراقو ڕێکوزیاو CPTـی ئەمریکی ئامارەو مانگۊو ئادارو هرووژمەکا دۊڵەتو تورکی ئەرەگیریش پەی سەرو پانیشتوو کوردەسانی ئاشکرا کەرڎۍ و ئەرەیاۋناش، سوپاو تورکی چی مانگېنە ١١٨ هرووژمۍ و بۊمبوارانێش کەردێنۍ، وە پەنج مەڕێش تەقنێنێوە.
تیمو کوردەسانو عێراقو ڕێکوزیاو CPTـی ئەمریکی، گوزارشتێوە ئامارییەش جە بارەو هرووژمەکا دۊڵەتو تورکی ئەرەگیری پەی سەرو پانیشتوو کوردەسانی جە مانگۊو ئادارینە، وەڵاکەرڎۆ.
جە گوزارشتەکێنە ئامان: "سوپاو تورکی جە مانگۊو ئادارینە، ١١٨ هرووژمۍ و بۊمبوارانێش پەی سەرو هەرێمو کوردەسانی ئەنجامدێنۍ، کە ٥٥ هرووژمېشا جە پارێزگاو هۊلېری، ٥١ شا پارێزگاو دهۆکی، ١٢ هرووژمێچ جە پارێزگاو سلێمانینە کەردێنۍ. سوپاو تورکیای بە بەکارئاوردەی تی ئێن تی، جە مانگۊو ئادارینە پەنج مەڕۍ سرووشتیێش تەقنێنێوە."
ئینە جە کاتێنە، ڕۆو ٢ۍ نیسانی، مېیانو ئەرەیاۋنای و چاپەمەنی هێزەکاو پارېزنای گەلی، ئامارەو هرووژمەکا دۊڵەتو ئەرەگیرو تورکیش جە مانگۊو ئادارینە پەی سەرو هەرێمەکاو پارېزنای مەدیای وەڵا کەرڎۆ و ئەرەیاۋناش، کە جە مانگۊو ئادارینە دۊڵەتو ئەرەگیرو تورکی ١١ هەزارۍ و ٥٨٥ جارۍ بۊمبواران و هەرێمەکاو پارېزنای مەدیایش کەردەن.
یاگۍ ئاماژەیا، ئامارەکۍ ڕێکوزیاو CPTـی ئەمریکینە تەنیا ژمارەو هرووژمەکا ئەژمار کریان جە کاتێنە کریۆ جە یەک هرووژمەنە دەیان جارۍ بۊمبواران کریابۆ، بەڵام ئامارەکۍ هەپەگەی ژمارەو بۊمبواران و تۆپبوارانەکا ئەژمارۍ کریێنۍ.
