کۆردیناسیۆنو کەژەکەی ئەرەیاۋناش نەورۊزو ئېساڵی دەسپنەکەردەی پرۆسێوە تازەو ئەوەکۊشاین و دەسنیشانش کەرد جە ماوەکا ۋېیەردەینە هوتافەو "ڕابەرایەتی ئازادی و گلېرگەی دیموکراتیک"ی نەورۆز گۊرەتەر بۆ و بۆ بە هوتافەو سەرکۊتەی ئەوەکۊشای.

کۆردیناسیۆنو کەژەکەی بۊنەو جەژنەو نەورۆزیۆ ئەرەیاۋنێوەش وەڵا کەرڎۆ. کەژەکە ئەرەیاۋناش بە باوەڕ و قەرارداری بانگەوازو 'ئاشتی و گلېرگەی دیموکراتیک'ی ڕابەر ئاپۆیۆ پێشوازی جە جەژنەو نەورۆزی مکەرا و واتش، گەلوو کوردی جە سەرەتاو مانگۊو ئاداریوە جە ۋەرکۊت، پانیشت، ۋەرنیشت و سەرنیشتوو کوردەسانی و جبەرو وڵاتی ئېرو نەورزۆیشا جۆشدا و بە جۆشو خرۆشێوە گۊرۆ هۊرپڕای ئازادی گێڵنانە.

کەژەکە ڕۊو ئازادی و جەژنەو ژیۋایۊیش جە ڕابەر ئاپۆی، گەشمەرڎا، گەریلا، ژەنی، جوانا و گرڎو گەلا پێرۆز کەرد و واتش: "ئی نەورۆزە ڕێنێسانسو گەلوو کوردی، گەلاو ۋەرکۊتوو مېیامینی و ژەنان. قەناعەتما چامنەن کە گەلەکەما ئی نەورۆزەیە بە دەسپنەکەردەی و هۆشمەندی تازەو ئەوەکۊشای کە چنەشەنە سەرکۊتەی گۊرە بە دەس مارۆ، ئەنجام گیر مکەرۆ."

دەورو سەرمەشقی ئەسپاریان بە گەلوو کوردی

درێژەو ئەرەیاۋناکەو کۆردیناسیۆنو کەژەکەی پی جۊرەنە: "گەلو کوردی کە ٢٦٣٧ ساڵۍ چێوەڵی بە سەرمەشقایەتی کاوەی ئاسنگەری جە بنارو کەشەکا زاگرۆسینە ئېرو ئازادیش کەردۆ و سەرتاپاو کۆیلایەتیش ڕەڎ کەردۆ و ڕزگارکەردەی ۋێش بە ماڕای دەحاقی زاڵمیوە ئەرەیاۋنا، بی بە مەڵامەتوو ڕزگاری تەمامو گەلا ۋەرکۊتوو مېیامینی. دماو ٢٦٣٧ سالا تاریخ هەمان دەورو سەرمەشقایەتیش وستۆ سەرو شانا گەلوو کوردی و ڕزگاری گەلوو کوردیش هۊرچەرخنان پەی ڕزگاری گەلا و ژەنا. پەی ئینەیچ بانگەوازو 'ئاشتی و گلېرگەی دیموکراتیک'ی ڕابەر ئاپۆی پېسە هیوای تازەو ئازادی پێشوازیش ۋنەکریا جە کوردەسان، ۋەرکۊتوو مېیامینی و جەهانەنە.

ڕژێمو قڕکەری بە کوشتەی جوابش داوە

هێزو ڕژێمی قڕکەری پا کۆمکووژییەی جە کۆبانێنە ئەنجامش دا، جوابو گەلەکەیماش داوە کە بە جۆشێوە گۊرە و ئەوەکۊشای ئاشتییوە پێشوازیشا جە نەورۆزی کەرد. کۆمکووژییەکۍ کە وەڵتەر جە مانگەو ئادارینە جە هەڵەبجە، گەرەکەو غازی، قامیشلۆی و عەفرینینە ئەنجام دریۍ، ئارۊیچەنە سەرو گەلەکەیمارە سەپیۆنە. مشۊم خاوەنداری جە خەڵکە کۆمکووژ کریاکەیما بکەرمۍ. مشۊم لایەق بە قوربانیدای گەشمەرڎاما بیمۍ. ڕاو ئینەیچ عال یاواینەین جە ئەوەکۊشای و بەشداربیەین چنەشەنە. پی بۆنۆ گەشمەڕڎا کۆمکووژی هەڵەبجە، قامیشلۆ، گەڕەکەو غازی، عەفرینی و کۆبانێ یاڎۍ مکەرمېوە و ئەرەیاۋنمێش تا هۊرشێونایۆ ڕژێمو قڕکەری درێژە بە قەراری و ئەوەکۊشایما بڎەیمۍ.

بە سەرمەشقایەتی سوپاو گەشمەرڎا و قارەمانا

نەورۆز ژیوایۆین کە ئایندەی بە کرۆکو ۋېیەردەیۆ جە ئامێز گێرۆنە. نەورۆز دلۍ سەختییەکانە گرڎ کاتۍ ۋێش تازە مکەرۆوە، چنی تازەبیەیۆ سەرجە نۆ ئاوەڎان بۆوە و بە سەرجەنۆ ئاوەڎانکەردەیۊیچ زەریفتەر بۆ. هێماو ۋۍ یاوناین بە ڕۊشنایی جە تاریکینە. ئېرو مڎرامانی چنی گەلەکەیما، بە سەرمەشقایەتی ڕابەر ئاپۆی جە سەرمەشقایەتی سوپاو قارەمان و گەشمەرڎە گۊرەکاماوە سەرو بنەمایۍ کە بیەو ۋێش بە حەقیقەتو ژیۋایۍ سەرە مڕەی و زەریفی ٥٢ ساڵەی تاجدار بکەرۆ یاوان بە ڕۊو ئارۊیما. پی بۆنۆ گەشمەرڎا نەورۆزیما مەزڵوم دۆغان، زەکیە ئالکان، ڕاهشان دەمیرەل، بێریڤان-ڕووناهیۍ و سەما یوجەی بە ڕێزو حورمەتۆ یاڎۍ مارمۍ.

بنیاڎنیایۆ و تازە ژیۋایۆ

ڕابەر ئاپۆ ژیۋای ۋێش پېسە سەرجەنۆ ژیۋایۆ گلېرگەی و ژەنۍ گېرت دەس و حەقیقەتو کەسایەتی نەورۆزی و گەلیش بنیاڎنیا. جە دژو ژیۋایۍ غەڵەتی کە سەرو ئی خاکەیۆ سەپیۆنە، چنی حەقیقەتو نەورۆزی کە فەلسەفەو ژیۋایۊین، ژیۋای حەقەتینش بنیاڎ نیا. نەورۆز ئازادییا جە دژو کۆیلایەتی، جە دژو دلېنەبەردەی بیەین و ئینە حەقیقەتمانە. بە پرۆسێوە تاریخیرە موېیەرمۍ. ڕابەر ئاپۆ بە مانفێستۆو 'ئاشتی و گلېرگەی دیموکراتیک'ی پارادایمو نکۆڵی و دلېنەبەردەیش ماڕا و ئەوەکۊشایش فاڕا پەی قۆناغێوە تازەی. بیەو گەلەکەیماش جە ئاستی هەرێمی و مېیاننەتەوەیینە پەسینا. چارەسەرکەردەی پرسەکا ئازادی و ئاسایشیش پڕناوە پەی قۆناغێوە تازەی. چنی ستاتۆو گلېرگەی دیموکراتیکی دینامیکو هەرێمی و جەهانی چارەسەریش ئەرەمەرزنا. ئینە سەرەتاو نەورۆزی و ژیۋایۊیۍ تازەی تاریخیا.

سەردەمو گلېرگەی دیموکراتیکی

چی ڕوۆ نەورۆز کە پێشوازیش ۋنە مکەرمۍ، سەرەتاو پرۆسێوە تازەو ئەوەکۊشاین. سەردەمو ئەرەمەرزنای سیستەمو گلېرگەی دیموکراتیکیا سەرو یۊبیەی ئازادی و یەکسانی ژەنا، گەلا، باوەڕدارییەکا و گرڎو چېردەسا جە دژو سیستەمو دەوڵەت-نەتەوەیی تاکپارێزیا. ئامانجو ئەوەکۊشای ئانەن جە هەرێم تا جەهان، جە جەهان تا هەرێمی جەهانێوە ئازاد بنیاڎ بنیۆ. مەرامشا جە ۋەرکۊتوو مېیامینی و جەهانینە بە هۆشمەندی ئازادییوە بە ئەنەیاوای گەلا ئازادی و نەتەوەیی دیموکراتیکی شێوەگیر بۆ.

درووشم و سەردەمی تازە

هەتا زهنیەتو 'سەرهورداو کوردا سەرکوت بکەردێ-ڕابەرەکاش دلێنە بەردێ' ئانێ کە ڕا رووەو هورشانایۆ پەیوەندییەکا بەینو کوردی و تورکی مکەراوە نەویەرا، ئیمکانو پێکئاردەو ئاشتی هەرێمی و جەهانی نمێ ئاراوە. گەلەکەما جە دژو پیلانگێڵی ١٥و شوباتینە بە درووشموو "نمەتاودێنە ڕووەکاما تاریک بکەردێ' ئەرەپڕا و ڕاستییەکێشا بەروستێ. چارۆنە ئازادی جەسەیی ڕابەریما گرنگترین ئامانج و ڕۆشنترین گوزارشتو چارەسەرییا. درووشموو نەورۆزی 'ڕابەرایەتی ئازاد، گلێرگەی دیموکراتیک' بۆنە درووشمو ئا ئەوەکۆشایە کە جە ئایندەنە زیاتەر گەشە ملەرۆ و سەرگنۆنە.

بانگەوازو گەشکەردەو ئایێرو نەورۆزی کریان

پی مانێ مشۆم ساڵەو ٢٠٢٥ کەرمێنە ساڵێ کە گەلوو کوردی ڕابەرەکەش گێرۆنە باوشی و ئەوەکۆشای یاونۆنە سەرکۆتەی. پەی ئانەی ئی ئیرادە بە گرڏو شکۆو وێشۆ گنۆنە وەڵێ، داواما جە گەلەکەیما، ژەنێ، جوانێ، زاڕۆڵاو، دۆسا و گرڏ کەسێ لایەنگرو ئازادیوازی مکەرمێنە جە گرڏ تەمەنەکانە ئایێرو نەورۆزی کەراوە و ئیرادەو نەورۆزی بە سەرکەوتەی تاجدار بکەرمێ. پەی ئینەی مشۆم حەرکەسێ مچیۆ مێڏانەکا نەورۆزی، هاوارو دیموکراسی هورگێرۆنە و ئەوەکۆشایێ دەس پنەکەرۆنە کە ئازادی جەسەیی ڕابەر ئاپۆی مسۆگەر مکەرۆ. با ئی نەورۆزە بۆ پەیمانو وێ یاونای بە ڕابەریما و مسۆگەر کەردە و ئازادی ژەنێ و گەلا. دماو ٢٦٣٧ ساڵێ با ئی نەورۆزە پەی گەلا و ژەنا بۆ بە مژدێوە سەرکۆتەی. سەرو ئی بنەمێ جەژنەو نەورۆزی جە گەلەکەیما و تەمامو گەلا، بە هێڵەو گەلی و کەسایەتی ئازادی نەورۆز سڵام جە ڕابەرو گەلا ڕابەر ئاپۆ مکەرمێنە و پیرۆزش مکەرمینە."