سیاسەتمەدارە فریال خالدە،  ١٨ کانوونوو دووەمی، وەرڎەموو مەکتەبێوە شاروو کەرکوکینە، بە کرڎەوێوە تیرۊستی بە چەکی بێدەنگ دووۍ بکوشا، تیرۊرە کەرڎە. ئەرەیاونیا بکوشەکۍ دماو ئانەیە ٨ فیشەکۍ بە فریالێوە منیا، دماتر بەرەو یاگێوە نادیارە ڕەما.

چی بارەوە کۊردیناسیۊنوو کەژەکەی ئەرەیاوناێوەش وەڵا کەردۊ و واتش: "دەوڵەتوو تورکی قڕکەری و ژەنکوشی، جارێوە تەر ڕوەی گڵیاوە و تاریکەو وێش کەرکوکنە، بە کوشتەی سیاسەتمەدار و شۊڕشگێڵن فریال جەبارۍ ئاشکرا کەرد. هامڕای گەشمەردێما بە ڕێز و منەتەوە یادە کەرمۍ و خاوەنداری جە کۊشیای ئازادیی سی ساڵەو هامڕێما کەرمێ. وەنەپەرسایوە جە دەوڵەتوو تورکی فاشیستی، خزمەتکار و  بکوشا کەرمێ، ئینە سەروو بنەماو وێپارێزنای کەرمێ. ئی کوشتەیە بەتندی شەرمەزار کەرمێ".

ئەرەیاونایەکە پێسە ملۊ:

"دەسەڵاتداریی ئاکەپە-مەهەپەی فاشیستی، کە بییەن بەڵاو سەروو جیهانی، کۊکوشیی و سیاسەتوو قڕکەرڎەی گەلوو کوردی ساڵەو ٢٠١٣ یۊ، بەتەمامی جە کوشتەی ژەنە سیاسی و شۊڕشگێڵناو کوردی بەردامی مدۊ پەنە. دماو ئانەی ساڵەو ٢٠١٣ پاریسنە کۊکوشیی هامڕا سارێ، ڕۊژبینۍ و ڕوناهیۍ کریا، چاوەختۊ ئەورووپانە و چوارپارچەو کوردستانینە، بە دەیان ژەنۍ سیاسەتمەدارۍ و شۊڕشگێڵنێش تیرۊرۍ کەردێنێ. ئی کۊکوشیێ، بێگومان پەیوەندییشا بە ئاستوو زانابییەی و هۊشیاریی کۊشیای ئازادیی ٥٠ ساڵەو کوردا و ئاستوو سەرمەشقایەتیی ژەناو کوردیوە دلۍ کۊشیای ئازادیوە هەن. دەوڵەتوو تورکی تا ئاستوو کۊشیای ژەنا لاواز کەرۊ پێسە تۊڕێوە کوشتەی هەرمانە کەرۊ. گەرەکشا پی جۊرە کوشتەیا، ژەنا و کوردا جە مدرامان و کۊشیای ئازادیینە گێڵنۊوە و تەرسنۊشا. پراکتیکوو کۊشیای و مدرامانوو ٥٠ ساڵەو ژەناو کوردی، نیشانەش مدۊ، کە دەوڵەتوو تورکی دلۍ کەموکوڵیێوە گەورەینە مەنێنێ. هەر هجووم و کۊکوشیێوە تورکی، فرەتەر ئیرادەو ژەنا قەوەتتەر کەرۊ، قەراردارییشا پەی بەشداربییەی دلۍ خەتەکاو کۊشیای فراوانتەر کەرۊ. بە کوشتەی ساکینە جانسزێ، ڕاش وەرڎەموو ساکینە تازەکانە کەردۊ و بە هەزاران ژەنۍ گەنجۍ نامۍ سارێشا نیێنۍ وێشا و بەشدارۍ دلۍ کۊشیای و شۊڕشی بیێنێ.

دماو کوشتەی هامڕا فریالۍ کەرکوکنە لاو دەوڵەتوو تورکیوە، تەرسی جە کۊشیای گەورە و ژەناو کوردی و دوژمنایەتیی ژەنا هەنە. چەنی ئانەیچە گەرەکشا دەسکەوتوو گەلوو کوردی کەرکوکنە بار بەرۊ،  بەینوو گەلانە ئاژاوۍ وەش کەرۊ، ناکۊکییەکا قووڵتەرۍ کەرۊوە. چی وەختەنە کە جەنگ و ناکۊکییەکۍ سیستموو سەرمایەداری و عەقڵوو پیاسالاری جە وەرکەوتوو دلێڕاسەینە بە وەرفراونی گوزەریۊ، دەوڵەتوو تورکی ڕەگەزپەرس ئیسفادە چینیشا موینۊ و دەسش کەرڎەن بە کۊکوشیی کوردی و ژەنە ئازادیوازا. وەرنیشت، سەرنیشت و وەرکەوتوو سوریاینە، هجوومش کەرڎەن سەروو کەرتە خزمەتگوزارییەکا و چێرخانوو هەرێمەکا ئی هجوومۍ درێژکریاوۍ کۊکوشیی کوردینێ. پیادەکەرڎەی سیاسەتوو نیو عوسمانی و هەوڵۍ فاڕای دیمۊگرافیاو کوردانێ.

پی بۊنەوە، وەنەو گەلی و ژەنە گەنجاو کوردی داوا کەرمێ، پێسە فریالێوە تازۍ بەشدارۍ دلۍ ڕیزەکاو مدرامانی و ئازادی و کۊشیای با، پێسە جوابێوە قەوەت مداوە بە دەوڵەتوو تورکی و زیهنیەتوو پیاسالاری. داوا وەنەو هێزە هەرێمییەکا و ژەنە ساعیب هەڵوێستا دژە سەرمایەداری و پیاسالاری کەرمێوە، بە هەڵوێستەکاشا دژوو سیاسەتوو دەوڵەتوو تورکی قڕکەری مرداوە و هەڵوێس نیشانە بدا".