گەریلاکاو ئازادیی هەڵمەت شاهین و مەمیان ئارمانج و وڵات سەرحەد و حوسەین ئازاد، جە ئۆپەراسیۆنی شۆڕشگێڵنی سەرکەوتەو ٢٣ کانوونوو دووەموو ٢٠٢٣ دژوو سوپای ئەرەگیرەو تورکی هەرێمەکاو خواکوڕکی و گەشمەرڎ دەلیلوو وەرنیشتوو زاپینە و هەرێمەکاو پارێزنای مەدیاینە گەشمەرڎۍ بیێ، لەندەنوو پایتەختوو بەریتانیاینە یاڎۍ کریێوە.

مەراسیمەکە بە بەشداریی کورڎسانییا ناوەندوو جڤاکوو کورڎسانینە بۍ و ڕسموو گەشمەرڎا نریارە و دەورشانە مۆمۍ گیسیێنە.

مەراسیمەکە بە دەیەقێوە ڕێزگێرتەی وەنەو گەشمەرڎا و بەرزکەرڎەیۆ درووشمەکاو "گەشمەرڎۍ مەمرا" و "بژیوۆ مدرامانوو گەریلا"ی و "بژیوۆ سەرۆک ئاپۆ"ی دەسش پەنە کەرڎ.

دمایی سینڤزیۆنێوە دەربارەو گەشمەرڎا شاهین و ئارمانج و سەرحەدی نیشانە دریا.

هامسەرۆکوو مەجلیسوو گەلوو کورڎی بەریتانیانە، ئاسۆ کەمال ئاماژەش کەرڎ بە مدرامانووی گەریلای وەراوەروو هجوومەکاوە و واتش: "گەریلا ئانە ٤٠ ساڵێن تارێخی شکۆداروو کورڎی و کورڎسانی منویسۆوە. هەرگیز هامڕایا و گەشمەرڎاما هۆش مەشاوە، کە جەستەو وێشا کەرڎ بە قەڵغان پەی کورڎسانێوە ئازادی". دمایی جەختش کەرڎۆ کە پێویسا گرڎما شایسۍ کۆشیای گەشمەرڎا بیمێ.

نوێنەروو کەجەدەکە-پانیشت، هامڕا شڤان واتش گەشمەرڎۍ بە ژیوای و مدرامان و وەرمەکاشا ئایندێوە شکۆدارشا پێشکەشوو گەلاو کورڎسانی و وەرکەوتوو دلێراسەی کەرڎ، واتش: ئی شۆڕشە، شۆڕشوو ژەنی، ژیوای، ئازادیین، شۆڕشوو ئینسانیەتین. تا شایسۍ مدرامانی شکۆداروو تارێخی بیمێ، مشۆم دژوو ئەرەگیریی دەوڵەتوو تورکی و خەتەو هامکاریی خیانەتکاری، کۆشیاێوە گەرەتەر کەرمێ. گەشمەرڎۍ میراتێوە شکۆمەندشا پەی جیا ئاستێنمێ، پەی ژیواێوە شکۆمەندی، ڕاو گەشمەرڎاما وەر مەدەیمێ".

مەجلیسوو گەلوو کورڎینە، ئەرجان ئاکبال واتش ئەگەر قۆناغوو نکۆڵیوە جە بیەیۆ یاوێنمۍ قۆناغوو ئازادیی ئانە  سەیەو گەشمەرڎاوە بییەن. گرڎ کورڎێوە بە شۆنکەوتەی ڕاو گەشمەرڎا میاوۆ ئازادی و ژیواێوە شکۆداری.

بە نامۍ تەڤگەروو گەنجە شۆڕشگێڵناو ئینگلتەرایۆ ئاماژە پانەیە کریا بە سەرمەشقایەتیی ڕابەروو گەلوو کورڎی عەبدوڵا ئۆجالانی دژوو مۆدێرنیتەی ئەرەگیری و سەرمایەداری، تارێخێوە شکۆداروو ئازادیی نویسیانۆ و پێویسا گەنجۍ سەرۍ ڕاو کۆشیای ئازادیوە بلا و وەرموو گەشمەرڎاو ئازادیی بارا دی.

یاڎەکە بە بەرزکەرڎەیۆ درووشموو "گەشمەرڎۍ مەمرا" و هەلهەلۍ دماییش ئاما.