لوجنێوە پەی بەیاگەیاونای داواكارییه‌كاو داغی و ئه‌ری وەش کریا
لوجنێوە پەی بەیاگەیاونای داواكارییه‌كاو مەزڵوم داغی و عەبدولڕەحمان ئەری، كه ماوه‌و ٦٢ڕوان زینڎانوو په‌ده‌كەینە، مانشا جە وارڎەی گێرتەن، وەش کریا.
مەزڵوم داغ و عەبدولڕەحمان ئەر، كه لاو په‌ده‌كه‌یۆ گیریێنۍ، ڕۆو١٨ ئایاری‌وه پەی بەیاگەیاونای داواكارییه‌كاشا پێسە: مردنای وشکنای هه‌ڕه‌مه‌كی، تندوتیژیی جه‌سه‌یی، سووكایه‌تیكەرڎەی و سه‌پنای یه‌كپۆشیی زینڎانی، مانشا جە وارڎەی گێرتەن.
به پاو هه‌واڵێوە ئاژانسوو ڕۆژنیوزی، سه‌رۆكوو ده‌سەو مافوو ئینسانوو كوردسانی و ڕاوه‌به‌ری گردینوو زینڎانه‌كا ئەرەیاونانش، لوجنێوە لاو وه‌زیروو هەرمانوکاری كۆمه‌ڵایه‌تیوە پەی بەیاگەیاونای داواكارییه‌كاو داغی و ئه‌ری وەش کریان.
یاگۍ باسینە ڕۆو ۱۷ تەمووزوو ۲۰۱۹، عوسمان کۆسە، وەرپرسێوە گەورەو هەواڵگێریی میتوو تورکی، هەولێرنە کوشیا، دماو ئانەیە پەدەکە دووۍ وەڵاتپارێزنۍ سەرنیشتوو کوردستانیش بە نامەکا مەزڵوم داغی و عەبدولڕەحمان ئەری هەولێرنە گێرتۍ و سزاو قەنارەدایش ملەرە سەپنۍ.
س.ز
