دەنگدایۆ بانگەوازە تاریخیەکەو ڕابەر ئاپۆی دلۍ ۋیروڕاو گرڎی تورکیای و جەهانینە بەردەواما و هۊرسەنگنایش پەی مکریۆ. جە کاتێنە گرڎو لایەنەکا باس جە بانگەوازییەکەی و چێش جە ئایندەنە ڕووەمڎۆی مکەرا، هەرپاسە گرڎ پەرۆشێنۍ کە حکومەت و پەکەکە چنی جوابو بانگەوازییەکەی مڎاوە.

نوویسەر ئیحسان ئەلی ئاچیک سەرو بانگەوازی ڕابەر ئاپۆی و کاروەدایەکا ڕاو گرڎی و تورکیای پەی ئاژانسوو هەواڵوو فوراتی هۊرسەنگنایش کەرد.

ئەلی ئاچیک بە ئاماژەدای پانەی کە بانگەوازییەکەو ڕابەر ئاپۆی بە پاشەکشە نمەزانۆ، واتش: "بانگەوازییەکەو ئۆجالانی پەیوەندیش بە پاشەکشەیۆ نییا، بەڵکم بە پێچەوانۆ نوێنەرایەتی هەڵمەتێوە ئایدیۆلۆژی مکەرۆ. هۊرگیرو کردەوەی فکریی، مڎرامانی و شیکاری تاریخیش ئینا چنە کە ئەر زینانیچ نەبیۍ هەر کەرێش پېسە چنی جە ۋېیەردەنە هەوڵش پەی دابۍ. جە دۊڵەت نەتەوەی جیاواز، ۋېراوەبەری، مافو کولتووری موېیەرۆ و داواو فاڕیایۍ تەمام دیموکراتیکی مکەرۆ. سیستەمێوەش گەرەکا کە سەرو بنەماو ئیرادەو گلێرگەو دیموکراتیکی ئەرەمەرزیابۆ، نەک سەرو بنەماو ویروباوەڕ، ڕەگەز، ئایین، یان کەسێ. ئاڎ پەیلوایش چامنەن کوردیچ متاوۆ جە ژیۋگێوە چامنەنە ۋێش بەربڕۆ. ئینە داواکاریۍ دیموکراتیک و تەمام ڕادیکاڵا."

"پێشئامایە دلېینەیی و دەرەکییەکا پەیڕەو مکەرۆ"

ئەلی ئاچیک ئەرەیاۋناش کە بە تایبەتی ئانۍ کاروەدای ناسیۆنالیستیشا بیەن یووەم کاروەدای ۋێشا بە وتارێوە پەڕ جە سۆزی نیشانەدان و ئاماژەش پانەیچ کەرڎ، کاتش گەرەکا تا ئی لایەنۍ ۋێشا چنی ئی پرۆسەیە گونجنانە و پی جۊرە درێژە بە هۊرسەنگنایەکاش مڎۆ: "ئانۍ کاروەدای ناسیۆنالیستیشا زاڵا، ئینۍ ئاژێوە ڕۆحینە کە ماچا "ئەی چێش سەرو گەشمەرڎەکامارە مۍ، نمەتاومۍ خیانەتشا چنە بکەرمۍ". حکومەت تەنیا بە فشاری دەرەکی متاوۆ مامەڵە بکەرۆ. کاتێوە فرەش گەرەکا تا لایەنە ناسیۆنالیستەکۍ ۋێشا چنی ئی پرۆسەیە گونجنا. جە ۋەرا ۋەرو ئاژەی تازەینە، گرڎ کەسێ هەوڵمڎۆ ڕووەدایەکا جە بەرژەوەندی ۋێشەنە بەکار بەرۆ. ئۆجالان هەرپاسە پەیڕەوی جە پێشئامایە دلېینەی و جبەریەکا مکەرۆ؛ هەرپاسە بە پارادایمەکەیش سەرمەشقایەتی مکەرۆ."

"دیموکراسی ڕادیکاڵ دمایی بە هەژموونو تورکی جە حکومەتەنە مارۆ"

ئەلی ئاچیک بە ئەنەیاوای چانەی کە ئانۍ کەمتەرین ئامادەکاریشا پەی ئی پرۆسەیە هەن، ناسیۆنالیستە تورکەکێنۍ، ئەرەیاۋناش کە ئا دیموکراسییە ڕادیکاڵەی کە باسش چۊوە مکریۆ گۊرەتەرین گورزە چی بەشیە مڎۆ و واتش: "لایەنە ناسیۆنالیستەکۍ تورکی کەمتەرین ئامادەکاریشا پەی ئی پرۆسەیە هەن. چونکی دیموکراسی ڕادیکاڵ دمایی بە هەژموونو تورکی جە حکومەتەنە مارۆ، بەڵام ڕا بە هەژموونو کوردیچ نمەڎۆ. ماچۆ: ڕا بە باڵادەسی هیچ بەشێوە جە جبەرو ئیرادەو گلېرگەی دیموکراتیکی نمەڎۆ، گرڎ لێوە بە تەمامی یەکسان مکەرۆ."