مامۊسێوە ناڕازییە هەولێرنە بە شێوێوە گوماناوی مەردە
جیهان تەها مامۊسێوە وانەواچەی ناڕازییە، شەوەی وەڵینە دەگاو هەڤنکاینە سنووروو پارێزگاوی هەولێرینە بۊنەو وروێڵیای و سۊتەی سەیارەکەیشۊ گیانش جەدەس دا، ڕوودایەکەیچ بە گوماناوی نامۍ بریۊ.
شەوەی وەڵینە، یوە جە مامۊستا وانەواچە ناڕازییەکا بە نامۍ "جیهان تەها"یۊ، دەگاو هەڤنکاینە سنووروو پارێزگاو هەولێرینە، سەیارەکەش وروێڵیا و ئاویرش گێرت و مەردە، وەلۍ ئانە یاگۍ سەرەنجێنە، ماوۍ وەڵۍ ئی قۊمیایەنە تۊڕەو کۊمەڵایەتیی فەیسبووکینە باسوو مەرگوو وێش کەردەن و نویستەنش "ڕێکێم ڕووەو مەرگینە، مەرگ چڕایم چڕۊ".
جیهانە ٣٥ ساڵۍ بۍ، دوۍ کوڕێش بە نامەکاو بارانی و بیرهاتیوە بێنۍ، ماوەی وەڵیننە جە ڕاو بەرنامێوە تەلەفزوێنییوە ڕەخنەی تندش وەنەو دەسەڵاتی و شێوازوو مامەڵەکەردەیشا چەنی مامۊسایە وانەواچا گێرت و داواو مافوو وانەواچاش کەرد.
هەڵای زانیارییەکۍ سەروو مەردەی "جیهان تەها"ێوە سەرەتاییێنۍ و پێسە ڕووەداێوە ئاسایی هاموشۊی باس کریان، وەلۍ تۊڕە کۊمەڵایەتییەکاوە گومانی سەروو وروێڵیای سەیارەو مامۊسێکۍ وەشە بیێنە و هەنۍ ماچا کە ڕووداێوە ئاسایی نییا.
هاموەخت دەسەو داکۊکی جە مامۊستایا و فەرمانبەرە ناڕازییا بارەو مەردەی مامۊستا جیهان تەهاێوە، ماچا: "هەواڵوو مەرگوو مامۊسای وانەواچۍ ڕەخنەگێری حەقواچۍ (جیهان تەها ) بە کارەساتوو سەیارەی سەرجەموو مامۊسایاش خەمبارۍ کەردۍ، وەلۍ هومێد کەرمۍ ڕووەداێوە ئاسایی بۊ و دەسوو کەسیش پەشتیوە نەبۊ".
