خەڵاتو پایزی ڕۆمانێوە ڕەخنەیی- کۆمەڵایەتیەنە بە قەڵەمو ئامینە ڕەحیمی ئەشناسیێ ب (ژوان)ێن کە یوەم جار ساڵەو (١٣٩٧ ک.ڕ)ی جە لایەنو وڵاوگەو زایەڵە-یوە چاپ و وەڵاو کریانەوە و ئیسەیچ بە ئا هۆکارە وانیارێ فرێش بیێنۍٚ هەر جە لایەنو ئا وڵاوگەیەوە یاواێنە بە چاپی دوەم. جاری یەکەم ڕۆمانەکە سەرو ئەرکو نۋیسەرۍ و ئی جارەیچە بە پاڵپەشتی پوڵیی و دارایی رێکوزیاو ۋاران-ی جە هەورامانو دیمو پانیشتییەنە، چاپ و وەڵاو کریانەوە.

ئی ڕۆمانۍٚ کە ۲۱۲ لاپەڕێنە، فرەتەر باسو ئا گرفتا و کۆسپا کەرۆ ئینەی سەروو ڕاو چینوو ژەنێوە کۆمەڵگا سۆنیەتنیەکانە بە تایبەت هەورامان و کوردەساننە. چی ڕۆمانێنە ئەبەر گرفتایێو پێسەو وێ سۆچنایوەو ژەنا، دەسدرێژی، وەرگێرتەی جە دەرس وەنایو کناچا، تن و تێژی ملوو ژەنارە(چە ڕۆحی چە لاشەیی) و...باس کریەینێ و کێشیەینێ چالش.
کەسایەتی مێحوەری ڕۆمانەکێ کناچێوەنە بە نامێ هەنارێ، هەنارە هەر چن گیرێ فرێ ئینەی سەروو ڕایشۆ بەڵام گژیۆ، پەی مافی ئێنسانی و پەی ئامانجەکاش و ئاخر سەر یاوۆشا پەنە، هەنارە دەرگیرەو دڵمەردەیی و زەجرانێوە ڕۆحینە کە جەرەیانوو دەسدرێژینە و وێ سۆچنایوەو ئەدایشنە تۆششا ئامێنە، بەڵام تەوەلۆدێو دووبارەنە وێش یۆزۆوە و سەرگنۆ...

کوڵە زانیاریێ سەبارەت بە نۋیسەرۍٚ کە وێش نۋیستەن:

ئامینێ ڕەحیمی-یەنا، ئەژناسیێ بە ژوان-ـە، پاییزو ۱۳۷۰ ک.ڕ شارو هەورامانو تەختینە جەئەڎێ بیێنا و هەر هەوراماننە دەرسم وەنان، تا ساڵەو ٨۹ کە ڕشتەو بیۆلۆژینە لوانێ زانشتگا کوردسانی جە شارو سنەی. ساڵەو ۹۰ تۆشوو نەوەشی ئێم ئێسی ئامێنا و ژنەوایی و لوای ڕانەم جە دەسم دان.
ساڵەو ۹۳ ک.ڕ هەرمانەی ئەدەبیەم دەس کەردێنە پەنە.
کتێبێ چاپ کریێ؛ 
۱.تەرجومەو (بوف کور)ی جە نۋیستەی سادق هیدایەتی جە فارسییەوە  پەی زوانی هەورامی، بە نامێ؛  بایەقوشی کۆر/ ئەوین، مەریوان، ۱۳۹٥

۲.ڕۆمانەو؛ قووڵ پێسەو غەریبی کاڵێ/چاپوو یۆوەمی؛ ئارمان نگار، تاران، ۱۳۹٦/ چاپوو دوەمی؛ چیا، تاران، ۱٤۰۰

۳.ڕۆمانەو خەڵاتوو پایزی/زایەڵە، مەریوان، ۱۳۹۷/چاپی دوەم، ۱٤۰۱، زایەڵە، مەریوان

٤.ڕۆمانەو دێڕ بە دێڕ حەسرەت/نارین، بۆکان، ۱۳۹۹

٥.کۆمەڵە شێعرۍٚ نەوۍٚ، بە نامێ؛ یاسینەو سەرەمەرگو تیشکێ/نەماد ئەندیشە، تاران، ۱٤۰۰

ڕۆمانەکێم ڕەخنەیی-کۆمەڵایەتیێنێ، سەرو گرفت و مافی پاشێل کریاو ژەنان جە کۆمەڵگاو کوردستانی و هەورامانیەنە...

وتارێ چاپ کریێ؛
۱. کاریگەری ژەنێ ملو فەرهەنگیرە؛ گاهنامەو ڕۆژانوو زانشتگاو ڕازی کرماشانی.

۲. ژەنی و هەمبەشی سیاسی و ئابووری، کتێبو ئاوەزیار-ی.