هجومە ئەرەگیریەکۍ دەوڵەتو تورکی پۍ سەرو هەرێمەکا پارېزناو مەدیای وەردەوامېنۍ. جە هەرێمو زاپ، چەمچۆی و سیدای، دەوڵەتو تورکی بە گرڎو قوەتیشۊ و گرڎ جۊرە تەکنیکېوە هجوم کەرۊنە سەرو مېڎانەکا گەریلای. یۊ چا گەریلایا بە مدرامانۍ گۊرۊ وەرپەرچو ئا هجوماشە داوە هیوا سنەبۍ. جەنگەوان هیوا سنە قسېش پۍ ئاژانسەکەیما کەرڎ و چنەشەنە هورسەنگنایش پۍ هجومەکا دەوڵەتو تورکی و مدرامانو گەریلای کەرڎ.

هیوا سنە؛ ئاماژەش پانەی کەرڎ کە دەوڵەتو تورکی سەرەڕاو گرڎو توانا و دەرفەتەکاش وەران ۋەر بە مدرامانو گەریلاینە دەسەپاچە و بێچارەن و ئەرەیاۋنایچش: "جەنگ و مدرامان پېسە خنجەرێوە چەقېنە دڵو دوژمنیرە. جەنگ هەم جە مېڎانەکانە و هەم جە سەنگەرەکانە قورسایی فرەش وستەن سەرو دەوڵەتو تورکی. ئێمە بە گیانێوە فیداییوە کۊشیەیمۍ. چی ئۊپەراسیۊنەنە راسی دوژمنی ئاشکرا بیەن. بە گرڎ جۆرێوە هجوم کریا سەرو هەڤاڵاما. بەڵام نەتاۋاشا ئیراڎەما ماڕا. وەختو ئانەی ئامان کە ئا وەعدەی بە پارتەکەیما و رابەر ئاپۆیما دان بەرمېش سەر. پۍ پارېزناو کەشو وەرخەلۍ ئێمە مېڎانەکانە بېنمۍ. شایەتو ئەنجامدای تاوانەکا جەنگی بېنمۍ. ئا تاوانۍ ئیسە وەرو چەماماوە کریا. ئا سەروازۍ کە بەشڎاری ئۊپراسیۊنەکەیشا کەرڎەبۍ گوایە چنەئاماتەرین سەروازۍ دەوڵەتو تورکی بېنۍ، بەڵام وەران ۋەر بە مدرامانی ئاپۆیی مەتاۋا جەنگ کەرا. وەختۍ گۊششا جە گولانەتەرین دەنگی بۊ دەس جە سەنگەرەکاشا هورگېراو بڕەما. راسی دەوڵەتو تورکی پی جۊرەنە.

دوژمن دماو ئانەی دیش مەتاۋۊ ئەنجام بەدەسبارۊ، گەرەکش بۍ کە ئەرەگیری زیاتەر وەرفراوان کەرۊ. جە ١٥و ئەیلولینە دوژمن بە کۊبرا، فڕۊکەی جەنگی و فڕۊکەی جاسوسی ئاما سەرو تونێلەکا گەشمەرڎە فەلاتی. هاموەخت سەروازەکېچ هجومشا کەرڎ سەرو مېڎانەکا گەشمەرڎە فەداکاری و گەشمەرڎە ئاگری. ئامانجو ئاڎیشا بریتی بۍ چانەی ڕاگری جە دەسوەردای هەڤاڵا کەرا. بەڵام تیمەکۍ دلۍ کامپەکا و هەڤاڵا دلۍ سەنگەرەکا بە شێۋېوە پرۊفیشناڵ دەسوەردایشا کەرڎ و ناستشا کە سەروازەکۍ ۋېشا بیاۋنا بە تونێلەکا جەنگی. وەختۍ سەروازەکۍ هجومشا کەرڎ، هەڤاڵەکېما بە شێۋېوە گیانبازانە وەرپەرچشا دېوە و زەرەرۍ گیانی فرەشا ئەو دوژمنی دا. دەوڵەتو تورکی سەروازە کوشیۍ و زامڎارەکۍ ۋېش جیائاستۍ و کیشیاوە. پۍ ئانەی بتاۋا بەیانۍ سیدا جارێوەتەر بۊمبۋارانو مېڎانەکەیشا کەرڎ، بەڵام هەمڎیسان نەتاۋاشا ئەنجام بەدەس بارا.

جەنازەو سەروازەکاشا ماوەو چن ڕوۋېوە چا ئاستۊ دماجاریچ جەنازەکېش سۊچنۍ. دوژمن هجومەکاشنە فرە چەکی کیمیاۋیش بەکارئارڎ. وەران ۋەرو ئا هجومانە راو ۋېما زیاتەر حېقم کەرېنمۍ. مزانیۊ کە بەکارئارڎەو چەکی کیمیاۋیی تاوانەو جەنگینە. سەرەڕاو ئانەیچ دەوڵەتێوە ئەنڎامو ناتۊی مەتاۋۊ وەران ۋەر بە گەریلای جەنگ کەرۊ. ئێمە پېسە گەریلای وەردەوام بە گیانۍ فیدایی جەنگ کەرمۍ. چېش بۊ با بۊ، گەریلا وەردەوام سەرکۊتەیش پۍ ۋېش بە بنەما گرتەن. ڕا مەڎۊ کورڎسان ئەرەگیرکریۊ".

هـ . ش