گەریلاکاو هەپەگەی ئۊرهان لۊتۊس و ئارمانج کۊلیس بارەو مدرامانوو ١٤ تەمووزیوە قسێشا پەی ئاژانسوو هەواڵوو فورات (ANF)ی کەرڎۍ.

ئۊرهان لۊتۊس: جە ٤٢ەمین ساڵیاڎوو ١٤ تەمووزینە مدرامانی گەورەو ڕۊچۍ مەرڎەی، کە بە سەرمەشقبییەی هامڕا کەمال، خەیری، عەلی چیچەک و عاکیف یەڵماز کریا و مۊرەو وێشدا وەنەو تاریخی، جە کەسایەتیی ئا هامڕایانە گردوو گەشمەرڎاو شۊڕشی یاڎ کەرمێوە بە بیرڎێنمەوە و وەرڎەموو یاڎیشانە سەرەما کۊمنمێرە. ١٤ی تەمووزی تاریخوو کوردسانی و ئینسانیەتینە دەورێوە خاسش هەن. ئارۊیچنە شێوازوو کۊشیایما دیاری کەرۊ. هەڵوێستوو جەنگاوەریی پەکەکەی بە مدرامانوو زینڎانوو ئیمراڵیوە ئاما ئاراوە و یاوا بەرزتەرین قولۍ. ئیسەیچ خولقنەروو ئا مدرامانی جە هەلومەرجێوەنە، کە دژوارتەرا جە زینڎانوو ئامەدی یانۍ جە زینڎانوو ئیمراڵینە مدرامان کەرۊ. پەی زیاتر جە ٢٧ مانگا ملۊ دەچێت کە حیچ دیدارێوە چەنی ڕابەر ئاپۊی نەکریان و نمازا یەک قسەیچش بۍ جبەر. وەڵتەر زینڎانوو ئامەدینە واچێنۍ 'بەتورکی قسۍ کەرە و زیاتەر قسۍ کەرە' ئیسەیچ نمازا یەک قسەش بۍ بەرۊ. 

ڕابەرایەتیما ئیمراڵینە بەرڎەوام ئینا مدراماننە وەراوەروو سیاسەتوو پاکتاوکاری و سڕیەیۊ و بۊ بە ساعیبوو هێزێوە، کە ئێمەچ ڕاشۊ وێما بونیاڎ منیەیمۍ. ئی مدرامانە ئیساتۍ تونێلەکاو جەنگینە کریۊ. ڕابەر ئاپۊ وێگێری کەرۊ، ئێمەیچ متاومۍ وێگێری کەرمۍ، پەوکایچ هامڕێکێما زاپ، ئاڤاشین و مەتینا و هەموو مەیڎانەکانە مدرامانی ئەفسانەیی کەرا. ئا ڕۊحە جە کەسایەتیی ڕابەر ئاپۊینە دەسش پەنە کەرد و جە سەرمەشقایەتیی ئاڎینە وەڵۍ کەوت. ئێمە ئینایمۍ چەنی مدرامانوو ڕابەر ئاپۊی، ئانۍ کە دەماروو ویژدانیشا هەن وەڵاتپارێزنێنۍ مشۊم وەراوەروو ئا کۊکوشییانە ساعیبوو هەڵوێستی با و وێگێری کەرا. چون وەراوەروو فاشیزمێوە، کە ئینسنانیەتی مەشناسۊ و دژوو ئینسانیەتی گژیۊ جەنگ کەرۊ و گەرەکشا ئینسانەکا دلێنە بەرۊ، تەنیا یەک ورچنییەی هەن ئاڎیچ مدرامانا.

قەناعەتما هەن، کە گەلەکەما ئانۍ کە دەنگما مژنەوا بەشداری مدراماننە کەرا و عەلەمەو سەرکەوتەی شۊکناوە. کۍ بۊ با بۊ؛ مشۊم سەرە بەرز کەرۊوە، وێگێری کەرۊ و کۊشیای تند کەرۊوە. سەرجەنۊ گەشمەرڎاو ١٤ تەمووزی و سەرجەموو گەشمەرڎاو شۊڕشی یاڎ کەرووە و وەراوەرشاوە سەرەیم کۊمنوورە. بە گیانوو ١٤ تەمووزی ملمۍ سەروو هەرمانۍ و هومێدوو سەرکەوتەی پەی گردلایۍ موازوو. 

'دەنگوو مدرامانی زینڎانەکاوە بەرز بۊوە'

ئارمانج کۊلیس: مدرامانوو ١٤ تەمووزی جە کەسایەتیی کەمال پیر، عاکیف یەڵماز، محەمەد خەیری دورموش و عەلی چیچەکینە دەنگش داوە. جە کەسایەتیی ئا قارەمانانە گردوو وێگیراو ئا سەرڎەمییە یاڎ کەرمێوە، سەرەما ئاستشانە کۊمنمێرە. ئا هامڕۍ کە ساڵەو ١٩٨٢ سەرباروو دەرفەتی و توانای کەمی، چارەسەرشا جە ڕۊچۍ مەرڎەینە دیۊ. تا بیاوا بە ئازاڎی وو ئا بنەمێچۊ تا گەشمەرڎەبییەیشا درێژەشا بە مدرامانی دا. ئا مدرامانە جە ساڵەو ١٩٨٢ەوە تا ئارۊ کریۊ سەرچەمەکەش ئا قارەمانێنۍ. سەرۊکایەتی ماچۊ: 'هێزوو وێم جە گەشمەرڎاوە ورگێروو'، ٢٤ ساڵێن ڕێبەر ئاپۊ زینڎانوو ئیمراڵینە بێوچان مدرامان کەرۊ. سەرۊکایەتی ڕۊحوو وێش سەروو بنەماو ئازاڎی بونیاڎ نیان، ئەرەگیرۍ مەتاوا ئیراڎەو سەرۊکایەتی ماڕا. چی سەرڎەمەنە سەنگەرەکاو جەنگیچەنە ڕۊحوو مدرامانوو ١٤ تەمووزی هەن. هەرپاسە ئەرەگیرۍ گەرەکشانە زینڎانەکانە ئیراڎەو کورڎایەتی ماڕا و زەنگۊڵێش پەنە بدارە. وەروو ئانەی ئا ئیراڎە سەرچەمەکەش پەی ئا قارەمانا گێڵۊوە، ئا ئیراڎە مەمەڕیۊ. جارێوە تەر یاڎوو ئا هامڕایا کەرمێوە، ئێمە قەرزارۍ ئا قارەمانانمۍ. سەروو ئا بنەمێوە درێژە بە کۊشیایما مدەیمۍ و تا یاوای بە سەرکەوتەی پەی ئازاڎیی گەلا کۊشیەیمۍ".

س.ز