بێدەنگی دەسەڵاتی سیاسی هەرێموو کورڎەسانی جە ۋەرا ۋەرو هرووژم و ئەرەگیریەکانە پاسشەکەردەن کە دەوڵەتو تورکی ئەرەگیری زیاتەر بێنە دلۍ خاکو پانیشتوو کورڎەسانی، ئینەیچ بیەن بە مایۍ ناڕەحەتی تەماموو چین و توێژەکا گلېرگەی، دژ بە هرووژم و ئەرەگیریەکا دەوڵەتو تورکی هەر یۆ جە چالاکا بوارو ژیۋگەی مامۆسا ئازاڎ ئەحمەد و چالاکا بوارو گلېرگەی مەدەنی مامۆسا ڕێبوارعەبدولکەریم پەی ئاژانسوو هەواڵوو فوراتی(ANF)ی  قسېشا کەردۍ.

'مەراموو دەوڵەتو تورکی ئەرەگیرکەردەو پانیشتوو کورڎەسانین'

مامۆسا ئازاد ئەحمەد باسش چانەیە کەرد بەهانەکۍ دەوڵەتو تورکی ئەرەگیری بێ بنەمېنۍ و مەرامش ئەرەگیرکەردەی تەمامو پانیشتوو کورڎەسانیا و واتش: " ئا لەشکرکێشیا شەرمەزار مکەرو کە کریانە سەرو خاکو  پانیشتوو کورڎەسانی، مەراموو دەوڵەتو تورکی ئەرەگیرکەردەو پانیشتوو کورڎەسانی و دلېنەبەردەی ژیۋگەکەیشا، بەداخەوە حکومەتو هەرێموو کورڎەسانی و حکومەتو عێراقی هەتا ئیساتۍ بێدەنگېنۍ ۋەرا ۋەر بە لەشکرکێشی و ئەرەگیریەکا سوپاو تورکیای. جە کاتێنە ئینە پاشێلکەردەی سەروەری خاکو عێراقیا و ئشیۍ ئامێنۍ دەنگ و ڕاشا چی لەشکرکێشییە گێرتۍ."

'دەوڵەتو تورکی ژیۋگەو کورڎەسانی وێران مکەرۆ'

مامۆسا ئازاد ئەحمەد جە درێژەو قسەکاشەنە ئاماژەش پانەیە کەرد جەنگ جە هەر شۊنێنە ڕووە بڎۆ ژیۋگەکەی وێران مکەرۆ بەڵام دەوڵەتوو تورکی ئەرەگیری مەرامشا ژیۋگەو پانیشتوو کورڎەسانی شێونۆ و واتش: " دەوڵەتو تورکی جە هەر شۊنێنە کە باڵادەسا سەرەتا هەوڵو تێکدای ژیۋگەی و سەرچەمە ئاوییەکا مڎۆ پەی ئانەی پېسە شۊنێوە مرۆیی نەمەنۆ و مرۆڤ نەتاوۆ چا شۊنێنە ژیۋای بکەرۆ."

جە دما دمایی قسەکاشەنە مامۆسا ئازاد ئەحمەد باسش چانەیە کەرد: " ئەرکو گرڎیمانە چ پېسە مامۆسای و چالاکا، ڕۆشنۋیر، پارت و لایەنە سیاسیەکا بێدەنگۍ نەبیمۍ جە ۋەرا ۋەرو ئەرەگیریەکا دەوڵەتو تورکینە، هەڵوێسی یۆگێرتەما بۆ دەنگما بیاوۆ بە ناوەنڎە جیهانییەکا، دژوو ئی لەشکرکێشیەو دەوڵەتو تورکی کە ئەنجامش مڎۆ سەرو خاکو پانیشتوو کورڎەسانی بێدەنگۍ نەبیمۍ و هەڵوێسما بۆ."

'دەوڵەتو تورکی مەرامش دلېنەبەردەی کوردین'

مامۆسا ڕێبوارعەبدولکریم باسش چانەیە کەرد ئەرەگیریەکۍ تورکیای تازۍ نیەنۍ و بەهانێچش پەکەکە نیا ئا دژوو گرڎوو کوردین و واتش: " گەر ئا کەشۍ یەنەکە، یا جمیەرو فاڕیای یا هەر لایەنێوە تەرشا چنەبۆ ئاڎ هەر هرووژمش مکەرۆ سەر چونکی ئاڎ مەرامش دلېنەبەردەی کوردین. ڕێکەوتننامەو ١٠٠ ساڵەو لۆزانی دمایش ئامان ئەرەگیریەکۍ دەوڵەتو تورکی درێژە مکێشا و هەوڵی ئەرەگیرکەردەو هەولێری و کەرکوکی، موسڵی مڎۆ. ئاڎ فراوانوازی مکەرۆ بە هەمان ئەقڵێتوو سەردەمو خەلافەتو عوسمانی کار مکەرۆ کە دژوو میرنیشینەکا بۍ. داخەم مەشۆ ئیساتۍ دلۍ کوردینە ئاژێوە وەشبیەن ئانەی وەڵۍ دووژمنی گنۆ جە نیشتیمانپەروەرەکەی زیاتەرا. میرنیشینە کوردییەکۍ بە مەڵامەتو خیانەتو دلێینەیۆ وڕۍ، ئیساتێچ گەر خیانەت نەبۆ درۆنی تورکی نمەتاوۆ بێنە وێگەو بۆردوومان بکەرۆ و خەڵکی گەشمەرڎە بکەرۆ."

'بەمەڵامەتوو دراما تورکییەکا و ۋەننگە تورکییەکاوە زاوڵەکېما ئاشناو تاریخو کوردی نیەنۍ'

جە درێژەو قسەکاشەنە مامۆسا ڕێبوار عەبدولکریم سەرنجش وست سەرو ئانەی کە نەوەکێما جە ڕاو میدیای و فیلمە تورکییەکاوە بانۍ بە هۊرگیرو کولتور و پەروەردەو ئاڎیشا و ئاشنۍ نمەبا بە تاریخو کوردی واتش: "چېگەنە ئێمە کەمتەرخەمېنمۍ جە بڕۍ ڕوانگێوە زاوڵەکېما بەردەوام تەماشەو فیلمە تورکییەکا مکەرا، زاوڵەکاما وزمۍ ۋەننگە تورکییەکا، چنی بۆ زاوڵەکاما بوزمۍ ۋەننگە تورکییەکا کە بە ئاوەزو ۋێشا پەروەردەشا مکەرا. ئیساتۍ جە زاوڵێوە کوردی پەرسە شێخ سەعیدی پیران کێن نمەشناسۆش بەڵام نامۍ فیلمی تورکی و ئەکتەری تورکیش فرە بە عالی مشناسۆشا."

جە دمادمایی قسەکاشەنە مامۆسا ڕێبوارعەبدولکریم باسش چانەیە کەرد متاومۍ دژوو ئی ئەرەگیریا دەوڵەتو تورکی ۋێنیشاندای بکەرمۍ و دەنگما بیاونمۍ بە گلېرگەی مېیاننەتەوەیی و واتش: " دەوڵەتو تورکی گرفتش چنی بیەو کوردی هەن و گەرەکشا بە هەر جۆرێ بۆ دلېشەنە بەرۆ. مەنەیۆ پەکەکەی جە کەشەکانە ماناو پارېزنای و مەنەیۆ قەوارەو هەرێمین؛ گەر پەکەکە چا نەمەنۆ داعش و نوسڕەش چنە با چنی چەنی ئانیشا بژیومۍ؟."