کەمۍ چېۋەڵتەر، جە هۊڵو خاکی، مەراسیمو چۋارەمین ساڵیاڎو گەشمەرڎەی سەرمەشقی دیار غەریبی بەبەشڎاری هامخەبات و ئەنڎاما تەڤگەری ئازاڎیی و ۋڵاڎپاريزا دەسشپنەکەرڎ.

ئارۊ، هۆڵو خاکیەنە جە شارو سلێمانی، مەراسیمو ساڵیاڎو گەشمەرڎەی سەرمەشقی دیار غەریب ئشناسیا بە هەڵمەت گاباری، بەبەشڎاری دەیان ۋڵاڎپارېزا و ئەنڎاما تەڤگەری ئازاڎیی و هامخەباتاش بە دروشمەو گەشمەرڎۍ مەمرا، دیار مەمرۊ دەسشپنەکەرڎ.

سەرەتاو مەراسیمەکەی بە دەیەقېۋە مرڎای پۍ ڕێزگرتەی جە ۋنەو گەشمەرڎا دەسش پنەکەرڎ و وتارەو کەجەکەی ۋنیاۋە و چنەشەنە ئامابۍ: دەوڵەتو فاشیستی تورکیای، کە دەوڵەتێوە جەنگی تایبەت و قڕکەر و کۊکوژا، جە ۋەران ۋەر بە کۊشیای و مدرامانو گەلوو کورڎی و تەڤگەری شۆڕشگێڵینە، بۍ چارە مەنەن و یاۋان بە ئاستو هەرە لاوازی ۋېش.

جە وتارەکېنە ئانەیچ ئامابۍ، هەڤاڵ دیار دماو بەشڎار بیەیش جە تەڤگەرکەیمانە بە فیداکاری و دڵسۆزی و بەڕۆحییەتێوە ۋڵاڎپارێزیی و شۆڕشگێڵیوە بەشڎاری گرڎو بوارەکا خەباتی و کۊشیای بۍ، یۊ چا هەڤاڵابۍ کە لۋابۍ مېڎانو سەرۆکایەتی و جە لاو ڕابەر ئاپۆی پەروەردەیش دیەبۍ، گەرەکش بۍ جە نزیکۊ ڕاسینەو فیکر و فەلسەفەو سەرۆکایەتی یاۋۊنە و جە کەسایەتی ۋېشەنە بەرجەسەش کەرۊ.

دماتەر 'تارا ‌‌‌حسێن'ە، هامسەرۊکەو تەڤگەری ئازاڎیی قسېش کەرڎۍ و ۋاتش: وەختۍ ژیایی و ژیۋای گەشمەرڎە هەڵمەتی ۋەنیۊ، دماو چن ساڵېوە کەمی جە بەشڎاربیەیش و هۊرگېرتەو  پەروەردەی سەرۆکایەتی، بەماۋېۋە کەم ۋېش بۊ بە سەرمەشق و پەروەردە مڎۊۋە  بە ۋڵاڎپارێزا.

جە درېژەو قسەکاشەنە ۋاتش: هەڤاڵ دیار بە پیمەرەکاو ڕێزگېرتەیش جە ژەنۍ، ۋەردەوام بۍ جە کۊشیای و حیچ وەختېۋە ۋېش بە زایە نەڎۍ، هەمیشە شۊنەو چارەسەرییرە گېڵۍ پۍ پەرسو کەسێتی و دماتەر قۊرتەکا گلېرگەی و سیاسەتی، گەرەکش بۍ جە ورچەرخنای تاکینە ورچەرخنېۋە فکری گەشە پنە بڎۊ.

قەرار پاسەن جە درېژەو مەراسیمەکەینە، چنڎین وتارۍ تەرۍ و سینەفزیۆنێوە جە بارەو ژیای و ژیۋای گەشمەرڎە دیاریوە پيشکەش کریا.

هـ . ش