ژەناو مەخموری هرووژمەکۍ دۆڵەتو تورکی ئەرەگیری و چەتەکاش پەی سەرو ۋەرنیشتوو کوردەسانی بە تنی شەرمەزار مکەرا و داوا جە دۆڵەتا جەهانی مکەرا، دڎان بە مافەکا گەلوو کوردیرە بنیا.
ژەنا کەمپو پەنابەرا گەشمەرڎە رۆستەم جودی جە مەخمور سەبارەت بە هرووژمەکا سەرو ۋەرنیشتی قسێشا پەی ئاژانسوو هەواڵوو فوراتی کەردۍ.
روخۆش عەفرینە جە سەرەتاو قسەکاشەنە ئانەش وست ڕووە کە ئاڎۍ بە قۆناغێوە دژوارەرە موییەرانە و واتش، "بە تایبەتی دماو وڕای رژێمو سوریای ئێمە ئێمە ئینایمۍ ئاژێوە دژوارەنە. ساڵۆو مەنەی و نەمەنەیمانە. ئاژەو ۋەرنیشتی پی جۆرەنە، جە لێوە ئا هێزەی یاگۍ رژێمیش گێرتەنۆ، جە لێوەتەرۆ ئەمریکا و روسیا وهتد.. کە گوایە ۋەرنیشتی پارێزنا، بەڵام هیج نمەکەرا و گرڎ سیاسەتا. ۋەرو ئانەی مشۆم پېسە گەلوو کوردی عال ویر بکەرمێوە، ئەر چی کاتەنە چێوۍ پێوەر بنیەیمۍ عالا، ئەر نا دۆڕنمێش. قەناعەتما هەن کە جە سەیەو گەشمەرڎا و جەنگەوانانە نەدۆڕنمێش. ئێمە پېسە گەلوو کوردی و بەتایبەتی ژەنا ئانەی گنۆ ئەستۆما مکەرمێش. رەنگاتی بە جەسە چا نەبیمۍ، بەڵام ئێمە بە رۆح و دەنگو ۋێما ئینایمۍ چنی ۋەرنیشتی".
روخۆش عەفرین جە دما دماینە سەرەڕاو بەربڕیەی پەشتیوانی ۋێش پەی ژەنا و جەنگەوانا ۋەرنیشتی، هیواو سەرکۊتەیش پەی واستۍ و داوایچش کەرد کورد جە گرڎ شۆنێنە پەشتیوانی جە ۋەرنیشتی بکەرا.
' با گرڎما ئەرەپڕمۍ'
رێزبار چەلیە جە بارەو هەمان مژاریۆ قسێش کەردۍ و سەرەتا سڵامش ۋنەو مڎرامانوو ۋەرنیشتی کەرد و واتش، "ئێمە پېسە گەلی جە سەرنیشت، پانیشت، ۋەرکۊتوو کوردەسانی داواکارێنمۍ ئێمەیچ ئشناسنامێوەما بۆ. چونکی ئێمە نەتەوێوەنمۍ، مشۆم ئێمەیچ سەرو ئاستو جەهانی بشناسیەیمۍ و دڎانما بنریۆ پۆرە و بیمۍ بە خاوەن ماف. داوا جە گرڎو دۆڵەتا جەهانی مکەرمۍ، پەشتیوانی جە گەلوو کوردی بکەا. ئا دۆڵەتۍ پەشتیوانی جە ئەردۆغانی و هرووژمەکاش پەی سەرو ۋەرنیشتی مکەرا، شەرمەزار مکەرمۍ. پەی پارێزنای مافەکاو گەلوو کوردی و بەتایبەتی جە دژو هرووژمەکا سەرو گەلوو ۋەرنیشتی مشۆم گرڎ کوردۍ جە گرڎ شۆنێنە ئەرەپڕا و هۊرزا سەرو پەیا و یۆبیەی و یەکڕیزیی ۋێشا سازبکەرا و دمایی پا ستەم و زۆردارییە بارانە".
