شەقایق نەورۊزی، چالاکی سیاسی سەبارەت بە گۊشەگیری سەروو ڕابەروو گەلوو کوردی عەبدوڵڵا ئۊجالانی داواش کەرڎە، کە وەرپەرسانە مامەڵە کریۊ و بە پێویستیچش زانا سەرجەموو چالاکاو مافەکاو ئینسانی چا بارەوە هەڵوێستشا بۊ.
جە قسەکەرڎەێوەشنە پەی ئاریەن تی ڤی شەقایق نەورۊزییە باسوو گۊشەگیریی تندوو سەروو ڕابەروو گەلوو کوردی عەبدوڵڵا ئۊجالانیش کەرد، کە ماوەو زیاتەر جە دووۍ ساڵان حیچ هەواڵێوەش نیا و واتش: "بە ڕاو من بابەتەکە پەرسێوە ئینسانیین، وەختێوەیچ ماچمۍ مافوو ئینسانین، بۊنەو ئینەیوە گردوو چالاکاو مافوو ئینسانی وەرپەرسێنی چەنەش و مشۊم کارڎایوەشا بۊ. پێویسا گردوو ڕێکوزیایەکاو مافوو ئینسانی حەرنۊعێوە بۊ چا چالاکییەنە بەشدارۍ با".
ئا چالاکە سیاسیۍ داواش کەرڎە، کە بە مەبەسوو وەشکەرڎەی فشاری سەروو دەوڵەتوو تورکیوە تا دمایی بە گۊشەگیری ئیمراڵیینە باریۊ، داواش کەرڎە گردووئاستەکانە هەوڵەکا هەسۍ کەراوە.
دەقوو قسەکاو شەقایق نەورۊزۍ چالاکۍ سیاسیێ
خاتوو نەورۊز، پێسە مزاندۍ بەڕێز عەبدوڵڵا ئۊجەلان دووۍ ساڵێن ئینا زیندانداننە، نزیکەو دووۍ ساڵان حکومەتوو تورکیای ڕاش بە پارێزنەر و بنەیانەکەیش نەدێنە سەرڎای بەڕێز ئۊجەلانی کەرا و ئادیچ ئینا گۊشەگیریی ڕەهانە. ورسەنگنایتا چێشا؟
" ئا مەسەلۍ کە سەروو بەڕێز ئۊجالانیرە ئامێنە، بەتایبەتی دووە ساڵی ویەرڎەنە، کە گرد نۊعۍ چەمپەنەکەوتەیشا وەنە قەدەغە کەرڎەن، بە ڕاو من پەرسێوە مافوو ئینسانینە، وەختێوەیچ ماچمۍ هینەو مافوو ئینسانینە، بۊنەو ئانەیۊ گردوو چالاکاو مافوو ئینسانی وەرپەرسێنۍ چەنەش و مشۊم کارڎایۊشا بۊ. پێویسا گردوو ڕێکوزیایەکاو مافی ئینسانی حەر نۊعێوە بۊ چا چالاکییەنە بەشدارۍ با. وەلۍ بەتایبەتی ئەگەر گەرەکما بۊ تەماشەو ئا بابەتەیە کەرمۍ، کە تایبەتا بە ژەنی، ژیوای، ئازادی و ئا جمیەر و ئەرەپڕایە، کە دلێشنە بەشدارێنمۍ، پەرسەو سەرکرڎەکاو ڕەوتە ئەڵتەرناتیڤەکا پێسە بەڕێز ئۊجەلانی و ئا هەڵوێستا پەی گردوو جمیەرەکەیما گرنگیێوە تایبەتییشا هەن، بەتایبەتی جمیەرە ڕزگاریوازەکۍ. گەرەکما واچوو تەنانەت گرووپە ئەڵتەرناتیڤەکۍ تەرێچ، کە قەرارشا دان ئاخرۊ هێزەکاشا وزا یۊ و سەرکەوتەی پەی گرد لایۍ وزا وەڵۍ وەرپەرسبییەیشا بۊ. ئانە کە ملوو یۊ چی سەرکرڎارە مۍ دێت کە نوێنەرایەتیی یۊ جە جمیەرە ئەڵتەرناتیڤەکا کەرۊ، پەی ئێمە فرە گرنگا. بە ڕاو من ئی دۊخە ئاما سەروو بەڕێز ئۊجەلانیرە پەی گردوو گرووپە ئازادیوازەکا گرنگا".
چی قۊناغەنە کە هەڵمەتەو ئازادکەرڎەی بەڕێز ئۊجەلانی دەسش پەنە کەرڎەن،هەرمانەو چالاکا چێشەنە و مشۊم چێش کریۊ؟
"بە ڕاو من خراپتەرین چێوۍ، کە ئیساتۍ ڕووەش دێنە ئانەن، کە چالاکاو مافوو ئینسانی بە هەڵوێستێوە دوورۊ تەماشەو ئا بابەتەیە کەرا، کە سەروو بەڕێز ئۊجەلانیرە ئامان. تەنانەت متاوو بواچوو ئا گرنگی و ئەرک و بەشدارییەشا نەدان، کە پێویسا کەراش.چێگەنە پەرسەو میدیای گرنگەنە، پەرسەو بەکارئارڎەی قۊڵە میاننەتەوەییەکایچ گرنگەنە تا حکومەتوو تورکیای وەرپەرس کەرۊ چانەیە کە کەرۊش، ئینۍ گرد گرنگێنۍ و پێویسشا بە هەرمانێوە سەرتاسەریۍ هەن، چی نەکریان، نیشانۍ پرسیارێنە، کە پێویسا گرنگییش پەنە بریۊ".
