پەڕلەمانتارو مێردینو دەم پارتی کاموران تانهان جەختش چانەی کەرڎۊ کە مشۆم ئازادی جەسەیی ڕابەر ئاپۆی پێكبێنە، هەل ومەرجەکۍ پەیوەندی نیارەی چنی لایەنە سیاسی و کۆمەڵایەتییەکا بڕەخسیۆ، بە بێ دماکۊتەی هەنگامەکۍ بنریا پەی دیموکراتیکبیەو تورکیای.

کاموران تانهان جە دیڎارێنە چنی ئاژانسەکەیما باسش چانەیە کەرڎ، ڕابەر ئاپۆ جە پرۆسەو ئاشتینە کارەکتەرێوە سەرەکییا؛ پەی ئینەیچ پەنەوازا ئازاڎی جەسەیی ئاڎیی دەسەبەر بکریۆ و واتش: "فرە گرنگا ئاژەو ئازاڎیی پەی سەرکردەکا ڕەخسیۆنە. بەڕاسی دەورو ئێژا ئۆجالانی پەی دیموکراتیک کەردەی و  چەسپنای ئاشتی کۆمەڵایەتی جە تورکیانە هیچ مشتومڕێوە هۆرنمەگێرۆ. ئێژا ئۆجالان جە ئیمراڵینە زینانیا ئینەیچ کۊسپێوە گۆرە وەش مکەرۆ ۋەردەمو پرۆسەو ئاشتینە."

جە بەردەوامی قسەکاشەنە تانهان سەرنجش وست سەرو قەرارو ٢٠١٥و دادگاو مافەکا مرۆڤو ئەوروپای دەربارەو ئاژەو ڕابەر ئاپۆی، هایاتی کایتانی و جڤان بۆلدانی و جەختش کەردۆ چانەی مشۆم تورکیا پێوەس بۆ پا قەرارەیۆ و ئینەیچش وات: "نمەبۆ 'مافو هیوا'ی تەنیا جە چوارچێوەو گفتوگۆکەردەینە سەرش مەنۆوە. هەرپاسە جە ساڵۆو ٢٠٢٤ینە جە ئەنجامو داواکاری ئەنجومەنو پەڕلەمانتاراو کۆنسەو ئەورووپاینە، پێوەس بە جابەجێکەردەی مافو هیوای ماوەو ساڵێو کات بە تورکیای دریا. بێگومان ئی پرۆسە تەنیا پێوەس بکریۆ بە 'مافو هیوا'یۆ ئانە ئاژێوە کەموکوڵیا و نیا یاگۍ ۋێشەنە. ئێژا ئۆجالان چی پرۆسەنە کارەکتەرێوە بنەڕەتییا و مشۆم دەورش چی ڕوانگۆ بە ۋەرفراوانی هۆرسەنگیۆ. مشۆم هەلومەرجو چەمپنەکۊتەی چنی لایەنە سیاسی و کۆمەڵایەتییەکا بڕەخسیۆ. ئی ئەرەنیشتۍ کاریگەریێوە ئەرێنی سەرو پرۆسەکەیۆ منیۆرە."

جە دما دماینە تانهان دەسنیشانش کەرڎ مشۆم پەی ئازادی ڕابەر ئاپۆی فاڕیای یاسایی ئەنجام بڎریۆ و واتش: " متاویۆ سەرو 'مافو هیوا'ی یان ئازاڎی جەسەیی  یاساکۍ هەموارۍ بکریاوە، بەڵام تا ئیساتۍ هیچ نەکریان، دەسەڵات چی مژارەنە قەرارش نەگرتەنەنە ۋەر. هەڵبەتە بە دڵنیاییوە مشۆم هەموارکەردەیۆ و ڕاسکەردەیۆ یاسایی ئەنجام بڎریۆ."