بە سەرمەشقی پەیەدەی، جە شارو حەسەکەی، چالاکییەکۍ فۆرومی ئاخېزو ١٩ و تەمموزی بە درووشمەو "١٩ و تەمموزی: ئاخېزو ژەنۍ و گەلا و گەرەنتی سوریای دیموکراتیک"ی لۋاڕاۋە.

دماو قسۍ پێشوازی جە لایەنو هامسەرۊکەو نۋیسینگەو رێکوستەی پەیەدەی، پەروین یوسفە، حەرپاسە هامسەرۆکو نۋیسینگەو ڕێکوستەی پەیەدەی جە کانتۆنو فوراتی، ئەحمەد خۆجە؛ هامسەرۆکو پەیەدەی، ساڵەح موسلیم وتارېش پێشکەش کەرڎ و باسش جە گرنگی ئاخېزو سەرنیشتو و ۋەرکەوتوو سوریای کەرڎ.

ۋاتش: "ئاخېزو ١٩ و تەمموزی، ئاخېزو سەرهۊردای گەلا و ئاخېزو ڕای یەرەمېن، ئارۊ دماو ۋیەرناو ١١ ساڵا، ئا فاڕیۍ کە جە گلېرگەنە ڕۋەمڎا، ۋېش جە ۋېشەنە ئاخېزېۋەن".

ئاماژەش پانەی کەرڎ: "ئاخېزەکەما جە کۆبانێوە دەسش پنەکەرڎ بە ئامانجو پارېزناو گلېرگەی و ژەنۍ جە هێزە هەژمووندار و ستەمکارەکا، گرڎ لایۍ سەرسامېنۍ بە ڕێکوستەی و ۋېڕاگری ئی ئاخېزیە ۋەران ۋەر بە گرڎو هجومەکا. ئانەیچ جە سایەو هەزاران گەشمەرڎا و تێکەڵبیەی ۋنەو پێکئاماکاوە بەدیئاما، ئینەیچ برایەتی گەلان".

ئەرەیاۋناش: "پەنەوازەن ئاخېز و بەدەسئامایەکاش پارېزنمۍ، مشۊم بزانمۍ پۍ چی ١١ هەزار گەشمەرڎۍ گیانو ۋېشا بەخشا، هەڵایچ عالتەرین گەنجەکېما جە سەنگەرەکانە ئەرەکۊشا و ۋەردەوامېنۍ جە ئاخېزی".

حەرپاسە تەئکیدش سەرو درێژەدای بە ڕاو گەشمەرڎا پەی ئارامی و ئاشایس و گەلا کەرڎۊ.

١٩ و تەمموزی ئاخېزېۋە جیان

حەرپاسە هامسەرۆکو مەجلیسو جابەجېکەرڎەی ئیدارەو ۋېڕاۋەبەری سەرنیشتو و ۋەرکەوتوو سوریای، حەمدان عەبد، مبارەک بایی یاڎو ١٩ و تەمموزیش جە گرڎوو گەلا کەرڎ و ۋاتش: "چن ڕۋۍ چېۋەڵتەر یاڎو گەشمەرڎا ١٤ و تەمموزیما کەرڎۊ، ئارۊیچ یاڎو ئاخېزو ١٩ و تەمموزی کەرمېۋە".

ئاماژەش کەرڎ بە مەڵامەتو شکسو ئاخېزەکا تەری و ۋاتش: "مەڵامەتو ئی شکسەیە نەبیەی ئامانجی ئەساسی ئاخېزەکا بۍ، ئانەی ۋېش نامۍ نیابۍ ئۆپۆزیسیۆن جە ڕاو ۋېش لاشدا".

حەرپاسە ۋاتش: "دڵۋەشېنمۍ کە نەۋۍ ئاخېزو ١٩ و تەمموزینمۍ، ئاخېزو برایەتی گەلا و ژیای هامبەشی. ئێمە جە ڕاو ئۆپۆزیسیۆنی و ڕژێمی دوورۍ کۊتیمېۋە و گرڎما دەورو بازنېۋەنە کۊبیەیمۍ".

تەئکیدش کەرڎۊ: "ئاخېزو ١٩ و تەمموزی جیاوازا جە ئاخېزەکاتەری، سەرەتا و دەسپێکېۋە ڕاسەقینەن پۍ ئاخېزو گرڎو گەلا".

حېقم کەرڎەی سیستمو پارېزنای گەرەنتی ئاخېزیا

فەرمانڎۍ یەپەژەی، ساریا عەفرینە، مبارەک بایی ئاخېزو ١٩ و تەمموزیش کەرڎ و ۋاتش: "سەرەتا ئاخېزو ١٩ و تەمموزی مبارەک کەرمۍ جە ڕابەرو گەلوو کورڎی عەبدوڵا ئۆجالانی و گرڎوو گەشمەرڎا ئاخېزی و شۆڕشگێڵا و ئەرەکۊشا، ئی ئاخېزە جە ۋېشۊ ناما دی، بەڵکم ۋەرهەمو ڕەنج و ئەرەکۊشای ڕابەر عەبدوڵا ئۆجالانیا".

ۋاتش: "وەختۍ ئاخېز هۊرگیرسیا، گەلە کۊششکەرەکەما بە توانېۋە کەمۊ تاۋاش ئاخېز ڕاۋەبەر کەرۊ، ئی گەلە قارەمانە سەلەمناش ڕۆڵەکېش پەروەردە کەرڎېنۍ پۍ لۋایۊ گژۍ هەژموونو سیستمی و ئەرەگیری تورکی و چەتەکا داعشیرە".

حەرپاسە ڕۊشنش کەرڎۊ: "ئی ئاخېزە بیەن بە نموونېۋە پۍ تەمامو دنیۍ، مەڵامەتو نامەنیایش بە ئاخېزو ژەنا، ۋەرهەمو کۊشیای و عەشقۍ شۆڕشگێڵی ژەنا فیڎاکارین، ڕێکوستەکەیما (یەپەژە) بە ژمارېۋە کەمۊ دەسشپنەکەرڎ و ئیسە بیەن بە سوپېۋە پۍ ڕزگارکەرڎەی هەرێمە جیاوازەکا و هەزاران ژەنېش هانی دۍ پۍ بەشڎاربیەی چی ئاخېزەینە".

جە دمادماینە ۋاتش: "مشۊم سیستمو پارېزناو ۋېما حېقم کەرمۍ پەی مسۆگەرکەرڎەی ئاخېزو ۋەرنیشتی کە ئاخېزو ژەنېن، حەرپاسە پەی بەدیئامای ۋەرمو گەشمەرڎا و ۋینایۊ ڕابەری دلېمانە".

هـ . ش