ئەندامو مەجلیسو ڕاوەبەری پارتو ژیۋای ئازادی کوردەسانی (پەژاک) سیامەند موعینی جە ڕاو ئاژانسوو هەواڵو فوراتی (ANF)یۆ هۊرسەنگنایش پەی کاریگەری و دەرەنجامەکا جەنگو ئیسرائیل-ئێرانی کەرد سەرو هەرێمەکەی. هەرپاسە پېوەس بە کاریگەری و دەرەنجامەکا جەنگەکەیۆ بانگەوازش پەی ێۊگێرتەی گرڎو هێزە کوردیەکا کەرد  و جەختش چانەیە کەرڎۆ پېسە پەژاکی جە گرڎ ڕوێوە ئاماڎێنۍ پەی پارېزنای گەلی.

موعینی دەسنیشانشکەرڎ چنی جەنگو ئیسرائیل-ئێرانی قەیرانەکې ۋەرکۊتوو مېیامینی پڕێنێوە پەی قۆناغێوە تەری و واتش، ئی جەنگە سەرو بنەماو بەرژوەندییەکا سیستەمو دۊڵەت-نەتەوەیا، کە بە گرڎ جۊرې نکۆڵی جە گەلا و فرەڕەنگییەکا مەکەرا و هەوڵو دلېنەبەردەیشا مڎا.

موعینی ئاماژەش پانەیە دا جەنگو ئیسرائیل-ئێرانی جەنگ و ناکۆکییەکا هەرێمەکەی قورستەر و ئاڵۆزتەر مەکەرۆ و ئەرەیاۋناش ئی جەنگە خزمەت بە ئازادی گەلا نمەکەرۆ، ئانەی هەن دەرەنجامو حساباتەکا هەژموونو هەرێمی هەردووە دۊڵەتەکەیا.

موعینی ئەرەیاۋناش پېسە پەژاکی هەوڵمڎا گەلو کوردی جە دەرەنجامە خراپ و کاولکاریەکا جەنگی پارېزنا و دەسنیشانشکەرڎ پېوەس بە جەنگ و دەرەنجامەکاشۆ گرڎ کاتێ بە گرڎ شێوێوە ئاماڎێنۍ.

موعینی ئانەیچش یاڎ ئاوردۆ گەلو ئێرانی عەیامېوەن ئینا چېرو فشارو دۊڵەتو ئێرانینە و توشو قەیرانێوە ئابووری سەختیش کەردێنۍ و واتش: "پەنەوازا گەلاو ئێرانی و بەتایبەت گەلو کوردی ۋێشا پەی ئی پرۆسەیە ئاماڎە بکەرا و پەنەوازا گەلو کوردی جە یۊبیەی و ڕێکوستەینە با و پېوەرە هەنگامە بنیا. ئەر جە گرڎ ڕوانگێوە ئاماڎۍ نەبیمۍ، ڕەنگە ڕژێمو ئێرانی بە ستەمی فاشیستیانەو ۋێشۆ هرووژم بکەرۆ سەرو گەلەکەیما. پۊکەی ئەرکی بنەڕەتییما پارېزنای گەلەکەیمانە."

موعینی جەختش سەرو ئانەیە کەرڎۆ کە جە ڕووی سیاسی و سەروازییوە جە دژو گرڎ جۊرە دەسوەردایۍ جە دژو گەلی ئاماڎێنۍ و واتش: "ئەر هەر جۆرە هرووژمېوە بکریۆ سەرو گەلەکەیما ئانە ئێمە جە گرڎ ڕوێوە ئاماڎۍ جوابدایۆ هرووژمەکا هەنمۍ."

سیامەند موعینی داواش جە گرڎو هێز و پارتە سیاسییەکا ۋەرکۊتوو کوردەسانی کەرڎ جیاوازییە سیاسی و ئایدۆلۆژییەکاشا وزا لاوە و پێوەرە چی پرۆسەنە جماوە و واتش: "پەنەوازا گرڎو هێزە کوردییەکا چی پرۆسەنە جیاوازییە سیاسی و ئایدۆلۆژییەکاشا وزا لاوە و پېوەرە یەک بەرەنە با. ئامانجو ئی بەرەیچە پەنەوازا پارېزنای گەلەکەیما بۆ جە ۋەرا ۋەرو هرووژمەکا ڕژێمینە."