پەی یۆھەمین جاری کامیۆنێو ھەنارێ ھەڵەبجەی یاوێ بەریتانیا. هەر بە یاوای هەنارەکان بەشارو (ولڤەرھامتۆن)ی و وەڵاوبییەی هەواڵەکەی، ژمارێو هاموڵاتیێ کوردێ ئەرەنیشتێ ئا وڵاتەیە شیێ یاگێ کامیۆنەکەی و سەرجەم وازیارێ بەدەستوستەی هەنارەکان بێنێ. بەڵام هەنارەکێ کەمێ بێنێ بەشو خەڵکەکەیشان نەکەردێ، پۆکەی بڕیار دریا جە ئایندەی نزیکەنە چەنڎین کامیۆنێ تەرێ هەنارێ هەڵەبجەی ڕەوانێ (ولڤەرھامتۆن)ی و شارەکێ تەرێ بەریتانیای بکریانێ.

جە هەڵەبجە و هەورامان، نزیک بە ٩ هەزار دۆنمێ باغە هەنارێ هەنێ و ساڵانە زیاتەر جە ٢٥ هەزار تەنێ هەنارێ بەرهەم ماوەرانێ. هەنارێ هەڵەبجەی و هەورامانی بە کوالیتەتەرین جۆرێ هەناریەنێ جیهانەنە و نامبانگشان کوردستان و جیهانەرە وەڵاو بییەنەوە. جە هەڵەبجە و هەورامان چەنڎین جۆرێ هەنارێ بەتامێ و ئاودارێ بەرهەمێ ماوریانێ کە گرتەرینێشان ئینێنێ: (ساڵەخانی، مەلەسی، کەوە هەنار، مێوەش، تشە هەنار، لاسیاوە یان لاڕەشە).

جە هەڵەبجە و هەورامان، سەرەڕاو ئانەیە ساڵانە نزیک بە ٢٥ هەزار تەنێ هەنارێ بەرهەم مارویانێ، بەڵام حکومەت و دەسەڵاتدارێ و سەرمایەدارێ هەرێمو کوردستانی و ئێراقی گرنگیشان بە ناوچەکەی و هەناری نەڎان و تا ئیسە کارگا و سەردخانەی تایبەت بە هەناری ناوچەکەنە نییەن و بە ئا هۆکارە ساڵانە هەزاران تەنێ هەنارێ فەوتیانێ و یان تاڵان و هەرزان ورەشێ مەکریانێ.

خاوەن باغە هەنارەکێ داوا جە حکومەتەکێ هەرێمی و ئێراقی و سەرمایەدارێ ناوچەکەی و کوردستانی و ئێراقی مەکەرانێ، تا سەردخانێ و فابریکێ تایبەتێ بە هەناری جە ناوچەکەنە دروستێ بکەرانێ. هامکات هەوەڵ بڎانێ هەنارێ هەڵەبجەی و هەورامانێ ڕەوانێ وڵاتێ و بازارەکێ جیهانی بکریانێ و بە ئی تەوەرە ڕا جە زیانکەوتەی جە هەناری بگێریۆن و هەم هیتیارێ و خاوەن باغە هەنارەکێ، هەم هاموڵاتیێ و حکومەت و سەرمایەدارێ زیاتەر جە  هەناری سودمەندێ ببانێ و هاموەختیچ مەبۆنە بە هاندەر پەی باغدارێ و هیتیارێ و هاموڵاتیێ تا زیاتەر گرنگی بە هەناری بەرهەمە وێمانەکان بڎانێ و جە بەرهەمی هاوردەی بیانی دوورێ بگانێوە. 
هەر پۆکەی کیاستەی هەنارێ هەڵەبجەی پەی بەریتانیای، هەنگامێوە گرنگەنە پەی باغدارە هەڵەبجەیەکان و سودی ماددیش چنە هۆرمەگێرانێ و هانشان مڎۆنە زیاتەر گرنگی بە باغداری بەگردی و هەناری بە تایبەتی بڎانێ.