پەیامەکەو نێرگس محەمەدیێ لاو کیانا ڕەحمانیێ کناچێشۆ بەفەڕەنسی ونیاوە و پەلیانەی ڕسمیی ئەرەمەرزیاو نۆبڵی وەڵاش کەرڎەنۆ، جە پەیامەکەشنە ئا چالاک و ڕۆنامەوانە ٥١ ساڵێ سوپاسوو کۆمیتەو نۆبڵی نەرویژییش کەرڎەن.

نێرگس محەمەدییە جارێوە تەر ڕەخنەش جە حیجابی بەزۆری ئێراننە گێرت و داواش وەنەو کاربەدەساو ئا وەڵاتەیە کەرد، کە وەرپەرسیارانە مامەڵە کەرا.

ئا چالاکە زینڎانیکریێ واتش ، "حکومەتێوە کە  ٤٥ ساڵێن  گلێرگەنە هەژاری و نەداری پەرە پەنەمدۆ، حکومەتێوەن کە بە سیاسەتوو جەنگەرانی، مەنتێقەکەنە و جیهاننە ئاشتی و سەقامگیری وزۆ چێروو تەرسێوە".

نێرگس محەمەدییە ١٣ جارێ گیریێنە، ٥ جارێ بە گردیوە ٣١ ساڵێ سزای زینڎانی و ١٥٤ سزێ قامچییش پەی بڕیێنێوە. جە ساڵەو ٢٠١٢وە ئینا زینڎاننە.

نێرگس محەمەدییە جە پەیامەکەشنە واوەی واتش، "پێسە گەلوو ئێرانی ئێمە دیموکراسی، ئازادی، مافەکاو ئینسانی و یەکسانیما گەرەکا. کۆماری ئیسلامی وەرڎەموو ئا داواکارییە نەتەوەییانە، گەورەتەرین وەربەس و لەمپەرا. هەوڵێ مدەیمێ واوەی شکۆو ئێرانی و شکۆو ئینسانیەتی زینڎە کەرمێوە. سەرکەوتەی ئاسان بەدەس نمێ، وەلێ بەمسۆگەری بەدەس مێ".

مەزانییۆ کە نێرگس محەمەدییە بە چە شێوێوە پەیامەکەش کیانان بەروو زینڎانی.