٦٤ ڕوێن مەزڵوم داغ و عەبدولرەحمان ئەر دژوو فشاری، ئەشکەنجەی و سەپنای یەکپۊشی زینڎانوو پەدەکەینە هەولێرنە  مانشا جە وارڎەی گێرتەن. بۊنەو خراپیی دۊخوو تەندروسیی داغی و ئەری و ئا هەڕەشاوە سەروو ژیوایشاوە هەنۍ، بنەیانەکێشا پەی جەنزیکۊ هاگاداربییەی جە دۊخوو ڕۊڵەکاشا، چند ڕوۍ چێوەڵتەر یاوۍ پانیشتوو کورڎسانی. بنەیانەو داغی و ئەری بە مەبەستوو کۊکەرڎەیۊ پەشتیوانی و پاڵپەشتی سەروو بڕۍ پارتە سیاسییاشا دا و پارتە سیاسییەکێچ بە ئامانجوو بەروستەی پاڵپەشتی هەولێرنە سەروو بنەیانەکا مدا.

چا چوارچوەنە ئارۊ کارگێڵنوو مەکتەبی سیاسیی یۊبییەی نەتەوەیی دیموکراتیکوو گەلوو کورڎسانی شاخەوان خالید و ئەنداماو مەکتەبی سیاسی جەلال ئیسماعیل و هەڤاڵ هەرێم، سەرۍ نوێنەرایەتیی هەدەپەیشا هەولێرنە دا و نوێنەرایەتییەکەنە چەنی بنەیانەو داغی و ئەری کوۍ بیێوە. دیدارەکەنە پەشتیوانیی وێشا پەی بنەیانەو زینڎانییا ئەرەیاونا.

'دۊخی تەندروسییشا خراپتەر بۊ' میانەو سەرڎایەکەینە ئەداو مەزڵوم داغی، قودرەت داغە قسێش کەرڎۍ و واتش، "دۊخوو کوڕەکەیم زینڎاننە فرە خراپا. زینڎاننە وستێنێشا دلۍ تیرۊرستاوە. کە ئادۍ تیرۊریستۍ نییەنۍ، ئادۍ زینڎانیۍ سیاسیێنۍ. پەی بەیاگەیاونای داواکارییەکاشا زینڎاننە، مانشا جە وارڎەی گێرتەن و ڕۊ دماو ڕۊی تەندروستییشا خراپتەر بۊ".

دماتەر ئەداو عەبدوڵرەحمان ئەری فاتمە ئەرە قسێش کەرڎۍ و واتش، "دۊخوو ئێمە خاس نییا، بۊنەو کوڕەکاماوە مەزانمۍ کەی ڕۊن، کەی شەوەنە. دۊخشا فرە خراپا. ئادێشا وستێنۍ دلۍ چەتەکاو داعشی. پێسە ئانەی تیرۊریستۍ با مامەڵەشا چەنی کەرا، پەنەوازا داواکارییەکێشا بەیاگۍ یاونیا.".

مامۊو مەزڵوم داغی، حەمید داغیچ واتش، کە داواکاریی ئادیشا ئانەن، مافوو داغی و ئەری زینڎاننە پاشێل نەکریۊ. داغ واتش: "ئانە یەرەم جارا زینڎاننە مان گێرا. ئانەیچ بییەن مایۍ تێکشییەی تەندروستییشا. گەرەکما نییا دلۍ چەتەکانە بازاشاوە. گەرەکمانە بە پاو یاسۍ بلا دەموو داواکارییەکاشاوە".

لێوە تەرۊ کارگێڵنوو مەکتەبی سیاسیی یۊبییەی نەتەوەیی دیموکراتیکوو گەلوو کورڎسانی شاخەوان خالید پەشتیوانیی وێش پەی داواکاریی بنەیانەکاو داغی و ئەری ئەوەخوای کەرڎۊ. خالید داواش کەرڎە، کە داواکارییەکاو هەردووە زینڎانییەکەی بەیاگۍ یاونیا.

س.ز