جە زینڎانەکا دەوڵەتوو تورکینە جە کوردسان و تورکیانە، پاشێلکەردەی مافوو زینڎانییە نەوەشەکا بەردەواما.  بە پاو جەمەو مافەکا مرۆڤی (ئیهەدە) جە زینڎانەکانە ١٥١٧ زینڎانیۍ نەوەشۍ هەنۍ و ٦٥١ چا زینڎانیا ئینۍ ئاژێوە سەختەنە.

هام وتەواچوو کۆمیسۆنوو زینڎانیا ناوەندی ئیهەدەی پارێزنەر یوسف ئەردۆغان، جە بارەو کێشەکا زینڎانیە نەوەشەکاوە پۍ ئاژانسوو هەواڵی فورات (ANF)ی قسێش کەردۍ و واتش: "پېسە جەمەو مافەکا مرۆڤی چا وەختۆ وەشۍ بیێنمۍ، حۊڵمادان پاشێلکارییەکا ۋەران ۋەر بە زینڎانیا نەوەشی سەلەمنمۍ و کەرمێش بە گوزارشتە. پۍ دمایی ئاردەی بە پاشێلکارییەکا ۋەرا ۋەر بە زینڎانیا هەرمانە کەرمۍ. چی دماییانە جەمۍ قۊرتۍ جە زینڎانەکانە زیاڎشا کەردەن. زینڎانەکۍ بیێنۍ پا یاگۍ کە زینڎانیکریێکۍ گیانوو ۋێشا چنەشەنە جە دەس بڎا. جە دژوو مافە ژیۋاییەکا زینڎانیا، جەمێوە پاشێلکەردەی بە قەراری دەستەیی چەمڎاری ڕاوەبەری زینڎانەکا ملۊ ڕاوە، پېسە گۆشەگیری، دەرمان نەکەردەی زینڎانیا، ئەشکەنجەی و هەرمانۍ خراپۍ. حەرپاسە ئاستەنگ کەردەی وەختوو وەردای زیندانیا و مەردەی گوماناویی".

زینڎانییە نەوەشەکۍ گیان جە دەس مڎا

یوسف باسش چانەی کەرد، پەیوەس بە وەردای زیندانیە نەوەشەکا، دەزگاکۍ سەر بە وەزارەتوو دادگای، گوزارشتەی زانستی و بابەتی ئاماڎە مەکەرۆ و دەسنیشانشکەرد کە زینڎانییە نەوەشەکۍ بە تایبەت ۋەروو هەڵوێسوو دەزگاو پزیشکی دادی ئازاڎۍ مەکریا.

یوسف ئانەش ویرئاردۆ، ۋەروو گوزارشتەو 'متاوا جە زینڎانەنە مەناوە'و دەزگاو پزیشکی دادی، چنڎین زینڎانیۍ نەوەشۍ گیانشا جە دەسدان و واتش: " دەزگاو پزیشکی دادی، بە تایبەت پەیوەس بە وەردای زینڎانیا نەوەشی بیەن بە تاکە یاگۍ قەراردای، و مەڵامەتێوە گەورەو ئاستەنگکەردەی ئازاڎ کەردەی زینڎانیا نەوەشی و سیاسەتمەداران. ئینەیچ بیەن بە مەڵامەتوو ئانەی چنڎین زینڎانیۍ نەوەشۍ گیان جە دەس بڎا ".

جە دما دماینە یوسف ئەردۆغان ئاماژەش پانەی کەرد، کە پەنەوازا دەوڵەت، ئاستەنگیەکا ۋەردەموو، وەردای زینڎانییە نەوەشەکا گردی لابەرۆ، دەزگاو پزیشکی دادی نەکریۆ بە تەنیا یاگۍ قەراردای و داواشکەرد زینڎانیە نەوەشەکۍ بەبێ شەرت ئازاڎ بکریا.