پارتوو دیموکراتوو کورڎسانی جە نزیکبییەیۊ یەکڕیزی و یۊبییەی نەتەوەیی لایەنە سیاسییەکاو کوردی تەنگەتاو بییەن، پێسە هامکارێوە ئەرەگیری گردوو هەوڵەکاو ویش هەسۍ کەرڎێنیوە پەی تێکدای ئا یەکڕێزی و یۊبییەیە کە وەش بییەن. جە دماین هەرمانەشنە ئانە بۍ کە ڕاشگێرتە جە لوای شاندێوە پانیشتوو کورڎسانی پەی وەرنیشتی، پەی بەشداریکەرڎەی جە کۊنفراسوو میاننەتەوەیی لۊزانی.

 ئەبوبەکر هەڵدەنی، ئەندامی دەستجەکارکێشیاوەو پەرلەمانوو هەرێموو کورڎسانی، جە دمایین چەنەدوای میدیایی باسوو ئا ڕاگێرییاشە کەرد کە پارتوو دێموکراتوو کورسان( پەدەکە)ی کەرڎێنۍ جە لوای ئەنداماو مێماناو کۊڕبەندوو لۊزانی جە پانیشتۊ پەی قامیشلۊی و وەرنیشتوو کورڎسانی. هەڵەدەنی ماچۊ:" هه‌رێموو كورڎسانینە بژیوی، وەلۍ پارێزگاروو سلێمانى و خانمەو یوەموو عێراقی ڕاسا نەدریۊ پەنە بلا پەی قامیشلۊو كورڎسانی پەی كۊنفرانسێوە سه‌روو لۊزانی‌".

جە شەش و حەوتوو ئی مانگێنە وەرنیشتوو کورڎسانینە پەی ماوەو دووۍ ڕوا، کۊنفرانسی میاننەتەوەیی لۊزانی بەسیا بە دەیان مێمانۍ ئەکادیمی و سیاسیۍ سەرنیشت و وەرکەوتوو سوریای و کەسۍ میاننەتەوەیۍ بەشدارۍ بێنۍ، قەرار بۍ چند مێمانێوە پانیشتۊ بەشدارۍ با، بە پاو قسەکاو ئەبوبەکر هەڵەدەنی هەڤاڵ ئەبوبەکر پەرێزگاروو سلێمانی و شاناز ئیبراهیم ئەحمەدە خانمەی یوەمەو عێراقی ئەندامۍ ئا کۊنفراسەیو بێنۍ، وەلۍ بۊنەو ڕاگێرییەکاو پەدەکەیۊ جە سنووروو سیمێڵکاو بەینوو پانیشتی و وەرنیشتوو کورڎسانی نەتاواشا بەشداریی ئا کۊنفراسەیە کەرا.

 شاناز ئیبراهیم ئەحمەدە بارەو ڕاگرییەکاو پەدەکەیۊ پێسەش وات:" حکومەتوو ھەرێموو کورڎسانی، بۊنەو ئا وەرپەرسبییەیە تاریخی و ئەخلاقییەیە وەراوەروو "كورڎسان"یوە ھەنش و وەروو ئا حەزیچە كە پەی بەستەی كۊڕ و كۊنفرانسی سەبارەت بە بابەتی فرە بێبەھای هەنش، ئەشیا جە سەڎساڵەو ئیتیفاقیەو لۊزانینە، ھەولێرنە كۊنفرانسێوە پەی ئا یادەیە بیۍ، ئەرۍ سەیر نییا كاكی حكومەت نەک ھەر وێش مەکەرۊ ساعیبوو ئا بابەتە تاریخییە، بەڵکوم ڕایچ مەدۊ مێمانۍ ھەرێموو كورڎسانیوه بیاوا قامیشلۊ و بەشدارۍ ئا کۊنفرانسەیە با؟".

 خانمەی یوەمەو عێراقی ماچۊیچ:" ئەوپەڕوو شەرمەزارین، کە پەی کیانای ھامکاری، لۊریێوە شۊتی پەی وەرنیشتی پەی زارۊڵا  یان لوای شاندێوە پەی وەرنیشتی، ھەرێمەکەما نەتاوۊ و نەیارۊ و جورئەت و كەسێتی و تواناو ئانەیش نەبۊ جە بەرێوە سنووریی چێروو دەسەڵاتیشنە، خاكوو وێشۊ کارئاسانی کەرۊ پەی واڵە و براو ھامنەتەوەكاش، سەرباروو ئینەیە، ڕاگێرییچ کەرۊ، كە ساعیبداروو هەقەتینوو دۊسیەو كورڎایەتی ناچار کریۊ پەنا بەرا وەروو حکومەتی و گرووپ و لایەنای تەری پەی ئاستەیۊ كەیسی نەتەوایەتیی كورڎسانی بەزیندەیی."

 بۊنەو ئا خەباتە فرەیۊ ماوەو یەرە دەیەی وەڵینینە دلۍ یانەو کوردینە کریان، گردوو پارت و لایەنە کوردییەکا سەروو یەکڕیزی و کۊنگرەی نەتەوەیی کورڎسانیوە کۊکێنۍ، ئانە کە تەنیا چی بابەتەنە ڕاگێرا و بییەن بە دڕەیەو سەروو ڕۍ پارتوو دێموکراتوو کورڎسانین، کە ڕا وەنە و هەرمانەکاو  کۊنگرەی گێرۊ و ڕایچش گێرتە چانەیە شاندەکەو پانیشتوو کورڎسانی بیاوا وەرنیشتوو کورڎسانی.

جگە گردوو قۊرتەکاو دەوڵەتا ئەرەگیری و پەدەکەی، هەوڵەکاو یەکریزی دلۍ یانەو کوردی تا حەددێوە فرە لوێنۍ وەرۊ بە دەیان ئەندامۍ و کەسایەتیۍ ئەکادیمی نوێنەرۍ پارت و لایەنە سیاسییەکا جە چوارچوەو کۊنگرەی نەتەوەیینە بە ڕۊحێوە هامبەش کۊشیای تاریخی کەرا پەی ئا یۊبییەیە. قەرار پاسەن ٢٢ ئی مانگۍ شاروو لۊزانوو سویسڕاینە کۊنگرەو کۊنفراسوو سەد ساڵەو لۊزانی بەسیۊ، بە بەشداریی سەدان ئەنداما و جە هەر چوارپارچەو کورسانینە.

یاگۍ واتەینە ڕاگێرییەکاو  پارتوو دێموکراتوو کورڎسانی جە شاندەکەو پانیشتی پەی کۊنفراسەکەو وەرنیشتی ئینا وەختێوەنە، کە پەدەکە شاروو هەولێری و زۊنوو زەردیش پەڕ کەرڎەن چا بەعسییا، کە وەڵتەر دەسشا بییەن جە ئەنفال و کیمیاییوارانوو هەڵەبجەینە، لاێوە تەریچۊ بە هامکاریی پەدەکەی زۊنی زەرد پەی تورکیای بییەن بە ناوندێوە پەی ڕێکوستەی سیخوڕاو میتی و پەنادای ئا بکوشا کە دەسشا بە ونەو کورڎا سوورا.

س.ز