کۆمیتەو ڕاۋەبەری پەکەکەی بۊنەو ساڵیاڎو ١٤و تەمووزو مدرامانو ڕۊچۍ گۊرۍ مەرڎەی ئەرەیاۋنېۋەش ۋەڵاکەرڎۊ و ئەرەیاۋناش، "مدرامانو ڕۊچۍ گۊرۍ مەرڎەی ١٤و تەمووزی، سەرکۊتەی کۊشیای بیەی و ئازاڎیی گەلوو کورڎیش مسۆگەر کەرڎ".
کۆمیتەو ڕاۋەبەری پەکەکەی بۊنەو ساڵیاڎو ١٤و تەمووزو مدرامانو ڕۊچۍ گۊرۍ مەرڎەی ئەرەیاۋنېۋەش ۋەڵاکەرڎۊ. ئەرەیاۋناکەو کۆمیتەو ڕاۋەبەری پەکەکەی کە جە ماڵپەڕی ڕەسمی ۋېشەنە ۋەڵا کریانۊ پی جۊرەنە:
"پایێما وستېنۍ مانگەو تەمووزی، ئا مانگۍ کە چنەشەنە شکۆی نەتەوەییما بەدەسئارڎەن. ئێمە ئینایمۍ ساڵیاڎو مدرامانو ڕۊچۍ گۊرۍ مەرڎەی ١٤و تەمووزو ١٩٨٢ېنە. جە سەرەتانە سڵام جە ڕابەر ئاپۆی خوڵقنەرو ئی چالاکییە گۊرەیە مکەرمۍ. بۊنەو ساڵیاڎەکەیۊ هامڕا 'خەیری دورموش، کەمال پیر، عاکیف یەڵماز و عەلی چیچەک'ی کە ئی قارەمانیە تاریخیەشا ئەنجامدا و جە کەسایەتی ئاڎیشانە گرڎو گەشمەرڎا ئازاڎی بە رێز و پنەزانایۊ ۋیرمارمېۋە.
وەختۍ پایۍ وزمېنە ساڵیاڎۍ تازۊ، مشۊم بەشێۋېۋە راستتەر و قوڵتەر و بە شێۋازێۋە هەمەلایەنە جە مدرامانو ڕۊچۍ گۊرۍ مەرڎەی بیاۋمېنە. ۋەرو ئانەی مدرامانی گۊرە رۆحو مدرامانی راس و خەتەو سەرکۊتەیش بە ئێمە نیشانەدا. ڕاو ژیای و کۊشیای ئێمە ڕۊشن کەرۊۋە. خەتەو مدرامانو ١٤و تەمووزی راسۍ بېنۍ گرڎو مدرامانی دیموکراتیکی شۆڕشگێڵی کە ئێمە پېسە جمیەری و گەلی جە ۋەران ۋەرو هجومەکا ئەسڕیەیۊ فاشیزمی ئاکەپە-مەهەپەینە ئەنجامش مڎەیمۍ، بە ئێمە نیشانە مڎۊ. جە کۊشیای وڕنای ئەقڵیەت و سیاسەتی پاکتاوکەری و فاشیستینە، ئێمە گرڎو هێزیما جە دەرزەکا ئی مدرامانە دۊڵەمەنڎە تاریخیە هۊرگېرمۍ.
ئا چالاکییە سەرفرازییە ئایدۆلۆجیۍ کە سیاسەتی فاشیست و قڕکەریشا شکسس پنەئارڎ، بە سەرکەوتەیی ئەنجام دریۍ
٤٠ ساڵۍ سەرو مدرامانو ڕۊچۍ گۊرۍ مەرڎەی ١٤و تەمووزو ١٩٨٢ېرە ۋیەرڎەن، ئەگەر ئینسان سەرنج بڎۊ مۋینۊ کە یاڎو ئاڎیشا ئارۊ فرە تازەن و کاریگەری ئاڎیشا جە سەرەتاوە حەتا ئیسە بەقوەتتەرا. پۍ چی؟ ۋەرو ئانەی هەڵۋێسېۋە کە ئشیۍ جە وەختو ۋېشەنە و یاگۍ ۋېشەنە نیشانە دریۍ، چالاکی مدرامانی بۍ. ۋەرو ئانەی وشیاری قووڵو نکوڵی و ئەسڕیەیۊ سەرو گلېرگەو کورڎیرە مسەپیۊ کارەساتێوە گۊرەن و پەنەوازش بە قەناعەتېۋەن کە سەرو بنچینەو خەتەو گیانبازی کۊشیای ئازاڎیی پەرەش پنە بڎۊ. ۋەرو ئانەی پېسە سەرکۊتەیۍ گۊرەو ئایدۆلۊجی کە ئەقڵیەت و سیاسەتو فاشیست-قڕکەریش شکس پنەئارڎ و بیەو ئازاڎیی کورڎاش مسۆگەر کەرڎ، بە سەرکەوتەیی ئەنجامدریا.
ڕابەر ئاپۆ جە بارەو مدرامانو گۊرەو زینڎانیۋە کە لوتکەکەش مدرامانو ڕۊچۍ مەرڎەی ١٤و تەمووزیا ۋاتەبېش، ' جە مەرڎەیۊ بەرەو ژیایۍ ئازاڎی پردێوە حېقمە و گۊرۍ سازکریا'. حەرپاسە داواش جە گرڎو جمیەری و گەلی کەرڎ کە بە قەناعەتېۋە گۊرۊ سەرو ئا پردە حېقم ۋیەرا و بەرەو ژیای ئازاڎیی هەنگامە بنیا. پېسە جمیەری و گەلی ٤٠ ساڵېن ئێمە سەرو ئا پردېرە بەرەو کۊشیای ئازاڎیی هەبگامە منیەیمۍ. ئێمە کۊشیای ئازاڎیی کە ماوەو ٥٠ ساڵان چېرو فەرمانڎەیی 'مەزڵوم، کەمال و خەیرییەکان'ە ۋېما بەرێکوستەی کەرمۍ، ڕاۋەبەر کەرمۍ.
مەبۊ ئینسان تەنیا ۋاچۊ 'مدرامانو زینڎانی' یاخوڎ 'مدرامانو ڕۊچۍ گۊرۍ مەرڎەی ١٤و تەمووز'ی و ۋیەرۊنە. فرە زەرورا کە ئینسان ئا مدرامانیە بە شێۋېۋە راس و دروس درک پنەکەرۊ و سەرو ئا بنەمۍ حۊڵ بڎۊ کە پەنەوازیەکاش جا بەجۍ کەرۊ. ئێمە ۋیرما نەشۊ کە پېسە ڕابەر ئاپۆ دەسنیشانش کەرڎەن، کۊشیای زینڎانی و ئا یاگۍ چېۋی دژوارش ئینا چنە بیاۋنمۍ بە سەرکۊتەی. جە قەرارگەو دوژمنینە کە ماچۊ 'من سەرو گرڎ چېۋېرە باڵادەسەنا' گورزەی قورسە و کوشنڎۍ جە دوژمنی شنیا حەرپاسە مدرامانو ڕۊچۍ گۊرۍ مەرڎەی ١٤و تەمووزی نەک حەر گورزەش ئۊو دوژمنی ئەشا، ئەقڵیەت و سیاسەتی ئەرەگیری و قڕکەریش بە تەمامی شکس پنە ئارڎ و پی جۆرە سەرکۊتەی کۊشیای بیەی و ئازاڎیی گەلوو کورڎیش مسۆگەر کەرڎ.
٤٠ ساڵۍ دماتەریچ مدرامان ۋەردەمو کۊشیایما ڕۊشن کەرۊۋە
ئاڎۍ ئینەشا بە چېش ئەنجامدا؟ بێگومان ئاڎۍ بە هۆشمەندی، قەناعەت، ئیراڎە و بە ۋەرپرسیاری ئینەشا کەرڎ. حەرچنڎە کەس ئەمرەش پاڎیشا نەکەرڎەبۍ، ئاڎۍ ئەمرەشا جە ڕابەرایەتی، جمیەر و خەتەو ژیای ئازاڎیی هورگېرت. چېۋی راس و دروسشا ۋینا، قەرارشا دابۍ بەبۍ ئانەی کەس چەمەڕا کەرۊ ئەنجامدای ئا ۋەرپەرسایشا جابەجۍ کەرڎ. ئاشکران کە ئاڎۍ سەرکۊتۍ، ۋەرو ئانەی فەلسەفەو ژیای و ئیرادەو ئاڎیشا بریتی بۍ چانەی ' ئنڎەو ئانەی پەیش مرا ژیایشا ۋەشمسیۊ'. ۋەرو ئانەی قەناعەتشا پاسە بۍ کە 'سەرکۊتەی جە جمیەری ئاپۆیینە مۋینا'. ٤٠ ساڵۍ ۋیەرڎ، بەڵام ئا راسیەی کە ئارۊیچ یاڎش کریۊۋە بە دەرزە دۊڵەمەنڎەکاشۊ ڕاو ژیای ڕۋانەیما و کۊشیایما ڕۊشن مکەرۊۋە، راسی ئی مدرامانەینە. ئاشکرا بی کە ئانۍ ئا مدرامانەشا کەرڎ، خۊتان ژیایۍ ڕاسېنۍ. جە بنەڕەتەنە ئانۍ کە بەراسی چنی ئازاڎیی مژیۋا 'خەیری، کەمال، حەقی و عەلی چیچەک'ەنۍ.
ۋەرو ئانەی گرنگا کە راسی مدرامانو ڕۊچۍ گۊرۍ مەرڎەی ١٤و تەمووزی جە گرڎ لایېۋە درکش پنەکریۊ و ئەنەیاۋایش سەر سازکریۊ. جمیەرەکەما و گەلەکەما ئا قەرارە تاریخیەشا پېسە 'قەرارو شکۆی نەتەوەیی' بەنامۍ کەرڎ. ئەرەیاۋناش کە پا قەرار و هەنگامۍ پېسە جمیەری و گەلی سەربەرزېنمۍ. چېرو هجومی کۆلۆنیالیستی و پاکتاوکەرینە گرڎ جۆرە رێکوستەکۍ پەرش و ۋەڵۍ بیېنێنۍ و سەرکوت کریېبێنۍ، ۋېشا دابۍ دەسۊ، تاۋیېنێۋە و ڕووەو دلېنەشیەی بیېبێنێۋە. چی ئاژەنە راسی مرۆیی و کۆمەڵایەتی ئاشکرا کریا، بە گیان، ۋیر و قەناعەتو ئازاڎیۋە گلېرگە و کەسایەتیۍ تازۍ سەرشا هۊردا و ئانە پېسە سەرەتاو ڕاپیمای ڕووەو ئینسانی ئازاڎی و گلېرگەی دیموکراتیکی پێناسە کریا.
گرڎو کۊشیاکەی سەرو خەتەو مدرامانی پەرەش پنەدریا
دماو مدرامانی گۊرەی گرڎوو کۊشیاکا جە کەش و شارەکانە، جە دەشتە و جە زینڎانەکانە سەرو خەتەو مدرامانی زینڎانی گوڕشا پنەدریا. کۊشیای سەرو بنەماو قەرارداری ڕۊچۍ گۊرۍ مەرڎەی ١٤و تەمووزی لۋاڕاۋە و هێز و ئیراڎەو ۋېش هۊرگېرت کە گورزێۋە جە گرڎ جۆرە کاروەدایۍ بڎۊ و بۊ بە جمیەرو ئازاڎیی هەرێمی و مەنتیقەیی. ئینە راسی مدرامانو ١٤و تەمووزی و ئاستو ۋڵېکۊتەی دەسکۊتەکا ٤٠ ساڵېش وستەن ڕۋە. جە ئاژېۋە چانەنە ئەگەر ڕا و خەتە بە دروسی ڕاۋەبەرکریۊ، حیچ دوژمنێوە مەبۊ کە شکسش پنە نەڎریۊ، حیچ سەرکۊتەیۍ مەبۊ کە بەدەس نۍ.
ئێمە مزانمۍ کە رۆح و قەراردەری مدرامانو ١٤و تەمووزی جە ١٥و تەباخ (ئاب)و ١٩٨٤ینە و دماو ساڵەو ١٩٩٠ فاڕیا پۍ سرهۊردای گەلی و ئاخېزو ئازاڎیی ژەنۍ سەرو ئا بنەمایۍ ۋەڵېکۊتەی گۊرەش بەدەسئارڎ. مشۊم ۋنەکۊڵیای چا تاریخە تازەیە کریۊ کە مدرامانو گەریلای و گەلیش پېۋەرە ۋەڵۍ وست و کۆلۆنیالیزم و کۊکوشیش جە کورڎسانەنە دلېنەبەرڎ و گەلوو کورڎیش بەرەو بیەی ئازاڎیی بەرڎ.
ئێمە عال مزانمۍ کە دوژمن نەتاۋاش ۋېش گېرۊ و مدرامانو ئێمەی گەریلای و گەلی شکس پنەبارۊ جە ٦و ئایارو ١٩٩٦ ی بەدماوە جە گرڎ وەختۍ زیاتەر هجوم کەرۊنە سەرو ڕابەر ئاپۆی و جە ٩و تشرینی یۋەمو ١٩٩٨یوە حۊڵ مڎۊ چا ئاستەنە پیلانگێڵی میان نەتەوەیی درێژە پنەبڎۊ. چېگە، جە کەشېۋەنە کە مدرامانو گەریلای و گەلی سەرو خەتەو قارەمانی ۋەڵۍ گنۊ، ، هەنگامەی سەرەتاییەو ئاخېزو ئازاڎیی ژەنۍ منیا و دوژمنی کۆلۆنیالیست و کۊکوشکەر ۋەرو ئانەی ڕا چانیشا گېرۊ، هجوم کەرۊ سەرو ڕابەر ئاپۆی و ئێمە مۋینمۍ کە جە دژوو ئینەی مدرامانی گیانبازی ٣٠ حوزەیرانی ئاما ئاراوە.
پېسە ١٤و تەمموزی، پەنەوازەن بە عالی جە خەتەو ٣٠ حوزەیرانی بیاۋمېنە
چالاکی فیڎاکاریی هەڤاڵ زیلانۍ (زەینەب کیناچی)ۍ کە جە ٣٠ حوزەیرانو ١٩٩٦ینە جە دێرسیم گورزێۋە قورسەش ئەو دوژمنی ستەمکاری و کۊکوشی ئەشا، هەم خەتەو گەریلای سەردەمی تازەی و هەم مامەڵەکەرڎەی چنی ڕابەر ئاپۆی پێناسە کەرڎ حەرپاسە سەرهۊردای و پارېزنا و هێزو ژەنا ئازاڎیی بە گرڎوو دۆسی و دوژمنا نیشانە دا و بیەن بە پێگېۋە تاریخی.
چی ڕوانگۊ پەنەوازەن ئنڎەی کە ئێمە جە خەتەو ١٤و تەمموزی بە عالی و تەمامی بیاۋمېنە، ئانەڎیچ پەنەوازەن بە دروسی و بە تەمامی جە خەتەو ٣٠ی حوزەیرانی بیاۋمېنە. مۋینمۍ ئی خەتە تایبەتمەنڎۍ سەرو بنەماو ئاخېزو ئازاڎیی ژەنا بیەن بە ڕۆحو ئازاڎیی و وشیاری و ئیراڎە کە جە گرڎو جەهانینە ۋەڵا بیەنۊ و کاریگەریش سەرو گرڎو ژەنا نەتەوەکا تەری هەن. پۍ چی؟ چونکی پېسە مدرامانو ڕۊچۍ گۊرۍ ١٤و تەمموزی، چالاکی فیداکاریی هامڕا زیلانېچ جە دەرسیم جە یاگۍ و وەختی گونجیانە ئەنجامدریا. سەلەمنۊش کە بە ڕۆشنکەرڎەیۊ گرڎ جۆرە تاریکیېۋە، جواب و ستەمی فاشیستی و جینۆسایدی مڎۊوەو بە زۋانۍ کە دوژمن چنەش بیاۋۊنە، سزاو ستەمکارا مڎۊ.
ئێمە فرە عال مزانمۍ کە کۆیلایەتی ژەنۍ بنەماو گرڎ کۆیلایەتیېۋا، پۊکاتی ئازاڎیی ژەنۍ بنەماو گرڎ ئازاڎیېۋا و گلېرگېۋە ئازاڎ تەنیا بە ئازاڎیی ژەنۍ، بە سەرکردایەتی ژەنېۋە ئازاڎۍ بەدەس مۍ. چی ڕوۋۊ فرە ماناڎار و ئەنەیاۋاین کە ژەنېۋە ئازاڎیوازە هەڵۋێسێۋە عالش جە ۋەران ۋەرو هجومو دلېنەبەرڎەو ئاخېزی ئازاڎی و سەرکردایەتی ئازاڎینە نیشاندان.
پۍ ئینەیچ حەقیقەتو زیلانۍ پېسە مدرامانو ١٤و تەمووزی پەنەوازش بە ئەنەیاۋایۍ قووڵی هەن. ڕاسی زیلانۍ بە ڕۊشنی سەلەمناش کە ئینسانی بە ئیراڎە و ڕێکوزیا و حېقم پەیوەس نۊ بە ئامانجو ئازاڎییوە متاۋۊ گرڎ چېۋۍ کەرۊ. تەنیا کەسێۋە چانۍ متاۋۊ دەستکۊتی گۊرە بەدەس بارۊ و گورزەی قورسە ئەو دوژمنی بڎۊ. متاۋۊ جە بنکەکا دوژمنینە هەنگامە بنیۊ.
ڕاسی زیلانۍ یاساو ژیای و ژیۋای ئازاڎیا
ۋیرما نەشۊ ئاخېزو ڕزگاریوازی نەتەوەییما کە بە مدرامانو ڕۊچۍ گۊرۍ ١٤و تەموزی دەسش پنەکەرڎ، نەک حەر بە مدرامانو فیڎاکاریی زیلانۍ جە ٣٠ی حوزەیرانینە، پراکتیکېۋە ڕاس و تەمام و سەرکۊتەش بەدەسئارڎ. جە هەمان وەختەنە سەرکردایەتی ئاخېزو ئازاڎیی ژەنا و ژەنی ئازاڎۍ، خەتېۋە ڕاسەقینۍ و کامڵش جە ئازاڎیی بەدەسئارڎەن و جارێۋەتەر سەرکۊتەی ۋېش مسۆگەر کەرڎەن. با سەرنج بڎەیمۍ وەختۍ ڕابەر ئاپۆ جە وەختو هۊرسەنگناو مدرامانو ٣٠ی حوزەیرانینە ۋاتەبېش "زیلانە فەرمانڎېنە و ئێمەیچ جەنکەرۍ ئاڎېنمۍ". زیلانەش بە "خوڎاو ئازاڎیی" نامۍ بەرڎە. ڕۊشنیچش کەرڎۊ، ژەنێوە چنی کەلتورو خوڎاوەنی گۊرۍ بۊ و ئازاڎە بۊ، بۊ بە سەرمەشقەو گرڎو ئاخېزەکا ئازاڎیی. حەقیقەتو زیلانېش بە "یاساو ژیای ئازاڎی" پێناسە کەرڎ.
ئارۊ ئینایمۍ پێگەو جمیەر و کەسانێۋەنە کە چنی ڕۆح و خەتەو مدرامانو ١٤و تەموزی و ٣٠ی حوزەیرانی خەبات مکەرا. ئێمە جە ساڵیاڎی تازەو ئی مدرامانە گۊرانە ئەزموون کەرمۍ. سەرەتا پەنەوازەن عال بزانمۍ کە مدرامانو ١٤و تەموزی و مدرامانو ٣٠ی حوزەیرانی حەرڎویشا گوزارش جە ئیراڎە و ئازایەتی و قوربانیدای گەورەی مکەرا. ئینەیچ بە پەیوەس بیەی بە ژیای ئازاڎی و خەتەو ڕابەرایەتیۋە بەدەس ئاما. سەرو ئی ئەساسیە ئی ئەنجامۍ بە ڕەخنە و شیکاریېۋە قووڵۊ ئامۍ ئاراوە.
جە لایۍ تەریچۊ حەرڎووە مدرامانو ١٤و تەمووزی و مدرامانو ٣٠ی حوزەیرانی نوێنەرایەتی سەرکۊتەیۍ گۊرەی و تاریخی و یەکلاکەرەوەی مکەرا جە ۋەران ۋەرو دایۋنەو دوژمنینە بە گورزێۋە قورسە و وێرانکەرە.
ئارۊ سەرهۊردای خەڵکو کورڎسانی پۍ ئاخېزو ئازاڎیی و ئازایەتی و فیڎاکارییەی کە چی بوارەنە ئامان ئاراوە، ڕاسی خەڵکی فیڎاکارین، ڕاسیېۋە کە جە تاریخەنە نەۋینیان. ئاشکران کە چەمەڕای و فەرمانەو ڕاسی گەلی بە حەقیقەت تەنیا پی جۊرە متاۋیۊ جابەجۍ کریۊ.
مەحاڵا فاشیزم بتاۋۊ ۋەردەمو مدرامانو سەراپاگیریەنە عمرو ۋېش درێژکەرۊۋە
چی ڕوۊ، مدرامانی دیموکراتیکی شۆڕشگێڵی مدرامانېۋە سەراپاگیر دژ بە فاشیزمی ئاکەپە و مەهەپەی ڕاۋەبەر کەرۊ، پۊکاتی فاشیزم مەتاۋۊ عمرو ۋېش درێژکەرۊوە. ڕاسییەکەش، هێز و کاریگەری مدرامانی دیموکراتیک دژ بە فاشیزمی، ئانەی دیاری کەرۊ کە چنی و کەی فاشیزم هۊرشېۋیۊوە. بێگومان فاشیزمی ئاکەپە و مەهەپەی قوەتو مەنەیشۊ نیا.
ئاشکران، جە گرڎ لایۍ زیاتەر، ۋەرپرسیاری گەورە گنۊ ئەستۆو پارتەکەیما و گەریلا و گەلەکەیما و ژەنا و گەنجا جە کۊشیای سەراپاگیر دژ بە دیکتاتۆرییەتی فاشیستی ئاکەپەی و مەهەپەی. گرڎو هێزەکا تورکیای و سوریای و عێراقی چەمەڕاو سەرمەشقی ئێمەن. ئەگەر ئێمە بەشێۋېوە ڕاس و قایلکەر سەرمەشقی بکەرمۍ، گرڎو هێزە شۆڕشگێڵ و دیموکراتیکەکا جە دەورو ئی سەرمەشقیە کۊباوە و یۊبیەی مېنە دی. ئا وەختە، پەنەوازەن زیاڎ جە حەر وەختۍ تەری خۊتانکەرڎەی جە سەرمەشقی کەرمۍ، تەجروبە جە کۊشیاکا ۋەڵتەری هۊرگېرمۍ، نەک حەر جە کورڎسانەنە، بەڵکم دلۍ ئا دەوڵەتانە کېە کورڎسانشا وستەن چېرو هەیمەنەو ۋېشاوە، پەنەوازەن بیمۍ بە سەرمەشقو شۆڕشی دیموکراتیکی و هەڵۋێس هۊرگېرمۍ.
سەبارەڎ بە پەرە پنەداو ئی کۊشیایە ئارۊنە، ئانە خەتەو سەرکۊتەی مدرامانو ١٤ و تەمموزی و ٣٠ ی حوزەیرانی ئی ڕېما پۍ ڕۊشن مکەراۋە. چا مدرامانە سەراپاگیرەی ئاماژەما پنەکەرڎ، ئەرکی ئەساسی بە سەرکۊتەی میاۋنمۍ مەنزڵ، سەرو خەتەو کەمال پیری و زیلانۍ کۊشیەیمۍ و سەرگنمۍ.
گەریلا متاۋۊ سەرکۊتەی بەدەس بارۊ
ئاشکران کە مشۊم دژ بە هجومەکا جەنگی تایبەتی سەراپاگیری سیستەمو فاشیستی و قڕکەری، پەنەوازا مدرامانی سەراپاگیرما بۊ. گرڎ ۋەرپرسیارېنمۍ چی بارۊ. کۊشیای گرڎ مەجالېنە بەها دارا. کۊشیای جە تورکیا و سوریا و عێراقەنە، ئنڎەو کۊشیای جە کورڎسانەنە بەنرخا. کۊشیای ژەنا و گەنجا، سەرهۊردای، چالاکی دیموکراتیک و کەلتووری کەمتەر نییا جە مدرامانو گەریلای. حەج کەس جە حەر یاگېۋە حەرچیش پنە کریۊ پەنەوازا ئەنجامش بڎۊ، پەنەوازەن بە گرڎ شێۋېوە کۊشیای کەرۊ. پی ڕۍ، مدرامانی سەراپاگیر پەرە مسانۊ پۍ دلېنەبەرڎەو فاشیزمی. مدرامان ئینا گرڎ یاگېنە، بەڵام گومانش چنە نیا، ئا هێزەی سەرمەشقی ئی مدرامانەیە کەرۊ و سەرکۊتەی فەراهەم کەرۊ، مدرامانو گەریلایا.
چی ڕوۊ، تەڤگەرە فیڎاکارەکەما بیەن بە تەڤگەرېوە جە چۋار پارچەو کورڎسانینە ۋەڵابیەنۊ، حەرپاسە جە جبەرو کورڎسانیچەنە ئینا گەشەکەرڎەینە. خۊتان ٤٠ ساڵ تەجروبەی دۊڵەمەنڎا. بە دەرز هۊرگېرتەی، گەریلایەتی جە سەردەمی تازەنە جە گرڎ بوارېۋەنە بەشێۋېوە بەقوەت و سەرکۊتانە بەکارمۍ. سەرکۊتەی گەریلای بەنڎا بە چنەئامای و ئا شێۋازەیۊ. جە ئەنەیاۋاینە، ئامانج و فەلسەفە و پرەنسیپو گەریلای بۊ بە یۊ، ئاڎیچ جە ڕاو هەستیاری و دیسپلین و ڕێکوستەی و هێزو فەرمانڎەەیی گەریلایوە بۊ، پینەیچ جەنگی گەریلایی میاۋۊ بە سەرکۊتەی.
ڕابەر ئاپۆ ۋەردەوام تەئکید کەرېۋە سەرو دانایی و شێوازی، ۋاچۍ "جە جەنگەنە مەدۊڕیەیمۍ، بەڵکم جە ژیاینە دۊڕیەیمۍ" و ۋاچۍ: "ئەگەر گەرەکما بۊ سەرکۊتەی سەروازی گۊرە بەدەس بارمۍ، پەنەوازەن جە ژیاینە سەرگنمۍ"، ۋاچۍ "با پەیوەنڎی کەرمۍ بە ڕیزەکا پەکەکەیوە و جە جەنگەنە سەرگنمۍ". ۋەردەوام تەئکید کەرېۋە کە "سەرکۊتەی جە ڕاو حزبی بیەیۊ بۊ". چی بارۊ، پەنەوازەن جەنگو گەریلای جە کەشەکانە و شارەکانە بەقوەتتەر کریۊ تا ئاستێۋە کە بتاۋۊ فاشیزمی هۊرشېۋنۊوە، پێۋیسا ۋەڵۍ گرڎ چېۋېنە، کۊشیای ئایدۆلۆجی و ڕێکوستەی ئەنجام بڎەیمۍ. پێۋیسا جە کۊشیای ئایدۆلۆجی و ڕێکوستەینە سەرگنمۍ. ئینە خەباتو چینایەتییا، خەباتو بەینو ڕەگەزەکان، خەباتی ڕۆحیین، ۋۍ پەروەرڎەکەرڎەین. بە مانېۋە تەر، بەپاو ئامانجەکا ۋېتا پەروەردە کەرڎۍ، درکش پنەکەرڎۍ، دیسپلین و ڕێکوستەیش پنە بەخشدۍ. عالتەر چنی هەڤاڵەکاشا هەماهەنگی کەراو یۊترینشا ۋەش بسیۊ، گۊش جە یۊترینی گېرا، جە بەرزتەرین ئاستو ڕێکوستەینە پېۋەرە قەرار و پراکتیکشا بۊ. پێۋیسا سیستەمو تیمی بەشێۋېوە عال دلۍ گەریلاینە پیادە کەرا. ماچا "تیم" و "دەستە". لانی کەم مشۊم بەپاو نەواخنو ئی چەمکا مامەڵە کەرمۍ. ئی دوۋە چەمکە تەنیا جە مەجالی سەروازینە بەکارنمەیا. بەڵکم جە وەرزش و هونەر و سیاسەتەنە بەکارمەیا. تا بیدۍ بە تیم و دەستە، مشۊم کەسەکۍ بەقووڵی پەروەردە کریا. جە پەروەردەی تاکەکەسیوە حەتا پەروەردەی گرووپی، پێۋیسا هەرمانەی هامبەشەی دژوارە کریۊ. جە ڕاسینە، حەج کەس کۆششی گۊرە کەرۊ حەتا بۊ بە ئەندامو تیم یا دەستەی. مشۊم بە عالی چینەی یاۋمېنە.
چی بارۊ، جە حەر یاگېنە بیمۍ، مشۊم ٢٤ سەعاتۍ و بۍ مرڎای، پەنەوازیەکا سەرکۊتەی بەروزمۍ، مشۊم ژیای و هەرمانەی هامبەشە و سەرمەشقی پارتی نیشانە بڎەیمۍ. مشۊم بەعالی ۋېما پەروەردە کەرمۍ. ئینە خەتەو کەمال پیریەنە. پی جۊرە خەتەو ١٤ و تەمموزی بەرکەوت. مەگەر بە چۋار شۆڕشگێڵۍ گۊرەتەرین سەرکەوتەی تاریخیشا بەدەس نارڎ؟ با تەماشەو ڕاسی زیلانۍ کەرمۍ، مەگەر کەسێتی زیلانۍ نوێنەرایەتی ژەنێوە ئازاڎۍ نییا جە ڕۆح و فکرەنە، پېسە کاروەدایۍ ۋەران ۋەر پا ژەنۍ کە بە زیهنیەت و دەسەڵاتو پیای پۍ ماوەو ٧٠٠٠ ساڵا بەرکەوتە؟ مەگەر ڕاسی گەلا و ڕاسی چەوەسیاکا و ڕاسی ژەنۍ جە کەسێنە نەژیۋا؟ واتە، ئەگەر ئینسان ۋېش پەروەردە کەرڎ، ۋېش ڕێکوست، سەرو خەتەو ڕابەرایەتی و پارتی ڕېکوستەی، ئانە ڕووە کەرۊنە کۊشیای و متاۋۊ گرڎ چېۋۍ کەرۊ.
پێۋیسا عالتەر سەرو خەتەو ١٤ و تەمموزی و ٣٠ ی حوزەیرانی مرڎای کەرمۍ
هجومەکۍ فاشیزمی زیاڎشا کەرڎەن. مەجالو جەنگی فراوانتەر بیەن. واتە ئەرک و مەجالو کۊشیایما زیاتەر بیەن و سەرکۊتەی بیەن بە ئامانجێوە ئەبەدی. بەڵام هێز و ئیراڎەو گرڎ چېۋېما هەن. ئینە خەتەو ١٤ و تەمموزی و ٣٠ ی حوزەیرانین. خەتەو کەمال پیری و زیلانېن گوزارش چی ڕاسیە مکەرۊ. ئەگەر ئێمە سەرو خەتەو کەمال پیری و زیلانۍ بیمۍ چنی پارتەکەی، بیمۍ بە گەریلا، بیمۍ بە گەل، بیمۍ بە نەتەوەی دیموکراتیک، ڕێکوزیا و بەدیسپلینۍ بیمۍ، ژیای گلېرگەی سەرو ئی بناغەیە ئەرەمەرزنمۍ، ئیتر حیچ هێزێوە مەتاۋۊ بەزنۊما. گرڎ ئەرکێوە سەرکۊتانە جابەجۍ مکەرمۍ و شکس بە دوژمنی مارمۍ.
ئەگەر گەریلا پی جۊرە ۋېش پەروەردە و بە ڕێکوستەی کەرۊ، بێگومان جە ئەرکەکەشەنە سەرگنۊ. ئەرکەکېما زیاتەرۍ و قورستەرۍ بیېنۍ، بەڵام مشۊم بزانمۍ کە وەڵۍ گنمۍ و سەرگنمۍ، مەجالما زیاتەر بیەن، زانای و تەجروبەما دۊڵەمەنتەربیەن، ۋەڵۍ گنمۍ و بەقوەتتەرۍ بیمۍ. وەختۍ ئی شێوە کۊشیایە ڕاۋەبەرکەرمۍ، مشۊم قەناعەتما بە سەرکۊتەی بۊ جە گرڎ ئەرکێوەنە متمانەما بە ۋېما بۊ.
پی مەڵامەتۊ، مشۊم سەرو خەتەو ١٤ و تەمموزی و ٣٠ ی حوزەیرانیۊ بیمۍ. زیاتەر تەئکید کەرمېۋە سەرو تایبەتمەنڎی کەسایەتی کەمال پیری و زیلانۍ. زیاتەر تەئکید کەرمېۋە سەرو تایبەتمەنڎییەکا خەتەو ڕابەرایەتی. مشۊم سەرو خەتەو ڕابەرایەتی و گەشمەرڎاوە، هەڵۋێسی ڕەخنەگرانەتەر نیشانە بڎەیمۍ. دەرفەتو هامرایا جە سەنگەرەکانە کەم نییا و ئاستو ئەنەیاۋایشا لاواز نییا. گولانەتەرین و تازەتەرین هەڤاڵ، ئنەو فەیلەسوفۍ مزانۊ. بەعالی ڕاسی مشناسا، ڕووەداکا بەقووڵی ۋەناوە، ڕاس و درۊ جیا مکەراوە. هەڵبەڎ پەنەوازەن زانایما زیاتەر کەرمۍ. بەڵام ئینە ۋەسۍ نییا. بەڵکم قۊرتە ئانېنە، ئەگەر زانابیەکەیما بەپاو ڕاسی وپەنەوازی پراکتیک نەکەرمۍ. ۋیەرناو ئی مژاریە، بە ئیراڎە و دیسپلین بۊ، پەنەوازش بە کەسی ڕێکوزیای هەن.
ڕابەر ئاپۆ ۋاچۍ "ئینسانی ئازاڎ، ئینسانېۋە ڕێکوزیان"، کەسێوەن بە وشیاری و ئیراڎۊ ژیای کەرۊ. مشۊم وشیاری و ئیراڎەما سەرو ئی بناغەیە پەرە پنە بڎەیمۍ. مشۊم جە زانای و نرخنای و قەرارەکامانە بەقوەتۍ بیمۍ، بتاۋمۍ جە یاگۍ و وەختی گونجیانە پراکتیکش کەرمۍ. مشۊم هێزە تاکەکەسییەکاما جە رېکوستەینە یۊ وزمۍ و بیاۋمۍ بە حېقم تەرین ڕێکوستەی. مشۊم بە هێزو ئایدۆلۆجیای و ڕێکوستەی، ۋەرپەرچو ۋەڵېکۊتەی تەکنیکی دوژمنی بڎەیمېۋە و بەزنمېش. مشۊم وزەما بەعالی بەکاربارمۍ. ڕاسی، قۊرتکۍ ئینا چېنە. هەڵۋێسی تاکەکەسی و ڕەفتاری تاکەکەسی، نە ۋیەرنای تایبەتمەنڎی سیستەمی و نزیکایەتی بۆرژوازی و سۆز و بێباکی و ناهەستیاری، ئا هەڵۋێس و زیهنیەتەی کە گوایە "حیچ ڕۋە مەڎۊ"، و هتد. وەختۍ ئی هەڵۋێس و ڕەفتارۍ یۊگېرا و یاۋانە مېڎانو سەرمەشقی، تەرسی و زەرەرەکېش زیاتەرۍ با. مەبۊ بەکەمش گېرمۍ. با بەبۍ کەموکوڕی تەماشەو پەنەوازیەکا ڕێکوستەی و ژیای بەکۆمەڵی و هەرمانۍ هامبەشۍ. با پاسە ۋېما ڕێکوزمۍ، دژوو ئا هەڵۋێس و ڕەفتار و زیهنیەتۍ زەرەر بە پیمەر و یاساکا ڕێکوستەی میاۋنا، هەڵۋێس هۊرگېرمۍ و خەبات کەرمۍ پۍ پارېزناو خەتەکۍ. مەبۊ چەمپۊشی کەرمۍ، یان چنەۋیەرڎەی برمانمۍ. با ۋیرما بۊ، کۊشیای سیاسی_سەروازی سەرو خەتەو سەرکۊتەی ملۊ، تەنیا بە خەتەو ئایدۆلۆجی_ڕێکوستەی سەرکۊتەی متاۋۊ ئەنجامش بۊ.
چی بارۊ، کۊشیای ڕێکوستەی و ئایدۆلۆجی سەرو بناغەو کۊشیای حزبی بەقوەت کەرمۍ، بەهەمانشێۋەو کېۊشیای چینایەتی و ڕەگەزی. ئێمە سەرمەشقی حزب و گەریلای، هەرمانە و ژیای هامبەشی میاۋنمۍ بە لوتکە. ئینە ئاستو سەرکۊتەیا. ئینەیچ جەڕاو بەزناو نەفسی و شێوازو رەفتاری و زۋانیوە بۊ. جەنگاوەرە شۆڕشگێڵەکۍ ۋېشا جە دەوروبەری جیا مەکەراوە. ئا ۋەردەوام دەوروبەری کېشۊ و سەرمەشقی کەرۊ بەرەو ڕای ڕاس. 'حەقی قەرار و مەزڵوم دۆغان و مەعسووم کۆرکماز' پاسۍ بېنۍ. 'بێریتانە و زیلانە و نودا و سارا و دەلال'ە پاسۍ بېنۍ. حەر ۋەرو ئانەی ۋەرەن ڕوو ئاستەنگی بېنېۋە، ۋېشا جە دەوروبەری دوور نەوزېنۍ، ڕوووەڕوو ئاستەنگیشا نەکەرېنۍ. ۋەردەوام پەشتیوانی و هێز بەخشېنۍ بە دەوروبەری و قۊرتەکا چارەسەر کەرېنۍ. جەنگاوەرە سەرمەشقە ئاپۆییەکۍ پی جۊرە بېنۍ. ئینە ڕاو شۆڕشگێڵی سەرمەشقین. ئینە دەرزی ئەساسین جە ١٤ و تەمموزی و ٣٠ ی حوزەیرانی. چېۋەکە پەیوەس نییا پانەی ئینسان ڕاس و غەڵەت جیا مەکەرۊۋە. ئەنەیاۋای جە سەرکۊتەی بەدەسئامای چی وەختەنە، جە ڕوو تاریخیۋە، جە ڕاو هەڵۋێسېۋە پی جۆرەیۊ بۊ.
پېسە گلېرگەی و گرڎو هامڕایا، ئێمە ئینایمۍ بەرزتەرین ئاستو ئەنەیاۋاینە. سەرو خەتەو ڕابەرایەتی و گەشمەرڎا ۋېما ڕێکوزمۍ و حیچ ۋەربەسېۋە نیا ۋەڵۍ ئینەیۊ، ئانەی مەنۊۋە کۆششو ئێمەن. پەنەوازما بە کۊشیای دلېینە و چینایەتی و ڕەگەزییا بەشێوەی ڕاس و دروس. وەختۍ ئینەی کەرمۍ، دیکتاتۆری فاشیست حەرچیېۋە کەرۊ، هێزەکۍ مۆدێرنیتەی سەرمایەداری و چینی هامکار چنی جماوە، سەرمەشقۍ ئاخېزی متاۋا ڕاسی بېزاۋە جە گرڎ هەڵۋێس و کۊشیایېنە. سەرکۊتەی چی وەختەنە، پی جۊرەنە.
سەرو ئی ئەساسیە، واوەی بە ڕێز و پنەزانایۊ یاڎو گەشمەرڎەبیەو خەیری و کەمالی و عاکیفی و عەلی و زیلانۍ مکەرمېۋە. داوا کەرمۍ گرڎو هامڕایا بە ڕۆحو ١٤ و تەمموزی و ٣٠ ی حوزەیرانی و خەتەو سەرکۊتەی ۋېشا ڕېکوزا. بەپاو ڕاسی زیلانۍ و کەمالی و سەرو خەتەو سەرکۊتەی ئەرکەکا ۋەرو دەمیما ۋیەرنمۍ. پەنەوازا پېسە ئی جەنگاوەرا بیدۍ".
هـ . ش
