ژەنا تەڤگەری ئازاڎیی گلېرگەو کورڎەسانی جە جبەرو وڵاتی بە ئەرەیاۋنێوە هرووژمە ئەرەگیریەکێشا شەرمەزارۍ کەرڎۍ و واتشا: "گەر بێدەنگییەکۍ بەردەوامۍ بۍ، تەرسی سەرو گرڎ کەسۍ هەنە، پەنەوازا گرڎیما کورڎانە ویربکەرمێوە و دژو ئەرەگیریەکا مردمێوە."
جە ئەرەیاۋنێوە نویسیانە ژەنا تەڤگەری ئازاڎیی گلېرگەو کورڎەسانی جە جبەرو وڵاتی، هرووژمە ئەرەگیریەکۍ دۆڵەتو تورکیشا شەرمەزارۍ کەرڎۍ و داواو بەربڕیەی ناڕەزایشا کەرڎ.
جە سەرەتاو ئەرەیاۋناکەینە هرووژمەکەو دۆڵەتو تورکی جە ناوچەو خەلەکانینە شەرمەزارکریان و ئامان: " ئا هرووژمە بی بە بایسو گەشمەرڎە بیەو تاتێوە و دووۍ کوڕاش جە خەلەکانەنە، ئی کردەوە نەک تەنیا هەرمانێوە قیزەونە و ترسنۆکانێنە بەڵکم هەرمانێوە تیرۆرستیانێنە و تەمام پێچەوانەو جاڕنامەو مافو مرۆڤیا."
جە بەردەوامی ئەرەیاۋناکەینە ئاماژە بە مەتەرسی بێدەنگییەکا جە ۋەرا ۋەرو ئا هرووژمانە مکەرا و ماچۆ: "ئەگەر بێدەنگی حکومەتو عێراقی و حکومەتو هەرێموو کورڎەسانی هەر پاسە بەردەوام بۆ، دڵنیۍ بیدۍ نمەیاوۆ ساڵێوەتەر گرڎو چالاکا و ئازاڎیی وازا گەشمەرڎۍ مکریا، وە تورکیا بەیەکجاری خاک و وڵاتیما ئەرەگیر مکەرۆ."
جە دمادماینە داواو ئەرەکۊشای هامبەشی مکەرۆ و ماچۆ: "مشۆم گرڎیما بەبێ گۊشدای بە لایەنی حیزبی و پەیلوا جیاوازەکاما خاوەن هەڵوێسۍ بیمۍ و کورڎانە ویربکەرمێوە ۋەرا ۋەر پی گرڎ نادادی و ئەرەگیریا ھەڵوێسما یۆبوزمۍ."
