سەبارەت بە هجووم و ئەرەگیریەکا دەوڵەتوو تورکی و ئامای ئەردۆغانی پەی پانیشتوو کوردسانی هاموڵاتییا ناڕەزایی ۋێشا بەربڕی و ئاماژەشا پانەی دا کە دەوڵەتوو تورکی گرڎ وەختۍ دژوو گەلوو کوردی بیەن.

مامۆسا محەمەڎ حەمە ڕەزا، سەبارەت بە هجوومە ئەرەگیریەکا دەوڵەتوو فاشیستی تورکی پەی سەروو گەلوو کوردی و حەرپاسە قەراروو سەردانیکەردەو ئەردۆغانی پەی عێراقی و پانیشتوو کوردسانی پەی ئاژانسوو هەواڵوو فوراتی قسېش کەردۍ و واتش: " سیاسەتوو تورکی فاشیستی هەر جە دەوڵەتوو عوسمانیۆ تا میاوۆ بە ئەتاتورکی و نوێنەرایەتی ئەردۆغانی فاشیستیچ هەمیشە دژ بە کوردی بیەن و گەرەکش بیەن گەلوو کوردی بکەرۆ بە یەک ئاڵا و یەکڕەنگی تورکی، جە ئیساتێچەنە ئەردۆغان سەردای پانیشتی مکەرۆ، کە چانەی مشۆ جەمۍ پلانۍ گڵیاوێش پەی  کوردی و بە تایبەتیچ پەی گەریلای و قەندیلی پنەبۆ و گەرەکش بۆ جابەجێشا بکەرۆ."

هەر سەبارەت پی پرسەیە و هەڵوێسوو لایەنە سیاسییەکا و هاموڵاتییا مامۆسا محەمەڎ ڕەزا واتش: " هەرچەنڎە پەدەکە مودێوە فرەن کۊتەن دلۍ سەنگەروو ئی پلانگێڵنییەو دەوڵەتوو تورکیایۆ، بەڵام داوا جە گرڎوو حیزب و لایەنەکا و هاموڵاتییا مکەروو، کە نازانۍ ئی ئەرەگیریەو تورکی بلۊنەسەر پەیشا، چونکی تورک شۊنېش ئەرەگیرە کەردە چنەشەنە مەکیشیۆوە، ئەردۆغان گەرەکشا جە ڕاو چەکوو ئاوۍ و هەناردەکەردەی نەوتێوە جە ڕاو تورکیایۆ، عێراقی کېشۆ دلۍ ئی پلانگێڵنیەیۆ، من هیواڎارەنا کە عێراق ڕەڎش بکەرۊوە و هاموڵاتیۍ بزانا کە باجوو ئی ئەرەگیریە فرە سەخت گنۆ سەرشا."

هەر سەبارەت پی پرسیە، هەڵاڵە شەوکەت لهۆنی، سەرۆکەو ڕێکخراوو وارانی پەی ئاژانسەکەیما قسێس کەردۍ و واتش: "هەرجارێوە کە هجووم مکریۆ جە تەرەفوو ئەرەگیراوە، جۆروو مامەڵەو لایەنە سیاسییە کوردییەکا بەپاو ئەجێندا و جۆروو پەیوەندییشا چنی ئەرەگیرا فاڕیۆ، پېسە دیارا کە لایەنە سیاسییەکۍ ئینۍ پەیوەندینە چنی ئەرەگیرا، هەرچەنڎە حکومەتوو هەرێموو کوردسانی نەتاوانش نە ڕاوەبەریێوە عالش بۆ، نە پارێزگاری جە خاکوو کوردسانی بکەرۆ، بەڵام ئەجۊمەنە عالتەرین کارێ کە بتاوا بکەراش جە وەختوو ئی هجوومانە، ئانەنە کە گرڎ پېوەرە، کوردانە و مەردانە دژ بە هجووم و ئەرەگیریەکا مرداوە."