کاوە مەنسوری یاگەگیرو سەرۆک وەزیرا ویلایەتو هەسنێ و ئارمەند زورنی ئەندامو پەرلەمانو فیدراڵی ئەڵمانیای جە پارتو SPD کە بەشداریشا جە جەژنەو نەورۆزو فرانکفۆرتو ئەڵمانیای کەرڎ، جوابو پرسیارەکا ئاژانسو هەواڵو فوراتی (ANF)ی، سەبارەت بە نەورۆز و بانگەوازە تاریخیەکەو ڕابەر ئاپۆیشا داوە.

نەورۆز جە ۋەرا ۋەرو فشارەکانە، هێماو مڎرامانیا

کاوە مەنسووری سەرەتا جەژنەو نەورۆزیش جە گەلوو کوردی پیرۆزە کەردە و ئەرەیاۋناش کە نەورۆز سەرەتێوە تازەن، نیشانۍ هیوا و ئاشتییا، هامکات پەی گەلی جە ۋەرا ۋەرو فشارەکانە مڎرامانا. مەنسووری سەرەڕاو بە گرنگ زانای نەورۆزی  واتش: "پەی من فرە گرنگا ئارۆ ئینایمۍ چۍ و پەیامەکەیما بیاونمۍ. ئېساڵ خەڵکێوە فرە ئامێنۍ فرانکفۆرت پەی ئانەی جەژنەو نەورۆزی بە شێوێوە ئاشتیانە پیرۆزە بکەرا منیچ پانەی فرە دڵوەشەنا."

'نەورۆزو ئېساڵی مەعنێوە تایبەتو ۋێش هەن'

مەنسووری جە درێژەو قسەکاشەنە ئاماژەش بە مافو مرۆڤی کەرڎ جە دیاریکەردەی چارەنوویسو ۋێشا و ئاماژەش پانەی دا کە ئینە پەی گەلوو کوردیچ یەکسانا و واتش: "گرنگا نیشانەو گەلیش بڎەیمۍ کە چېش پەی گلېرگەو کوردی گرنگا. پۊکەی ئاماڎەبیەو فرەو کەسا چی جەژنێنە ئارۆ پەی ئشناسای کولتورو کوردی مایۍ دڵوەشیا. دیسان جە دما دمایی قسەکاشەنە جەژنەو نەورۆزیش جە گرڎ لایۍ پیرۆزە کەردە و هیواو نەورۆزێوە پەڕ جە سەرکۊتەیش پەی گەلی واست.

'هیوا و هێز پەی جەهانی گرنگی ۋێش هەن'

هەرپاسە ئارمەند زورن، ئەندام پەرلەمانو فیدراڵی ئەڵمانیای، ئەرەیاۋناش: "نەورۆز جەژنەو هیوا، ڕۊشنایی، یۊبیەی و یۊگێرتەیا، پۊکەی من فرە دڵ وەشەنا کە ئارۆ بە شێوێوە ئاشتیانە چۍ نەورۆزی پیرۆز مکەرو." هەرپاسە بانگەوازەکەو ڕابەر ئاپۆیش بە "هەنگامېوە ئازایانۍ" وەسف کەردە و واتش: "پەیامێوە چامنە کە من ئاماڎەنا پەی ئاشتی، ئاماڎەنا بەشێوە بوو جە چارەسەری کە گرڎ کەسۍ بتاوۆ بە شێوێوە ئاشتیانە و ئاسایش پێوەرە بژیۋا، ئینە هەنگامېوە فرە بەهێزەنە، پۊکەی ئەرکو حکومەتو تورکیایا ئی هەنگامۍ قبوڵ بکەرۆ و هەوڵ بڎۆ بە هەنگام نیایش ئاشتی بەرقەرار بکەرۆ."

زورن جە میانو قسەکاشەنە واتش: "ئەندامیەتی تورکیای جە یۊبیەو ئۆرووپاینە مژارێوەن کە ماوێوە فرەن گفتوگۆش سەر مکریۆ. یۊبیەی ئۊرووپای پیمەرو ۋێش هەنش. سەروەری یاسایی، پیمەرە ئابوورییەکۍ و دیموکراسی بەشێوەنۍ چا پیمەرا. ئێمە بەردەوام پەی هۊرسەنگنای ئا مژارا ئاماڎێنمۍ."

زۆرن سەبارەت بە دەور و ئەرکو ئەڵمانیای جە پرۆسەو ئاشتی و گفتوگۆینە واتش: "ئەڵمانیا هەمیشە مېیانجیکەرۍ عال بیەن جە جەهانەنە، پۊکەی ئەڵمانیا متاوۆ چی بارۆ مېیانجیۍ عال بکەرۆ، ئێمەیچ متاومۍ چی مژارەنە بەشدارۍ بیمۍ و دەوری پەنەواز گێڵنمۍ."

زورن جە دما دماییقسەکاشەنە باسش چانەیچ کەرڎ کە ئەر لایەنەکۍ کوردی و تورکی داواو مېیانجی جە وڵاتا جبەری بکەرا، ئەڵمانیا متاوۆ چی بارۆ دەور گێڵنۆ.

زۆرن جە بانگەوازیێوەنە پەی حکومەتو تورکیای واتش: "پەی درێژەدای پی پرۆسەیە، پەنەوازا حکومەتو تورکیایچ ئیرادێوە جددی نیشانە بڎۆ. گفتوگۊیەکۍ پەنەوازا کراوێ با و هەوڵبڎریۆ ئەنجامی ئەرێنیشا چنە گنۆوە تا جە دماینە ئارامی و ئاسایش پەی گرڎ کەسی بۍ دی. ئیساتۍ هەنگامەی یووەمە نریێنە، پۊکەی مشۊم لایەنی ۋەرا ۋەریچ هەنگامە بنیۆ."

ئاماژەش پانەیچ کەرڎ کە گەلو کوردی هەمیشە ئازایانە ئەوەکۊشایش کەرڎەن و واتش: "پی جۊرە بەردەوامۍ بیدۍ. کۊششەکێتا پەی وەرگریکەردەی جە دۆزو ڕەواو ۋێتا، یۊبیەی و یۊگێرتەیی شمە چنی یۊی و لایەنە جیاوازەکا هەمیشە پەی ئێمە سەرچەمەو ئیلهامی بیەن. پۊکەی هیواڎارەنا پی جۊرە بەردەوامۍ بیدۍ."