پژاک، لە شیکەرڎەیۊێوەنە پەی وەڵێئامایەکاو ئی دماییەو ئێرانی و وەرکەوتوو دلێڕاسەی ماچۊ: "ئاندە ئێران و تورکیا بیۍ بە کرێڵوو جەنگوازی و قەیرانەکا، گەلوو کوردی و جمیەرە ئازادیوازەکەش بیێنۍ کرێڵوو چارەسەری دیموکراتیکوو پەرسەکاو مەنتێقەکەی".
پارتوو ژیوای ئازادوو کوردستانی (پژاک)، جە شیکاریی سیاسییشنە، کە ئاماژە بە وەڵێئامایەکاو ئی دماییەو مەنتێقەکەی کەرۊ، بەتایبەتی هجوومە کۊکوشییەکا و ئەرەگیرکارییەکاو تورکیای پەی سەروو فرەو مەنتێقەکاو کوردستانی، بەتایبەتی وەرنیشت، سەرنیشت و وەرکەوتوو سوریای و هەرێمەکاو ئاسۊسی و پێنجوێنۍ و فاڕیاییە دلێی و جبەرییەکا بە سەنتەریی ئێرانی بیێنۍ، گردوو ئا جەنگوازی و قەیرانا جە ئەنجاموو چارەسەری نادیموکراتییانەو کێشە هەرێمییەکا و بەتایبەتی پەرسەو کوردی ڕووەشا دێنە، تاوتۊ کەرۊ و ماچۊ: "تاکە ڕاو چارەسەری" قبووڵکەرڎەی بییەی کوردین بە کولتوور و سیاسەتی و وەڵێوستەی دیموکراسی و ئازادیی گەلەکەیمانە، ئەگەرنا حەر ڕێوە تەرە بە قەیران دماییش مۍ، مەگەر ئانە بە ئازادی و یەکسانی ئینە دووانەن بە یۊوە! تاکە ڕاو ئازادی، یۊبییەی گەلا، ئازادیی قسەکەرڎەی و ژیوای ئازادین، کە ڕۊحوو "نەتەوەی دیموکراتیکین" و جەسەو کۊنفیدڕاڵیزمی دیموکراتیکی و وێڕاوەبەریین. ئینە وەڵێنیازوو گەلان، ژەنی و چینە چەوسیاوەکان، کە سەرڎەموو مۊدێرنینە بەزەحمەت وێشا بە دەسوو چەوسیایۊی ڕەگەزی، نەتەوەیی، ئایینی و بژێویی بدا.
دەقوو تەماموو شیکارییە سیاسییەکەو پژاکی چینەن:
"هجوومکەرڎەی سەروو گەلوو کوردی جەنگ کوردستاننە ئاڵۊزتەر جە جەنگوو غەززەی کەرۊ "
ئاڵۊزی و دوژمنکارییەکۍ کە ئیساتێنە ئێران و وەرکەوتوو دلێڕاسەیینە ڕووە مدا، دەرئەنجاموو یاوای دماقۊناغوو قەیرانی و ئاژاوەگێڵنییەکاو سیستموو دەوڵەت-نەتەوەین و مەنتێقەکە بە فاڕیایە بنەڕەتییەکا دووەگیان بییەن. ئیسرار سەروو سیستموو دەوڵەت-نەتەوەی، ورڎە ورڎە ورگیرسنای جەنگی جیهانی یەرەمی مارۊ شۊنەو وێشرە. چونکوم سیستموو ئێرانی یۊن جە خراپتەرین و ئاژاوەتەرین سیستمە دەوڵەت-نەتەوەکا، سەروو بنەماو جینۊسایدی کولتووری دژ بە گەلە ستەموەنەکریایا یاوان قۊناغوو دمایی. جەنگی جیهانیی یەرەم جە شێوەو جەنگی هەمەلایەنە یان گرژیی ورماسای جە وەڵاتە هامسایاو ئێرانینە ڕووە مدۊ و ئێرانیچ دەسێوە کاراش جە ڕووەدای ئی جەنگ و گرژیانە هەن. دماو تەقایوەکەو کرمانی و هەرپاسە هجوومە مووشەکییە بێوێنەکاو تارانی پەی سەروو عێراق، سوریا، پاکستانی و ملەملەکا بەلوچستانی، پەی یوەم جاری بە شێوێوە جیاواز، پارچە و پریشکەو جەنگە وەروەڵاکاو مەنتێقەکەینە یاوان خاکوو ئێرانی. ئێران وێش دەوری سەرەکی موینۊ جە سەرەورڎای ئا جەنگ و قەیران و گرژییانە و ئی جەنگە کە چندین ساڵێن بەرڎەواما، حەتا ئێرانی نەگێرۊوە دماییش نمۍ. حکومەتوو ئێرانیچ ئاراستێوەرە ملۊ، کە دێر یا زووتەر ئی جەنگەی پەی ئێرانی کێشۊ.
بێگومان یۊگێرتەیی مەنتێقەکەی پەی مامەڵەکەرڎەی چەنی جەنگی جیهانیی یەرەمی شێوەو یۊگرتەیی گەلە چەوسیاوانە وەراوەر کێوەڵکۍ و جەنگوو دەوڵەت-نەتەوەکانە دژوو یۊترینی، کە جە کۊکوشیی گەلانە ڕووە مدۊ گرنگا. چە ئێراننە و چە چند وەڵاتێوە تەروو جەنگوازوو مەنتێقەکەینە، "سیاسەتی خۊفناکوو نکۊڵیکەرڎەی جە گەلا و ئایینەکا"، بەتایبەت ئێراننە و تورکیانە، بە ئامانجوو پاکتاوکاری و کۊکوشی پەیڕەو کریۊ و چینەیچەنە یاوان قۊناغوو کۊتایی جەنگەکەیشا. بنەڕەتنە شێوازی تایبەتوو دەوڵەتە نەتەوەییەکا ئانەنە، کە هامسایەکاشا کەرا یاگۍ ملەملا، جەنگ و ئاڵۊزییەکا دووروو خاکوو وێشاوە با. پەوکای ئەنجامنە و وەروو ئانەی گەورەتەرین هەڕەشۍ کۊکوشی دژوو گەلوو کوردی کەرا، حەر چوار پارچەو کوردستانینە و گردوو گەلەکەیما ڕووبەڕوو هەڕەشە دڕندانا بییەنۊ.
هجوومەکاو دوڵەتوو تورکی فاشیستی پەی سەروو وەرنیشت و پانیشتوو کوردستانی و بەتایبەتی هجوومی عاسمانیی پەی سەروو یاگەکاو "یەکینەکاو پارێزنای وەرکەوتوو کوردستانی یەرەکە، کەشوو ئاسۊسی و پێنجوێنۍ، باس جە داواو و پلانەکاو تورکیای کەرۊ پەی فراوانکەرڎەی جەنگی جە گردوو بەشەکاو کوردستانینە بەگردی. ئامانجوو دماییئارڎەین بە پیلانەو کۊکوشیی یەک سەدەی دژوو گەلوو کوردی. حکومەتوو هەرێموو کوردستانیچ کە ئینا چێروو دەسوو بارزانییەکانە، بە هەمان شێوە بەتەمامی ئینا خزمەتوو ئی پیلان و پڕۊژەیەینە و بییەن بە هەڕەشۍ پەی سەروو گەلەکەیما چونکوم پەی بەرژەوەندی و تەماحەو دەسەڵاتداری، ڕووەشا کەرڎێنە هەولێری و پانیشتوو کوردستانیشا کەرڎەن ناوەندوو جەنگی، کێوەڵێکۍ دوژمنایەتی و سەروو بنەماو تەسلیمیەتی و بەکرێگیریای هەرمانە پەی دوژمنێوە پێسە دەوڵەتوو تورکی کەرا. فراوانبییەی جەنگوو وێرانکەرڎەی وەرنیشتوو کوردستانی هەوڵەکاو تورکیای و وەڵاتا پەشتیوانیەتی پەی ئا سیستموو دەوڵەت-نەتەوەیە جە "سیستموو گەل سەنتەری" بە خاستەر بزانا و تا ڕا نەدا سیستموو ئەڵتەرناتیڤوو گەلی ڕا بە کۊکوشییەکاشا گێرۊ.
بێگومان هجوومە سنووربەزنەکاو دەوڵەتوو تورکی پەی سەروو وەڵاتە هامسایا و هجوومە هامتەریبەکاو ئێرانی پەی سەروو چند وەڵاتێوە مەنتێقەکەی سوریانە و عێراقنە تا پاکستان، جەنگ دژوو گەلوو کوردی جە جەنگوو غەززەی و فەلەستینی ئاڵۊزتەرش کەرڎەن. ئانە بە شێوەو قەیرانی و ئاڵۊزییەکا و دلێنەبەرڎەی بژێوی گوزەریۊ، به شێوێوە خۊفناک دۊخوو دلۍ ئێرانی بەرەو جەنگ بەرۊ، پەوکای تاران وێش زەمینەو جەنگی و قەیرانەکان. بەهانۍ "هەڕەشا"و کوردی پەی پۊژنایرەی ئا جەنگا و هەڕەشەکاو وێش، فرە تەرسنۊکانە و دڕندانێنۍ. ئی دۊخە نەک تەنیا پەی گەلوو کوردی بەڵکوم پەی گەلاو ئێرانی و تورکیای و عێراقی و سوریایچ وەرگەش مەگێریۊ. تاران ئامادەن بژێوی و ژیوای گەلا و گلێرگەو دلۍ کەرۊ قوربانیی دوژمنایەتیی تارێخی و سیاسەتە ئاڕاستەکریایەکا چەنیی ڕکابەرە مەنتێقەیی و جیهانییەکا. جە مەسەلۍ کوردینە، بەلووچ و گەلۍ تەرۍ، جە سیاسەتوو ئاوراییکەرڎەی و سیستماتیکیوە تا میاوۊ خراپتەرکەرڎەی دۊخوو هەژاری بە ئامانجوو درێژەدای بە دەسەڵاتداری، گردشا زەنگوو هاگادارکەرڎەیۊن کە یاوێنۍ قۊناغوو دمایی و جەنگی.
کۊکوشی کولتووریی دژوو گەلا لایۍ و دلێنەبەرڎەی بژێوی و ئابووری لایێوە تەرۊ، ئێرانش جە جەنگێوە دلۍ بەینوو گلێرگەی و دەوڵەتی نەتەوەینە نزیکێش کەرڎێنۍ. تەنیا تەماشاکەرڎەی ئی وڕیا دلێیا و پەشتگۊشوستەی نامەعقوولا. بەدڵنیاییوە گرژیی بەینوو گلێرگەی و دەسەڵاتوو تارانی پێسە دووۍ جەمسەرە دژ بە یوا بییەن بە بەشێوە جە جمیەری کۊمەڵایەتی و شۊڕشگێڵنانەی گردوو گەلاو ئێرانی. حکومەتوو ئێرانی مەنتێقەکەنە، چەنی تورکیای، گەلوو کوردیش کەرڎەن قوربانیی پلانەکاش و دلۍ گلێرگەینە، بەتندی دژایەتیی فاڕیای و یاوان قەراخی دمایین.
ئارۊ بەتەمامی سەلەمیان، که بەرنامەو کوردی چێروو ناموونیشانوو دیموکراتیزهکەرڎەی و ڕزگارکەرڎەیی بزاڤبییەنە، به جەماوەری میاندەوڵەتی دلۍ گەلانە و ئازادیوازا، ورچنیەی گەلی ئاڕاستەکریاو دیموکراسی و ئازادیی کوردیش ئارڎەن حاسوو ورچنیەی دروسی جە وەراوەروو ورچنییەی کۊکوشیینە. بێبەشکەرڎەیی گەلوو مەنتێقەکەینە چی ورچنیەینە، خۊفناکتەرین دۊخوو جەنگی وەنەکەوتەی و ئێراننە و وەرکەوتوو کوردستانیچنە بەروو سنووروو ئا تەرساوە نییەنۍ. پێسە ڕۊ بە ڕۊ پەرسەو چارەسەرنەکریۍ کورد پاسە کەرۊ ئێران و تورکیا و وەڵاتە هەژموونوازە بەشدارا زیاتەر جە جەنگی و قەیرانینە گیرۊدۍ با و ئینەیچ بۊنەو ئانەیۊ سەرە ورمدۊ، بێدەنگیی گلێرگەی میاندەوڵەتی وەرڎەموو ئی دۊخەینە، یانۍ ملەملۍ سەروو بەشوو زیاتەروو ئێرانی و تورکیای جە دلێنەبەرڎەی گەلوو کوردی و خاستەرکەرڎەی کوردستانینە، زەرەرش بە ئەرەمەرزنایشا یاونان. ئێران ئیساتۍ هەست کەرۊ چەنی زیادبییەی هجوومە سەروزی و سیاسییەکا پەی سەروو وەڵاتە هامسایا، پەنەوازا کورد زیاتەر جە وەڵتەری کریۊ قوربانی. بەدڵنیاییوە تەرسوستەی سەروو بییەی کوردی جە حەربەشێوە کوردستانی بە ماناو تەرسوستەی سەروو گردوو گەلاو دلۍ ئێرانین. هجوومکەرڎەین سەروو کوردی و زیادکەرڎەی تەرسەکاو جەنگی، هاموەخت چەنی تێکدای بژێوی، ئابووری، سیاسەت و کولتوور، جە ڕووەو چارەنویسی و ئایندەو ئێرانیوە و بییەن دوۍ دیمۍ یەک زەڕی. ئێران قەت پێسە ئارۊی مەسەلۍ کوردیش نەکەرڎێنە بە سەبەبوو دلێنەبەرڎەی وێش دلێنە و بەرۊ. ڕەنگا ڕاگێریکەرڎەی جە ئێرانی و تورکیای جە یۊگێرتەی گەلینە حەرچوار پارچەو کوردستانینە جەنگوو سنووربەزنای زیاتەرش کەرڎەبۊ و وەنەکەوتەیۍ کاریگەرێشا سەروو کەشوهەواو دلۍ هەردووە وەڵاتا بییەبۊ. تا ئا ڕاددە کە ئێران و تورکیا بیێنۍ بە کرێڵوو جەنگی و دروستکەرڎەی قەیرانەکا، گەلوو کوردی و جمیەروو ڕزگاریوازانەش بییەن بە کرێڵوو چارەسەری دیموکراسییانەو کێشەکاو مەنتێقەکەی. پەوکای چەمپۊشیکەرڎەی چی ڕۊڵەو کوردی و هەوڵدای پەی کۊکوشکەرڎەیی، جەنگە مەنتێقەییەکا لاو خودوو ئا وەڵاتاوە فەراوانتەر کەرۊ. پەوکای تاکە ڕاو دەربازبییەی ئانێنە کە بییەی و کولتوور و سیاسەتوو کوردی قبووڵ کەرمۍ و دیموکراسی و ئازادی بە مێحوەروو گەلەکەیما وەڵۍ وزمۍ. ئەگەرنا حەر ڕایۍ تەرە بە قەیران دماییش مۍ. تاکە ڕاو ئازادی، یۊگێرتەیی گەلا، ئازادیی قسەکەرڎەی و ژیوای ئازادین، کە ڕۊحش جە "نەتەوەی دیموکراتیکی" و جەستەو کۊنفیدڕاڵیزمی دیموکراتیکی و وێڕاوەبەری وینۊوە. ئینە وەڵێنیازوو گەلا، ژەنی و چینە چەوسیاوەکان، کە سەرڎەموو مۊدێرنەینە بەزەحمەت وێشا وزا دەسوو چەوسنایوەی ڕەگەزی و ئایینی و پەی بژێویشا دەسەبەر کەرا.
