مییانو ئەرەیاوناو هێزەکا قەسەدەی سەرو چالاکیەکا، پێشئامێ و مڏرامانو جەنگاوەرا جە دژو هرووژمەکا جە ٢٤سەعاتا ویەردەینە ئەرەیاونێوەش وەڵا کەردۆ.

ئەرەیاوناکەی پی جۆرەن:

"جەنگاوەرێما جە وەراوەرو هرووژمەکا دۆڵەتو ئەرەگیرو تورکی و چەتەکاش درێژە بە مڏرامانو ڕەواو وێشا مڏا. هیزی (شەممە) یەکینەکا گەشمەرڏە هارونی ٢ درۆنێ وێ کوشێ دۆڵەتو ئەرەگیرو تورکیایشا جە بەنداو تشرینی ماڕا. دۆڵەتو ئەرەگیرو تورکی بە درێژایی شەوی جومعەی-شەممەی ناوچەو دەوروبەرو بەنداو تشرینیشا بۆمبواران کەرد. هەرپاسە فڕۆکەی جەنگی و فڕۆکە بێفڕۆکەوانەکا ناوچەو دەوروبەرو بەنداوەکەی و بیناو کرێکارەکا و تەپۆڵەو سیریاتەل و دەگاو خربەی زەمالایشا بۆمبواران کەرد.

هیزی سەعات ١١:٥٨ دەقێ، درۆنیوە تەقەمەنی دۆڵەتو ئەرەگیرو تورکی جە بەنداو تشرینی خەڵکو مەدەنیشا بۆمبواران کەرد. جە ئەنجامو بۆمبورانەکەینە ڕۆنامەنووس عەگید گەشمەرڏە بیی و ژمارەێوە هاموڵاتیێ مەدەنییێ زامڏارێ بیێ. زامڏارەکێ فاڕیێوە بۆ خەسەخانە.

هەرپاسە جە بەرەو قەرەقوزاقینە؛ جەنگاوەرەکێما جە تەپۆڵکەو قەرەقۆزاقی و دەگاو هۆشەریێ دژو بنکەکا سوپای ئەرەگیرو تورکی و چەتەکاش چالاکیشا ئەنجامدا. جە ئەنجامەنە بڕێ چەتێ زامڏارێ بیێ.

هەرپاسە فڕۆکە جەنگییەلێ دەگاکا تینای، خەسەق و تەپۆڵکەو سێڤیشا بۆمبوران کەرد. هامکات چنی بۆمبوارانەکەی دەگاکا تینا، بیر حسۆ، خەسەق، دیکان، مەلها و سەنا بە تانک و تۆپێ بۆمبوارن کریێ.

هەرپاسە فڕۆکە جەنگییەکێ دۆڵەتو ئەرەگیرو تورکی دووێ جارێ ناوچەو شیوخای جە وەرنیشتوو کۆبانێ بۆمبواران کەرد. بەمەڵامەتو بۆمبوارانەکەی هاموڵاتیێ مەدەنیێ زەرەرشا وەرکەوت. هەرپاسە فڕۆکەی بێ فڕۆکەوان سەرو ناوچەکەیرە خولیاوە. جموجۆڵو فڕۆکە جەنگییەکا دۆڵەتو ئەرەگیرو تورکی سەرو شارۆچکەو عەین عیسای و دەگاکا دەوروبەری خولیێنێ."