قەسەدە ئەرەیاۋناش دۆڵەتو تورکی ئەرەگیری بە چەتەکاش جە ئۆزبەکستان، تورکستان و چیچان کە بە نامۍ "حوراس ئەل دین"ی بەڕێکوستەی کریێنۍ، هرووژمش کەرڎ سەرو بیابانو منبجی و بە فرۆکەی بێفرۆکەوانیچ بۆمبوارانو بەنداوو تشترینی و دەوروبەریش کەرد.
مېیانو ئەرەیاۋنای و چاپەمەنی هێزەکاو سووریای دیموکراتیکی (قەسەدە) دەربارەو هرووژمو چەتەکاو دۆڵەتو تورکی ئەرەگیری پەی سەرو دەگایەکا منبجی و بەنداوو تشرینی ئەرەیاۋنێوەش وەڵا کەرڎۆ.
دەقو ئەرەیاۋناکەی پی جۊرەنە:
"بە بەشداری سەڎان ئەندامۍ ڕێکوزیاو 'حوراس ئەل دین'ی کە هاموڵاتیۍ ئۆزبەکستانی و تورکستانی و چیچانینۍ، دۆڵەتو تورکی ئەرەگیری و چەتەکێش هرووژمێوە قورسشا پەی سەرو دەگاکا پانیشتی و ۋەرکۊتوو شارو مەنبەجی و دەگایەکا بەنداوو تشرینی ئەنجامدا. هێزەکێما جوابو هرووژمەکاشا داوە و دەیان چەتۍ کوشیۍ و زامڎارۍ بیۍ.
سەرسەعبو ئارۆی بە پاڵپەشتی ٥ فڕۆکا بێفرۆکەوانو دۆڵەتو تورکی ئەرەگیری، تانک و چەتەکۍ هرووژمشا کەرڎ سەرو دەگایەکا عەتشانە، سەعیدین، خربەتوینی، زمالە، مستاحە، مەحشیە، تەپو سیریاتیل، دەگاو عەلوشی جە پانیشتوو ۋەرکۊتوو شارو مەنبجی. جەنگەوانەکێما تەمامو هرووژمەکاشا ماڕۍ، دەیان چەتۍ کوشیۍ، دووۍ تانکۍ و ٢ ترۆمبێلۍ دۆشکەهۊرگیرۍ، بە گرڎی ٦ ترۆمبێلۍ سەروازیێشا دلێنەبەردۍ.
جەنگەوانەکێما کە جە دژو ئەرەگیری تورکی و چەتەکاش مڎرامانێوە گۆرە سەرمەشقی مکەرۆ، جە ۋەرا ۋەرو چەتەکانە سینە بە سینە جەنگشا کەرد. مېیانو ئەرەیاۋنای قەسەدەی دماتەر دیمەنو جەنگەکەی و دلێنەبەردەی ترۆمبێلەکا وەڵا مکەرۆوە.
دۆڵەتو تورکی ئەرەگیری پەی ئانەی شکسو چەتەکاش بشارۆوە، بە فڕۆکەی بێفڕۆکەوان و چەکی قورس بەنداوو تشرینی و دەوروبەریش بۆمبواران کەرد. بڕۍ بەشۍ بەنداوەکەی زەرەرشا لایاوان. جە ۋەرا ۋەرو مەترسییەکا سەرو بەنداوەکەی و دەوربەریشەنە تورکی ئەرەگیر ۋەرپەرسا".
