مېیانو ئەرەیاۋنای هێزەکاو سوریایی دیموکراتیک – قەسەدەی ئامارەو ٢٤ سەعاتا هرووژمە ئەرەگیریەکاش وەڵا کەرڎۆ.

ئەرەیاۋناکەو قەسەدەی پی جۊرەنە:

"دۊڵەتو تورکی ئەرەگیری و چەتەکێش هرووژمە ئەرەگیریەکێش پەی سەرو هەرێمەکاو سەرنیشت و ۋەرکۊتوو سووریای زیاتەرۍ کەردێنۍ. هېزی (دووە شەممە) هرووژمو سەرو دەگایەکا شارو سرینینە کۆمکوژیش ئەنجام دا و جە ئاکامەنە یەرۍ زاوڵۍ بیۍ بە قوربانی (گەشمەرڎێوە و دووۍ زامڎارۍ)

قۊڵو قەرەقۆزاقی؛ هێزی (دووە شەممە) دۊڵەتو تورکی ئەرەگیری جە دەگاو جەرافی ناوچەو سرین و پانیشتوو کۆبانێ کۆمکوژیش ئەنجام دا. فڕۆکېوە بێفڕۆکەوان بۊمبوارانو یانەو دەگا نشینێوەش کەرڎ. جە ئاکامو بۊمبوارانەکەینە زاوڵێوە گەشمەرڎ بی، وە دووۍ زاوڵۍ تەریچ زامڎارۍ بیۍ. دۊڵەتو تورکی ئەرەگیری ٧٠ کەڕەتۍ بۊمبوارانو دەگایەکا تینا، جادا، بیر حسۆ، خەسەق، دیکان، مەلحە، سینا، گردەکانی سێڤێ و قەرەقۆزاقیش کەردێنۍ. جە ئاکامو بۆمبوارانەکەینە زەرەرۍ ماددی فرە پا ناوچا یاوان. هەرپاسە فڕۆکەی بێفڕۆکەوانو ئەرەگیرا ۋەرنیشتوو قەرەقۆزاقیش بۊمبواران کەرڎ و زەرەرۍ ماددی فرەش بە ناوچەکەی یاونا.

قۆڵو بەنداوو تشرینی؛ دۊڵەتو تورکی ئەرەگیری و چەتەکاش شەوەو دووە شەممەی دەگایەکۍ پانیشت و سەرنیشتوو بەنداوەکەیشا تۆپبواران کەرڎۍ. بە مەڵامەتوو تۆپبوارانەکەیۆ چڼین یانۍ سۆتۍ. فڕۆکەی جەنگی جە دەوربەرو بەنداوەکەینە چن هرووژمێوەش ئەنجام دا. جە وەختو نیمەڕۊینە سوپاو ئەرەگیری و چەتەکێس بە تۊپۍ قورسۍ و فرۆکە بیناو کرێکارا بەنداوەکەی و هەرێمەکای تەرو دەگایەکا بەنداوەکەیشا بە ئامانج گێرتۍ. جە ئاکامەنە زەرەرۍ فرەی مادی بە ناوچەکەی یاوا.

بە تەمامو ڕووەکەی فڕۆکەی جەنگی و فڕۆکەی بێفڕۆکەوانو دۊڵەتو تورکی ئەرەگیری جە ئاسمانو کۆبانێ، عەین عیسای و دەگایەکارە خولیێنێوە."