عېراق دەعواکېش داڎگاو پاریسینە سەرو ھەناردەکەرڎەو نەوتەو ھەرێمی جە تورکیای بەردۊ
نەوتە و سەرچەمە ۋێڕسکیەکۍ هەرێمو کورڎسانی، موڵکو گرڎی هامۋڵاتیا هەرێمو کوردستانینۍ و بەرئاورڎە و ورەتەیشا پێۋیسا خزمەتو گەلوو پانیشتوو کورڎسانیەنە بۊ.
نەوتە و سەرچەمە ۋێڕسکیەکۍ هەرێمو کورڎسانی، موڵکو گرڎی هامۋڵاتیا هەرێمو کوردستانینۍ و بەرئاورڎە و ورەتەیشا پێۋیسا خزمەتو گەلوو پانیشتوو کورڎسانیەنە بۊ، بەڵام بەمەڵامەتو سیاسەتۍ غەڵەتو خانەۋاڎەو بارزانییۋە، نەک تەنیا نەوتە بەڵکم کۆو قەوارەو هەرێمیش وستەن ۋەردەمو مەترسیۋە.
سایتی ئارگۆسی تایبەڎمەند بوارو بازاڕی وزەینە ۋەڵاشکەرڎۊ، ھېزی شەوۍ عێراق بە ڕەسمی تەرەفو توركیایش ئاگاڎاركەرڎەنۊ چانەی، جە دۆسیەو هەناردەكردەو نەوتەو خامەو هەرێمو كورڎسانیەنە، داڎگای میانجیکەرو میان دۊڵەتی پاریسی مەسڵەحەتوعێراقیەنە قەرارشدان.
سایتەكە جە زوۋانو سەرچەمېۋە ئاگاڎاریۊ ئەرەیاۋنانش، ئی قەرارە گورزێۋی تەرا ۋەرو هەرێمو كوردستانی نیمچە سەربەخۆی جە عێراقەنە گنۊ.
دما دماییەکا كانونی دوۋەمو ئېساڵی، داڎگای میانجیکەری میان دەوڵەتی پاریسی، دماو نزیكەو (9) ساڵا چەمەڕوانیی، قەرارو ۋێش جە بارەو ئا دەعوێۋە یەكلا كەردۊ كە حكومەتو فیدراڵی عێراقی سەبارەڎ بە هەناردەكردەو نەوتەو هەرێمو كورڎسانی سەرو توركیایش تۆمارە كەردێبۍ.
دماو قەرارەکەو داڎگاو پاریسی وەزارەتو نەوتەو عێراقی پێشوازیش کەرڎ جە قەرارو ئاخرو داڎگای میانجیکەرو ژووری بازرگانی میان دەوڵەتی جە پاریس، کە ، دژو مەسڵەحەتەکا هەرێمی و تورکیای بەرشکەرڎەن.
وەزارەتو نەوتەو عێراقی جە ئەرەیاۋنېۋەنە باسش چانەی کەرڎەن، جە دۆسیەو میانجیکەرڎەینە کە عێراق دژوو تورکیای تۆمارش کەرڎەن بە مەڵامەتو پاشێلکرڎەو بڕگەکا ڕێککۊتەی بۆریەو عێراق - تورکیای کە ساڵەو ١٩٧٣ ئیمزا کریان.
جە ڕێککۊتەکەو ١٩٧٣ێنە ئامان "حکومەتو تورکیای ئەشۊ پابەنڎو مۊچیاریەکاو عێراقی بۊ سەبارەڎ بە فاڕایۊ نەوتەی خامۍ کە جە عێراقۊ هەناردە کریۊ پۍ گرڎو ناوەنڎەکا ورگېرتەی و فاڕایۊ پۍ وێستگەو ئاخری.
دمابەدماو قەرارەکەی، توركیا تەرەفو عێراقیش چانەی ئاگاڎاركەردەنۊ کە ئیتر ڕا مەڎۊ بەبێ رەزامەنڎ بیەو حكومەتو فیدراڵی عێراقی نەوتەو هەرێمو كوردستانی بیاۋۊ بە بەندەرو جەیهان.
چنی ئانەی جە سەروەختو بەرئارڎەو ورەتەو نەوتېۋە پەدەکە و خانەۋاڎەو بەرزانى ئاگاڎارکریېۋە چانەی کە نەوتە موڵکو مەردمو هەرێمو کوردستانی و ئا جوگرافیاینە کە چنەش مژیۋا، پەنەوازیچا ورەتەو داهاتو نەوتۍ بلۊ خزمەتو هامۋڵاتیاوە. حەرپاسە فرەو هامۋڵاتیا پانیشتی داوا کەرێنۍ ڕێککۊتەی چنی عێراقی کریۊ و بەشێۋێۋی شەفاف نەوتەکۍ ورەشیۊ و داهاتەکەش وزیۊ خزمەتو خەڵکى و چێرخانى ئابورى پانیشتوو کورڎسانیۊ.
جە ۋەران ۋەرو هۆشدارى و داوکارییەکا هامۋڵاتیا هەرێمو کورڎسانی، خانەۋاڎەو بەرزانى بەتایبەت بەرزانى و کوڕو نەوەکېش گۊشا پا هۆشداریا نەڎا ومسڵەحەتو خانەۋاڎەکەیشانە و دەوڵەتو ئەرەگیرو ترکی بەناڕۊشنى نەوتەکېشا بە کەمتەر جە وارو بازاڕى جەهانیۊ هەرزان ورەش کەرڎە.
جە ئیسەنەو دماو قەرارەکەو داڎگای میانجیکەرو ژوورى بازرگانى میان دەوڵەتى پاریسی، هامۋڵاتیۍ هەرێمو کورڎسانی دڵۋەشېنۍ بە قەرارەکەی تەنیا ۋەرو ئانەی نەوتە و سامانە ۋێڕسکەکۍ جە دەسو ۋێسەپناو پەدەکەی و خانەۋاڎەو بارزانینە بەربەیا و جە چوارچێۋەو ڕێکەوتەیۍ ڕۊشنیەنە چنی بەغڎای نەوتە هەناردە کریۊ.
ھ.ش
