رۆژنیوز سەبارەت بە هۊرکوای سەروو کەناڵەکا ستێرک تی ڤی و مەدیا خەبەری ئەرەیاۋناش، " ئی کارە نا ئەخلاقییەو پۆلیسوو بەلجیکای هاموەختا چنی ١٢٦ەمین ساڵڕۆو ڕۆنامەگەری کوردیی و درێژەپنەدەروو ئەقڵیەتوو دەوڵەت-نەتەوەین دژ بە ئەرەیاۋنای و کولتوور و بیەو کوردی".
دماو ئانەی سەرسەعبوو ئارۊی، پۆلیسوو بەلجیکای بەبێ هیچ ئاگاڎاریۍ هورش کوا سەروو کەناڵەکاو ستێرک تیڤی و مەدیا خەبەری، جە ئەرەیاۋنېوەنە ئاژانسوو ڕۆژنیوزی، ئا هجووم و تاڵانکارییەو پۆلیسوو بەلجیکایش شەرمەزار کەرد و داواش جە تەماموو ڕۆنامەنوویسا کەرد، هەڵوێسوو ۋێشا دژ پا پاشێلکارییا بەربڕا.
ئەرەیاۋناکەو ئاژانسوو (ڕۆژنیوز)ی ئینەنە:
سەرسەعب و ئارۊی ٢٣ۍ مانگۍ پۆلیسوو بەلجیکای هورشکوا سەروو بارەگاو ئەرەیاۋنای ئازاڎیی هەر یۆ جە کەناڵەکا “ستێرک تیڤی و مەدیا خەبەر” ی کە دەنگ و ڕەنگوو کوردا ئازاڎینۍ جە تەماموو کوردسانی و ئەوروپای و جیهانی، جە وڵاتێوە بەنام ئازاڎییوازی و بەدەر جە تەماموو بنەماکا ئازاڎیی ڕۆنامەوانی و مافوو مرۆڤی و بەبێ هیچ ئاگاڎاریۍ هۊرشا کوان سەروو باڵەخانەو هەردووە میدیاکەی و ژماریوە فرە جە پېویسیەکاشا تاڵان کەردېنۍ و چنڎین ئامێرۍ پەخشوو میدیاکاشا ماڕێنۍ و جە هەرمانەشا وستێنۍ.
ئی کارە نا ئەخلاقییەو پۆلیسوو بەلجیکای جە ۋەرا ۋەر بە کوردانە هاموەختا چنی ١٢٦ەمین ساڵڕۆو ڕۆنامەگەری کوردیی و درێژەپنەدەرو ئەقڵیەتوو عوسمانی و دەوڵەت-نەتەوەیا دژ بە ئەرەیاۋنای و کولتوور و بیەو کوردی جە تەماموو جەهانینە، هاموەخت جە سەرنیشتوو کوردسانی و تورکیایچەنە سیاو بگیری ڕۆنامەنووسا ئازاڎیی دەسش پنەکەردەن، پۊکەی گومان کریۆ هەمان پیلانە و هەمان پاکێچ بۆ پەی ئانەی ڕا جە وەڵاکەردەیۆ پیلانە چەپەڵەکاشا دژ بە مرۆڤایەتیی و تەماموو پێکئامایەکا مەنتیقەکەی بگێرا.
پۊکەی جە سۆنگەو ۋەرپرسیاری و ئەرکوو ڕۆنامەوانیماوە جە پانیشتوو کوردسانی پەشتیوانیی ۋێما پەی میدیای ئازاڎی و هەردووە کەناڵەکا “ستێرک تیڤی و مەدیا خەبەر”ی ئەرەیاۋنمۍ، ئا تاڵانکارییەو پۆلیسوو بەلجیکای شەرمەزار مکەرمۍ و بانگەوازیی جە تەماموو ڕۆنامەنویسا ئازاڎیی جە پانیشتوو کوردسانی و عێراقی مکەرمۍ، هەڵوێسوو ۋێشا دژ پا پاشێلکارییە بەربڕا تا هیچ هێزێوە نەتاوۆ ڕاگیر بۆ جە یاونای ڕاسیی و حەقیقەتی و یاونای دەنگوو کوردی بە تەماموو جەهانی.
