ساڵح حسێن خەڵکوو شاروو حمایا، ساڵەو ٢٠١٥ی ڕووەش کەردێنە مەنتیقەو ڕمێلانی جە سەرنیشت و ۋەرکەوتوو سوریای ، ماچۆ: "جە ۋەرنیشتەنە ژیۋایێما دیۆ کە بتاومۍ چنەشەنە هەناسۍ هورلوشمۍ". "شۊنمێوە عالتەرم پۍ سڵامەتی زارۊڵەکام جیا جە ۋەرنیشتی نە دیۆ".
فرەو سوورییەکا بە هیواو ژیۋایۍ عالتەری کۆچشا کەرد پۍ سەرنیشتوو ۋەرکەوتوو سوریای. ساڵح حسێن خدر خەڵکوو شاروو حمای یۊن چانیشا. ساڵح خەڵکوو دەگاو شەریعەو حمایا و تاتەو ٨ زارۊڵان. ساڵح تەمەنش ٥٧ساڵێن و ماوەو ٢٦ساڵان خجڵ و بەرهەمی کشت وکاڵی چێروو بەیتێن. چنی هامسەرۍ و کناچەکێش جە هەرمانەی هامبەشەو کشتوکاڵینە هەرمانەکەرۆ.
ساڵح جە ساڵەو ١٩٨٨ جە شاروو تەرتووسی ئەرەنیشتە بیەن و تا دووە ساڵی یووەموو قەیرانوو سوریای چا شارەنە هەرمانەش کەردێنە. چنی قەیرانەکا، ئاژەو ژیۋای تا مۍ سەختتەر بۆ. دماو ئانەی ساڵەو ٢٠١٣ گێڵاوە دەگاکۍ ۋێش جە شەریعە. بە مەڵامەتوو بۆردومانی قورسوو دەگاکېوە تەنیا ٩ ڕووۍ چا مەنۆ. جە بێچارەیینە جە ئۆردوگاو ئیدلیبینە ئەرەنیشتە بۆ. ساڵح باسش چانەی کەرد کە ژیۋای کەمپوو ئیدلیبی حیچ جیاوازیێوەش چنی ژیۋای تەرتووسی نەبۍ و ماچۆ: ڕووە هەریاگۍ نیێنمۍ، بەرە ڕووەمارە وزیابێرە. ۋەروو ئاژەی سەختی نەتاوێنمۍ بژیومۍ. کوڕەکەم ۋەرنیشتەنە بۍ و ساڵەو ٢٠١٥ ئامایمۍ مەنتیقەو ڕمێلانی. جە ساڵەو ٢٠١٥ یۆ سەروو هەرمانەکېم بەردەوامەنا. ئێمە ئامێنمۍ پۍ وۍ چونکی ئێمە تەرەفڎارۍ ژیۋایۍ سڵامەتی و ئارامینمۍ. حەرپاسە مەجالوو هەرمانکەردەیچ عالا".
"ژیۋایۍ کە مرۆڤ بتاوۆ چنەشەنە هەناسێوە هۊرلوشۆ"
ساڵح ماچۆ: "دڵوەشا بە بنەیانەکەیش جە ۋەرنیشتەنە و واتش، ئێمە شۊنەو ژیۋایۍ ئارامیرە گێڵێنمۍ کە چنەشەنە هەناسێوە ئارام بڎەیمۍ و ئینەما ۋەرنیشتەنە دیۆ. پۍ سڵامەتی زارۊڵەکام عالتەرەم جە ۋەرنیشتی نەدیۆ. سەوزەی تەندروس جە بەیتەکانە منیە و چا ڕێوە خزمەتوو گەلی کەروو. ئینەیچ فرە دڵوەشم کەرۆ. ٦ خێزانێما هەنۍ چی هەرمانە هامبەشێنە. ئێمە ژیۋایۍ ئارامتەرما هەن و یاردەی یۊترینی مڎەیمۍ".
