بە بۊنەو ساڵیادوو دەسپەنەکەرڎەی هجوومە ئەرەگیرکارییەکاو دەوڵەتوو تورکینە پەی سەروو عەفرینی، وێنیشانداێوە شەرمەزاریی بە بەشداریی هەزاران کەسا شارەکاو حەسەکەی، تل تەمری، شەدادێی، تل براکی، هۊڵی، دربەسیەی، قامیشلۊی، گرکۍ لگێی، چلاخای و تربەسپی، لوا ڕاوە.
جە ئەنجاموو هجوومەکاو دەوڵەتوو تورکی و چەتەکاشنە، عەفریننە مانگەو ئازاروو ٢٠١٨ ئەرەگیر کریا و ڕژێمێوە تیرۊری ئەرەمەرزیا. گرد ڕوۍ تاوانێوە تازەو کوشتەی مەنتێقە ئەرەگیرکریایەکاو کوردینە کریا. پێسە تاوانوو ئڕفانای، قەنارەدای، ئەشکەنجەدای، تاڵانکەرڎەی، کۊچی بەزۊر و سووکایەتیکەرڎەی. جە یادوو ششەمین ساڵیادوو هجوومی ئەرەگیرکەروو دەوڵەتوو تورکینە پەی سەروو عەفرینی، چالاکیی شەرمەزاری فرەو شارەکاشنە؛ حەسەکە، تل تەمر، شەدادێ، تل براک، هۊڵ، دربەسیە، قامیشلۊ، گرکۍ لگێ، چلاخا و تربەسپیۍ وەرنیشتنە لوا ڕاوە.
بەیاننامە هامبەشەکانە ئامان: "سەرەتاو شۊڕشیوە دەوڵەتوو تورکی هەوڵۍ دلێنەبەرڎەی گەلاو سوریای و ژیوایشا مدۊ، مانگەو کانوونوو دووەمیوە چێرخانەکاو هەرێمەکا بۊردومانۍ کەرۊ".
ئەرەیاونایەکەنە ئاماژە پانەیە کریان بە ئەرەگیرکەرڎەی عەفرینی سەرەتاو جەنگی و ماڵاییۊیرەکاو سوریایوە دەسش پەنە کەرڎەن.
بەیاننامەکانە وەعد دریان تا گردوو پلانەکاو دوژمنی تێکی دریا و مەنتێقە ئەرەگیرکریێکۍ ئازادۍ کریا، مدرامان بە یەکڕیزیی گەلاو مەنتێقەکەی بەرڎەوام بۊ و بە بەشداریکەرڎەی هێزە سەروازییەکانە، سەرکەوتەی بەدەس مارا.
هەرپاسە جە ئەرەیاونایەکانە داوا وەنەو گلێرگەی میاندەوڵەتی کریان، دمایی بە ئەرەگیرکارییەکاو عەفرینی و هەرێمەکای تری بارا. هەرپاسە داوا وەنەو ڕێکوزیایە میاندەوڵەتی و یاساییەکا پێسە هیومان ڕایتس وۊچی و نەتەوە یۊگێرتەکا کریان، کە وەراوەروو تاوانە دڕندەکاو دەوڵەتوو تورکی بێدەنگۍ نەبا و وەرپەرسیارێتییشا بیاونا یاگێ.
شەهبا
پارتوو یۊبییەی دیموکراتوو پەیەدەی، کەمپوو مدرامانوو شەهباینە بە بەیاننامێوە، ئەرەگیرکاریی عەفرینی و بێدەنگیی میاندەوڵەتی وەراوەروو تاوانەکاو دەوڵەتی ئەرەگیرکەروو تورکی دژوو هەرێمەکاو ئیدارەو وێڕاوەبەریش شەرمەزار کەرڎێ.
هەرپاسە پەیەدەیچ داواش ونەو گلێرگەی میاندەوڵەتی، نەتەوە یۊگێرتەکا، گردوو ڕێکوزیا میاندەوڵەتییەکا کەرد، کە وەراوەروو هجوومەکاو دەوڵەتوو تورکینە وەرپەرسۍ با.
