نوسینگەو ئەرەیاۋنای پارتو دیموکراسی و یەکسانی گەلا (دەم پاتی) سەبارەت بە دیڎارەکا شاندو دەم پارتی جە ئەرەیاۋنێوەنە زانیاریێش وەڵا کەردێوە.

بە پاو ئەرەیاۋناکەی، ئەحمەد تورکیچ چنی ئەنداماو شاندەکەو دەم پارتی سری سورەیا ئۆندەری و پەروین بوڵدانۍ بەشداری جە دیڎار و سەرۋنەدایەکانە مکەرۆ و ئانە ئەرەیاۋېیان کە، "سەرۆک فراکسیۆنەکەما جە پەرلەمانەنە سری سورەیا ئۆندەر و پەرلەمانتارەما پەروین بوڵدانە کە ٢٨و کانونو یووەمی جە ئیمراڵینە چنی ئێژا عەبدوڵا ئۆجالانی دیڎارشا کەردەبۍ، پېسە وەڵتەرێچ ئاشکراشا کەردەبۍ دەس بە گەڕێوە جە دیڎاری و چەمپنەکۊتەی چنی پارتە سیاسیەکا جە پەرلەمانەنە مکەرا. شاندەکە دماو سەرۋنەدای ئیمراڵی سەرەتا زانیاریشا بە هامسەرۆکا گرڎیما تولای حاتمئۆگیولاریۍ و تونجەر باقرخانی دا. شاندەکە کە ڕامیاریمەدارو کوردی ئەحمەد تورکیچ ئینا دلێشەنە ئارۆ چنی سەرۆکو پەرلەمانو تورکیای نومان کورتولموشی و سەرۆکو گرڎیی مەهەپەی دەوڵەت باخچەلی کوۍ باوە.

شاندەکە کە جە بوڵدانۍ، ئۆندەری و تورکی پێکئامان دماو ئانەی دمایش بە گلێرۊبیەکاش چنی پارتەکا دلۍ پەرلەمانی ئارڎ، چنی رێکوزیا مەدەنییەکا، رێکوزیاکا رەنجی و سەندیکا پیشەییەکایچ دیڎار ئەنجام مڎۆ.

جە دیڎارەکاشانە جە بارەو دیڎارەکەیشا جە ئیمراڵینە زانیاریی ئەرەیاۋنا، سەرنج و پێشنیارەکۍ هۊرۍ گیریا. دماو ئانەی دیڎارەکۍ دمایشا مۍ، ئەرەیاۋنێوە ۋەرفراوان پەی رای گرڎیی وەڵا مکریۆوە".