شارو بۆلۆنیاو ئیتاڵیاینە جە ٢٧ و ئادارینە ڕەگەزنامەی فەخری دریا بە ڕابەر ئاپۆی، بە مەراسیمێوە تایبەت ڕادەسو برازاکەیش، عومەر ئۆجالانی کریا. جە مەراسیمەکەنە فیکرو ڕابەر ئاپۆی تاوتوێ کریا، چنی ڕەگەزنامەی فەخری، پەشتیوانی جە بانگەوازەکەو ڕابەر ئاپۆی کریا.
شارو بۆلۆنیاو ئیتاڵیاینە جە ٢٧ و ئاداری قەراردریا بە بەخشای ڕەگەزنامەی فەخری بە ڕابەر ئاپۆی، ڕەگەزنامە فەخرییەکە بە مەراسیمێوە تایبەت ڕادەسو برازاکەیش و پەرلەمانتارو دەم پارتی عومەر ئۆجالانی کریا.
مەراسیمەکە جە کۆشکۊو ئاکورسیۆی هەرێمو ئیمیلیا_ڕۆمانیاو بۆلۆنیای پایتەختی لواڕاوە. یاگەگیرو سەرۆک شارەوانی و سەرۆکو ئەنجوومەنو شارەوانی بۆلۆنیای و چڼین ۋەرپرسۍ ئیتاڵیای و ڕێکوزیا کوردییەکا بەشدارۍ مەراسیمەکەی بێنۍ.
ئەرایاۋنایەکۍ ئیتاڵیای ڕووماڵێوە بەهێزو مەراسیمەکەیشا کەرڎ. عومەر ئۆجالان وەڵۍ مەراسیمەکەینە جوابو پرسیارەو ڕۆنامەنویساش داوە.
بە نامۍ ئەنجوومەنو شارەکەیۆ، ماریا کاترینا مانسا قسێش کەردۍ و کوچێش جە ژیۋای ڕابەر ئاپۆی باسکەرد، ئاماژەش پانەی کەرڎ، ڕابەرو ملیۆنان کەسا ئینا گۆشەگیرینە و هەڵوێستەش کەرڎ سەرو وردبیەیۆ فەلسەفە و سیاسییەکا و ئەوەکۊشای ٢٥ ساڵەو ڕابەر ئاپۆی جە گۆشەگیرینە.
'بەخشای ڕەگەزنامەی فەخری، خاوەنداریین جە بانگەوازەکەی'
مانسا ئەرەیاۋناش بەخشای ڕەگەزنامەی فەخری بە ڕابەر ئاپۆی سیمبولێوە نییا، بەڵکم خاوەندارییا جە بانگەوازە تاریخیەکەو ڕابەر ئاپۆی. واتش: "ئاشتی تەنیا لکەدریاو جەنگی نییا، بەڵکم لکەدریاو دادپەروەری و ئازادیی گرڎ کەسێ چا".
"عەبدوڵا ئۆجالان گرڎو گرفتە کۆمەڵایەتییەکا چارەسەر مکەرۆ"
یاگەگیرو سەرۆک شارەوانی بۆلۆنیای، ئیمیلی کلانسی ئەرەیاۋناش سیستەمو ڕابەر ئاپۆی سەرو بناغەو دیموکراسی و ئیکۆلۆژی و ئازادی ژەنا ئەرەمەرزیان و ئیلهامبەخشا پەی گرڎ لێوە. جەختش کەردۆ، ڕابەر ئاپۆ بە فەلسەفەو کۆنفیدراڵیزمی دیموکراتیکی، نەک هەر جە کوردەسانەنە، جە گرڎو جەهانینە گرفتە کۆمەڵایەتییەکا چارەسەر مکەرۆ.
جە درێژەنە واتش: "فیکرو عەبدوڵا ئۆجالانی پەی ئاشتی و پێوەرەژیۋای، هیواو ئایندەیا".
جە دما دمایی قسەکاشەنە سوپاسو شارەوانی شارەکەیش کەرڎ و ئەرەیاۋناش خاوەنداری جە ڕابەر ئاپۆی ماناو مردنای ستەمین.
'داواو پاڵپەشتی پەی ئاشتی مکەرمۍ'
دماتەر عومەر ئۆجالان ئەرەیاۋناش مشۊم ئیتاڵیا پاڵپەشتی جە مافەکا مرۆڤی و چارەسەری سیاسی پەی پرسو کوردی جە تورکیانە بکەرۆ، مشۊم ئیتاڵیا و ئۊروپا پاڵپەشتی جە ئەوەکۊشای گەلو کوردی بکەرا، واتش: "پۊکەی پەنەوازیما بە ئاشتییا، پۊکەی داوا جە ئیتاڵیای و گلېرگەو ئۊروپای مکەرمۍ، پاڵپەشتی جە پرۆسەو ئاشتی بکەرا".
دماتەر "ڕەگەزنامەی فەخری" بە ڕابەر ئاپۆی ڕادەسو عومەر ئۆجالانی کریا.
چێش بۍ؟
سەرو پێشنیارو یاگەگیرو سەرۆک شارەوانی بۆلۆنیای ئیمیلی کلانسی و سەرۆک فراکسیۆنو هامپەیمانی مەدەنی دیتیۆن بیگاج، ئەنجوومەنو شارو بۆلۆنیای جە ٢٧ و ئاداری قەرارش دا "ڕەگەزنامەی فەخری" بەخشۆ بە ڕابەر ئاپۆی.
زیاتەر جە ٢٠ شارا ڕەگەزنامەشا بەخشا بە ڕابەر ئاپۆی
تا ئیساتۍ جە ئیتاڵیانە زیاتەر جە ٢٠ شارەوانیا ڕەگەزنامەی فەخریشا بەخشان بە ڕابەر ئاپۆی. ئەنجوومەنو شارەوانی گۆسێنزای بە "خەڵاتو ئاشتی و مافەکا مرۆڤی" کە ٤و نیسانو ٢٠٠٤ یش بەخشا بە ڕابەر ئاپۆی، بەرەو ئی خەڵاتاشە کەردۆ. شارەکاو پېسە پالێرمۆی و ناپۆلی و پالاگونیای و ڕیجیۆ ئیمیلیای و ڕیاجی و مارتانۆی و پینیرۆلۆی و کاستێل دێ گویدیسی و کاستێل بۆتاچیوی و بیرجیتۆی و چینکوفروندی و فۆسالتۆی، مافو ڕەگەزنامەیشا بەخشان بە ڕابەر ئاپۆی.
